1-3. (a) Wangeyo nining ni tam pa Lubanga tye lamal loyo pa dano? (b) Gin ango ma wabinyamo i pwony man?

 LUBANGA ocweyo lumalaika ki dano ma giryek wek enywak kwedgi kwo kacel ki yomcwiny. (Jab. 36:9) Lakwena Jon olwongo ngat ma Lubanga okwongo cweyone ni “Lok” ki dok ni “gin ducu ma Lubanga oketo yam ocakke ki i kome.” (Jon 1:1; Yabo 3:14) Lubanga Jehovah otito tamme kacel ki kit ma ewinyo kwede bot Wode ma obedo latin me kayone-ni. (Jon 1:14, 17; Kol. 1:15) Lakwena Paulo oloko i kom ‘leb pa lumalaika,’ ma obedo leb mapat adada ma lumalaika gikubbe kwede ki i polo ka iporo ki leb ma dano giloko.—1 Kor. 13:1.

² Jehovah tye ki ngec muromo i kom lumalaika kacel ki dano bilion mapol ata ma en ocweyogi-ni. Dano mapol ata giromo lega bote i leb mapol mapat pat dok i cawa mo keken. En pe gamo lega magi keken ento bene bedo ka kubbe ki dok tiro cwecce me polo. Me cobo man, kit ma en tamo, loko, ki dong kubbe kwede myero rwomme obed lamal ma loyo pa dano. (Kwan Icaya 55:8, 9.) Ki lok ada, ka Jehovah loko ki dano, en loko tamme i yo ma niang iye yot wek dano guniang maber adada.

³ Kombeddi-ni, wabinyamo jami ma Lubanga maryek loyo ducu-ni otimogi wek ekubbe ki dano i yo ma niange nicakke ki i  poto me Eden nio wa i kareni. Wabinyamo bene kit ma en loko kwede ki yo me kubbene ka ce mitte.

4. (a) Leb mene ma Jehovah otiyo kwede me lok ki Moses, Camuel, ki dong Daudi? (b) Jami macalo mene ma kicoyogi i Baibul?

⁴ Jehovah oloko ki Adam i poto me Eden kun tiyo ki leb ma Adam twero niange iye maber adada. Twero bedo ni nen calo Lubanga oloko kwede i leb Ibru. Lacen, en otito tamme bot co mogo ma Luibru calo Moses, Camuel, ki Daudi, ci gin gucoyo lok man i Baibul i leb Ibru dok i yo mayot. Medo i kom coyo tam ma Lubanga owaco botgi, gin gucoyo gin ma en otimo pi jone, ma i kine tye iye niyegi kacel ki margi dok bene gutito gorogi ka maleng. Jami ducu ma gin gucoyo-ni pigi tego botwa i kareni adada.—Rom. 15:4.

5. Tika Jehovah obedo ka diyo jone ni myero guti ki leb Ibru keken? Tit kong.

⁵ Lubanga kare ducu pe obedo ka lok ki dano i leb Ibru keken. I kare ma kigonyo jo Icrael ki i opii i lobo Babilon, leb Aram odoko leb ma jo mukene ma gitiyo pi Lubanga onongo giloko nino ducu. Oromo bedo ni me nyuto gin ma bitimme i anyim, Lubanga oweko lanebi Daniel, Jeremia ki dong Ejira gucoyo bukke mogo me Baibul i leb Aram.—Nen lok ma tye i tere piny madok i kom Ejira 4:8; 7:12; Jeremia 10:11; Daniel 2:4.

6. Lok pa Lubanga ocako nya nining i leb mukene mapat ki leb Ibru?

⁶ Lacen, Alegijanda Madit ocako loyo lobbe mapol ma oweko leb Grik, ma kilwongo ni Koine, kicako lokone i lobbe mapat pat. Lujudaya mapol gucako loko leb meno, ma oweko kigonyo Ginacoya me leb Ibru i leb Grik. Ginacoya man me leb Grik ma kilwongo ni Septuagint kibyeko ni dano 72 aye gugonyo. Man obedo Baibul ma kikwongo gonyone dok pire onongo tek adada. * Pien lugony leb onongo pol ata, man oweko kigonyo Baibul i leb mapol mapat pat nia ki i nyig lok ki nyig lok nio i leb ma niange yot. Kadi bed kumeno, Lujudaya ma giloko leb Grik ki Lukricitayo onongo gineno Septuagint ni obedo Lok pa Lubanga.

