Watye ki woro pi jami mabeco ma lucayan gucobo dok waye i kom kwed ma gutimo tekke gitye ki jami ma moko ni lok meno tye kakare.

 “Cayan obedo pwonyo lok i kom cwec ki kitgi ki dong ngec ma wanongo ki i komgi.” (Collins Cobuild Advanced Learner’s English Dictionary) Kadi bed ni Baibul pe obedo buk me cayan, ento cuko cwiny dano me kwedo lok i kom cwec ki dok me pwonyo jami mapol ki i kwed pa lucayan. Nen kong labol magi:

•   Lok i kom lakalatwe kacel ki jami ma i dan polo: “Kong wuting wangwu malo wunen polo, anga ma oketo jami magi? Ngat ma telo monygi, ngeyo welgi ducu, dok bene lwongogi ki nyinggi.”​—Icaya 40:26.

•   Lok i kom jami ma kwo: Solomon ‘oloko i kom yadi, ocako ki i kom yat cedar me Lebanon nio wa i kom anyero ma dongo i kom cel; oloko bene i kom lee tim, winyo, gin ma lak alaka piny, ki dong rec.’​—1 Luker 4:33.

•   Yat: “Jo ma komgi yot pe gimito daktar; ento jo ma komgi lit aye mito.”​—Luka 5:31.

•   Lok i kom kit ma piny lokke kwede: “Yam idonyo i odi me kano pee mayom? Ineno odi me kano pee matek calo gweng . . . ? Yamo wokceng ket i wi lobo kun a ki kwene?”​—Yubu 38:22-24.

 Lok ma tye i bukkewa nyuto woro madit i kom cayan pien loko i kom cwec dok tito jami mabeco ma lucayan gutimo. Lucaden pa Jehovah gicuko cwiny lutinogi me kwan wek gunge jami ma tye i kabedo murumogi. Lucaden mapol gukwano cayan, me labolle biochemistry, cura, ki dong physics.

 Pe waye ni cayan twero gamo lapeny ducu ma dano tye kwede. a Me labolle, jo mogo gukwano lok i kom kit ma lobo tye kwede, ki mukene gukwano kit ma dul kom dano tiyo kwede. Ento pe kitwero tito pingo gin ma kwo twero bedo i lobo, ki dok pingo dul kom acel kubbe ki dul mukene?

 Watyeko niang ni Baibul keken aye miyo lagam mucwiny pi lapeny magi. (Jabuli 139:13-16; Icaya 45:18) Pi meno, waye ni wek ngat moni onong ngec muromo, myero en okwan lok me cayan kacel ki Baibul bene.

 I kine mukene kitwero nenone ni cayan pe rwatte ki lok me Baibul. Ento ki lok ada, lanywen magi polle bino pien nongo pe kiniang ngo kikome ma Baibul pwonyo. Me labolle, Baibul pe pwonyo ni cweyo lobo otero nino abicel keken, ma nongo nino acel acel tye ki cawa 24 keken.​—Acakki 1:1; 2:4.

 Ki lok ada, tam mogo ma onya i kin piny dok kineno calo tam pa lucayan nongo pe ki gin ma moko ni tam meno tye ada dok lucayan mogo ma gingene bene pe gicwako. Me labolle, kit ma lobowa ki jami ma iye tye kwede nyuto ryeko ki diro ma lamal, dok man oweko tam pa Lucaden pa Jehovah bene rwatte ki tam pa lucayan mogo ni jami makwo pe gucako pigi kengi nyo ni gua ki i kom gin mo acel.