AGIKO dongo i kare ma atye ki mwaka abongwen keken. Meno obedo mwaki 34 mukato angec i kare ma watye i lobo Côte d’Ivoire, dok kadi wa kombeddi-ni ka acung ci nongo atye futi adek (mita 1). I kare ma kiniang pekona, lunyodona gucuko cwinya me tic matek wek pe aket cwinya i kom kit ma anen kwede. Ayubo ka cato nyig yen i nyim pacowa dok acano jami iye ma nenone mit. Ka cat man oywayo luwil mapol.

Ki lok ada, tic matek pe oloko jami ducu. Pud amedde ki bedo cek, dok onongo atute atuta ki jami mogo i kwona, calo ka kwanyo jami ki ka ma lamal. Jami ducu nen calo iwacci kiyubogi pi jo ma borgi dodo mega kiryo. Cwinya obedo ka cwer tutwal ento meno olokke i kare ma ao mwaka 14.

I nino mo acel, mon mogo aryo ma gitye Lucaden pa Jehovah guwilo nyig yen ki bota, ci gucako kwano Baibul kweda. I ngeye, aniang ni ngeyo Jehovah kacel ki yubbe pire tek loyo bedo ngat macek. Meno okonya adada. Jabuli 73:28 odoko ginacoya ma amaro adada. Bute mukwongo i wang Baibul meno wacci: “Ki tung bota, bedo cok ki Lubanga aye ber.”

Kwona olokke ada i kare ma lupacowa gudak atura i lobo Burkina Faso. I lobo Côte d’Ivoire, ka ma wakwo iye-ni dano onongo gingeya ni an lacat nyig yen. Ento ka ma wadak iye-ni anen mapat i wang dano dok gibedo ki ur i koma. Dano giciko wanggi ka nena adada. Pi man acako bedo ka i ot keken i kine mogo pi cabit mapol. Lacen wiya opo i kom kit ma nyikke cok bot Jehovah okonya kwede. Acoyo waraga bot jang gang kal pa Lucaden pa Jehovah wek kicwal ngat mo obin olima​—Nani, lamiconari mo ma ngweco ki pikipiki olima.

Yo ka ma wabedo iye-ni kare ducu onongo pwot mada dok i kare me kot nongo pwot adada dok pong ki coto. Nani opoto tyen mapol ki i wi pikipikine ka nongo tye ka bino me kwan kweda ento meno pe omiye lworo. Lacen, en oye me tera i cokke. Aniang ni man mitte ni myero akat woko ki i ot kun akanyo neno pa dano. Medo i kom meno, bedo i wi pikipiki biweko ngwec kwede bedo tek pien nongo wan aryo weng wapek. Kadi bed kumeno,  aye me cito kun wiya po i kom bute me aryo pa ginacoya ma amaro-ni: “In Rwot Lubanga aye dong idoko ka larrena.”

I kin mukene wan ki Nani wapoto ki pikipiki i coto ento cito i cokke okeliwa adwogi maber. Mar ma kinyutta i Ot me Ker pat adada ka iporo ki neno ma dano ginena kwede! Anongo batija i nge dwe abongwen.

Bute me adekke i ginacoya ma amaro-ni wacci, “Wek atit pi tic ducu ma in itiyo.” Onongo angeyo ni ticwa me pwony pe bibedo gin mayot. Wiya pud po i kom tyen me acel ma acito kwede ka tito kwena i ot ki ot. Lutino wa ki jo madongo gubedo ka nena, gulubo kora dok bene guporo wotta. Meno ocwero cwinya adada ento abedo ka poyo wiya kekena kare ki kare ni jo magi gimito Paradic kit ma an bene amito-ni; man oweko adiyo cwinya.

Wek jami obed yot, anongo lela latyene adek ma angweco kwede. Ngat ma watiyo kwede i tic me tito kwena cora i cere ka lacen pye i nge lela ka watye i lung. Kadi bed ni ticwa me pwony obedo tek i acakkine, ento okela yomcwiny madit ma oweko i 1998 acako tic macalo painia marii.

Akwano Baibul ki dano mapol ma i kine dano angwen gunongo batija. Medo i kom meno, lamera matidine ojolo lok me ada! Winyo kit ma jo mukene gitye ka dongo kwede i yo me cwiny okonya i kare ma nongo amito cuko cwiny. I nino mo acel ma two maleria odiya adada, anongo waraga ma oa ki i Côte d’Ivoire. Onongo acako kwano Baibul ki latin univaciti mo ki i doggola i lobo Burkina Faso ento amiyo ni omego mo okwan kwede. Lacen, latin kwan-ni okobo i lobo Côte d’Ivoire. Cwinya obedo yom adada me niang ni en dong tye latit kwena ma peya onongo batija!

Gin ango ma atimo me kwo? Dul mo ma miyo kony bot lugoro oye pwonya ki carani. I kare ma lapwony acel ma dako oneno kit ma atiyo kwede, en owacci: “Omyero wapwonyi ki kit me yubo cabun.” Meno aye gin ma gin gutimo. Ayubo cabun me lwoko bongo kacel ki jami mukene ki paco. Dano gimaro cabuna dok gicuko cwiny jo mukene me wilone. Acato an kikoma kun atiyo ki pikipiki ma tye ki tyene adek.

Ki cwercwiny, aweko tic macalo painia marii i 2004 pienni oguru ngeya onongo dong rem adada. Kadi bed kumeno, pud atiyo matek i ticwa me pwony.

Dano giwacci angene pi bwonyona ma weko jo mukene bene gicako bwonyo. Atye ki tyen lok maber me bedo ki yomcwiny pien kitung bota bedo cok ki Lubanga aye ber.​—Lok pa Sarah Maiga.