7. Leb mene ma Yecu nen calo otiyo kwede me pwonyo lupwonnyene?

⁷ I kare ma latin kayo pa Lubanga obino i lobo, en nen calo oloko dok opwonyo i leb ma Baibul lwongo ni Ibru. (Jon 19:20; 20:16; Tic 26:14) Ka pe gin mo, jo ma giloko leb Ibru i cencwari me acel nen calo gubedo ka loko leb Aram, ma oweko Yecu nen calo bene otiyo ki nyig lok me leb Aram. Ento, en bene onongo ngeyo leb Ibru ma Moses ki lunebi gubedo ka lokone i kare macon, pien onongo kikwano i cabit ducu i kacokke pa Lujudaya. (Luka 4:17-19; 24:44, 45; Tic 15:21) Medo i kom meno, leb Grik ki Latin onongo kiloko i Icrael. Ginacoya pe tittiwa ka ce Yecu oloko leb aryo magi.

8, 9. Ka kwena maber-ri woto ki ket i kin piny, pingo leb Grik odoko leb ma pire tek ma jo pa Lubanga gitiyo kwede, dok man nyuto gin ango madok i kom Jehovah?

⁸ Jo ma gulubo kor Yecu i kare macon onongo gingeyo leb Ibru, ento i nge tone, lupwonnyene gubedo ka loko leb mukene mapat pat. (Kwan Tic pa Lukwena 6:1.) Ento ka kwena maber-ri woto ki ket i kin piny, Lukricitayo onongo gitiyo ki leb Grik macalo leb ma gikubbe kwede i jami ducu. Ki lok ada, Jiri pa Matayo, Marako, Luka ki dong Jon, ma gupong ki pwony kacel ki jami ma Yecu otimogi-ni, kipokogi i kabedo  weng ma kiloko iye leb Grik. Pi meno, leb ma pol pa lupwonnyene onongo giloko aye leb Grik ento pe Ibru. * Waraga mapol ma lakwena Paulo ocoyogi kacel ki bukke mukene ma kicoyogi pi teko pa cwiny maleng-ngi kipokogi i leb Grik.

⁹ Jo ma gucoyo Ginacoya me leb Grik onongo pol kare gitiyo ki Septuagint ka gitye ka kwanyo lok mogo ki i Ginacoya me leb Ibru. Lok magi ma i kine mogo nyig lokgi onongo pe rwatte ki nyig lok macon me leb Ibru-ni, kombeddi-ni dong gitye but Ginacoya. Pi meno, Baibul ma jo ma gitye ki roc gugonyo-ni odoko but Lok pa Lubanga, Lubanga ma pe cwako ni tekwaro nyo leb moni ber loyo mukene.—Kwan Tic pa Lukwena 10:34.

10. Ngo ma waromo mokone ki i kit ma Jehovah loko kwede ki dano?

¹⁰ Nyamo wiye wiye kit ma Lubanga loko kwede ki dano pwonyowa ni Jehovah kubbe ki dano ka ce mitte. En pe diyowa ni myero wapwony leb moni wek wabed ki ngec i kome nyo i kom yubbe. (Kwan Jekaria 8:23; Niyabo 7:9, 10.) Jehovah aye otiro jo ma gucoyo Baibul, ento bene en oweko gin gucoyo lokke i kit ma guniang kwede.

11. Pingo loko leb mapat pat pe ogengo Lubanga me lok ki dano?

¹¹ Tika loko leb mapat pat ki dong apokapoka mogo manok nok i kit ma kigonyo kwede ki Baibul ogengo Lubanga wek pe olok ki dano? Pe. Me labolle, oromo bedo ni wangeyo leb mogo manok ma Yecu otiyo kwedgi, ma ginonge i leb macon. (Mat. 27:46; Mar. 5:41; 7:34; 14:36) Ento, Jehovah oweko kigonyo lok pa Yecu i leb Grik ka dok lacen i leb mukene. I ngeye, Lujudaya ki Lukricitayo gukobo lok me Baibul tyen mapol ma oweko kigwoko kwena ma tye i Lok pa Lubanga. Kopi magi me Baibul-li kigonyogi i leb mapol mapat pat. I nge mwaki ma romo 400 ma Kricito okwo kwede i lobo, laco mo ma nyinge John Chrysostom owaco ni pwony pa Yecu dong kityeko gonyone i leb pa jo Ciria, Ejipt, India, Percia, Etiopia, medo ki leb mukene mapol ata.

12. Lweny ango ma kitugo i kom Baibul?

¹² Gonyo Baibul i leb mapol obalo tute pa co mogo calo Diocletian, Laloc me Roma, ma i kine ka mwaki 300 i nge nywalo Yecu omiyo rukca ni myero kiwang Ginacoya ducu. Kitugo lweny mapol mapat pat i kom Lok pa Lubanga ki dong i kom jo ma gigonyo ki dok ma gipoko. Lacen, i kine ka mwaki 1,200, laco mo ma nyinge William Tyndale ocako gonyo Baibul me leb Ibru ki Grik i leb Munu, kun waco bot laco mo ma okwano ka maleng ni: “Ka Lubanga oweko akwo i lobo pi mwaki mapol, ci latin awobi ma ticce obedo me pur i poto wang ma ongeyo Baibul maber loyo wa padi.” Pi aunauna ma  onongo tye, Tyndale ongweco ki i lobo England wa i Ulaya wek omine kare me gonyo ki dok goyo Baibul. Kadi bed ni lutela dini gutute matek me wango Baibul ducu i dye lwak, ento dano gucako bedo ki kopi mapol me Baibul. I ngeye, kiketo roro nyo erupe i kom Tyndale ma oweko kideye ka kiwange kom yat. Ento, Baibul ma en ogonyo-ni pud tye watin. Kitiyo ki Baibul pa Tyndale me gonyo Baibul me King James version ma dong kipoko i twok lobo ducu-ni.—Kwan 2 Temceo 2:9.

13. Kwano kopi macon me Baibul omoko gin ango?

¹³ Kadi bed kumeno, kopi mogo me Baibul ma kigonyogi i kare macon ma pud ginonge wa i kareni gitye ki bal matinotino kacel ki apokapoka manok nok. Ento, ludiro ma gitye ki ngec i kom Baibul gukwano ki diro but ginacoya muyec, kopi macon me Baibul, ki dong Baibul ma kigonyo wacon gin alip ki alip kun giporo me nenone ka girwatte. Kwan man omoko ni kwena me Baibul pe olokke. Kadi bed ni tyeng mogo ma pe kiniang iye maber ento man pe oloko kwena ma tye i Baibul. Kwan ma kit man miyo wamoko ni wan macalo lutino kwan me Baibul watye ki Baibul ma Jehovah oweko co ma lugen gucoyo pi teko pa cwiny maleng.—Ic. 40:8. *

14. I kareni Baibul tye onya i rwom ma rom mene?

¹⁴ Kadi bed ni lumone mapol gulwenyo matek i kom Baibul, ento Jehovah oketo tek wek Lokke obed i buk ma pud dong kigonyo loyo ducu i tekwaro pa dano. Kadiwa i kare ma dano mapol gitye ki niye manok nyo gipe ki niye i kom Lubanga, Baibul pud tye buk ma kicato loyo buk mo keken dok i kareni kigonyo bute nyo weng i leb ma romo 2,800 kulu. Pe tye buk mo keken ma kipoko loyo Baibul dok tye pol ata i kin piny. Baibul mogo ma kigonyogi kwanogi tek dok kadi ikwan pe iniang maber. Kadi bed kumeno, twere me niang lok ma pigi tego ma tye i Baibul magi pien giminiwa gen wek walarre.

15. (a) I yo ma nining ma kilwenyo kwede ki ariya ma bino pi loko leb mapat pat? (b) I yo ango ma leb Munu tye leb maber loyo me poko cam me cwiny?

¹⁵ I 1919, kicimo gurup mo matidi pa lutino kwan me Baibul me bedo “lagwok ot ma lagen dok maryek,” dok gin gutiyo ki leb Munu me kubbe ki ‘dano ducu ma gibedo i ot pa Kricito.’ (Mat. 24:45) “Lagwok ot” meno obedo ka tute me miyo cam me cwiny i leb mapol mapat pat; ma welle dong omedde kato leb 700 kulu. Calo Koine, leb Grik ma kibedo ka lokone i cencwari me acel-li, leb Munu bene tye leb maber loyo ma kitiyo kwede me gonyo leb pien konyo ka odok i lok me cat ki dong kwan i kabedo mapat pat.

16, 17. (a) Jo pa Lubanga onongo gimito gin ango? (b) Miti meno kicobo nining? (c) I 1950, omego Knorr owaco ni etye ki gen ango ma lubbe ki Baibul me New World Translation?

 ¹⁶ Guti me cam me cwiny ma wanongo-ni jenge i kom Baibul. I acakkine, jo pa Lubanga onongo gitiyo ki Baibul me King James Version ma kityeko goyone i mwaka 1611 dok man aye Baibul me leb Munu ma onongo pol pa dano gitiyo kwede. Ento kadi bed kumeno, leb ma kitiyo kwede i Baibul man onongo niang iye tek. Medo i kom meno, nying Lubanga tye iye tyen manok adada ento ka ikwano Baibul macon, inongo ni nying Lubanga tye iye tyen alip mapol ata. I Baibul me King James Version, tye ka mukene ma pe kigonyo maber tutwal dok tye ki tyeng mogo ma kimedogi ameda ma gipe i Baibul macon ma kibedo ka tic kwedgi. Baibul mukene me leb Munu bene gitye ki kodi peko acel-li.

¹⁷ Onongo mitte mada ni jo pa Lubanga gubed ki Baibul ma kigonyo maber dok ma niang iye yot. Kiketo Komitti me The New World Bible Translation, dok i kine ka mwaka apar omege ma i komitti man gucwalo woko Baibul i volumes abicel mapat pat nicakke i 1950 me o i 1960. I kare ma kitye ka cwalo woko volume mukwongo i Agucito 2, 1950, Omego N. H. Knorr owaco bot jo ma gitye i gure meno madit-ti ni: “Mitte ni jo pa Lubanga gubed ki Baibul ma kigonyo i leb ma dano giniang i kareni, ma nongo kigonyo atir dok ma niang iye yot wek okonygi me pwonyo lok me ada. Pire tek ni myero gubed ki Baibul ma kwanone yot dok ma pe nyweno wi dano kit macalo lutedero kacel ki jo ma pe gingeyo kwan maber i kare ca onongo ginongo kwano jiri ma lupwonnye pa Kricito gucoyo pe yelo wigi-ni. En owaco ni etye ki gen ni Baibul me New World Translation bikonyo dano milion mapol ata i yo me cwiny.

18. Tam ango ma kimoko ma oweko kitye ka gonyo Baibul i leb mapol?

¹⁸ Gen meno ocobbe i yo me aura i 1963 i kare ma kigoyo Baibul me New World Translation of the Christian Greek Scriptures i leb abicel mukene—Dutch, French, German, Italian, Portuguese, ki dong Spanish. I 1989 Lukiko Madit pa Lucaden pa Jehovah gucako dipatmen ma loyo gonyo Baibul i gang kalwa madit. Lacen, i 2005, kimiyo twero ni myero kigony Baibul i leb mapat pat ma kitye ka goyo iye Wi Lubele. Macalo adwogine, Baibul me New World Translation kombeddi-ni kitye ka goyone bute keken nyo weng i leb makato 130 kulu.

19. Ngo ma pire tek ma otimme i 2013, dok gin ango ma wabinyamo i pwony ma lubo man?

¹⁹ Ka kare woto ki kato, kiniang ni omyero kilok nyig lok mogo ma tye i Baibul me New World Translation wek orwatte ki leb Munu ma dano giloko i kareni. I tum pa cabit ma obedo i Oktoba 5 ki 6, 2013, omege ki lumege ma romo 1,413,676 ma gitye i lobbe 31 gubedo tye nyo kikubogi me winyo cokke pa Watch Tower Bible and Tract Society of Pennsylvania ma timme mwaka ki mwaka. Dano ducu cwinygi obedo yom me winyo lamemba acel me Lukiko Madit ka tito i lok angeyo dok cwalo woko Baibul me leb Munu me New World Translation ma kiloko nyig lok mogo ki iye. Dano mapol gukok ki pig wanggi i kare ma lujol wele gubedo ka poko Baibul man bot jo ma gubedo tye i cokke meno. I kare ma lalok obedo ka kwano tyeng mogo ki Baibul man, lwak guniang ni Baibul man me leb Munu-ni kwanone ki niang iye yot adada makato macon woko. Pwony ma lubo man binyamo i yo matut lok i kom Baibul man kacel ki kit ma kitye ka gonyone kwede i leb mapat pat.