Macalo Lucaden pa Jehovah, watiyo matek me dongo wat i kin jo me odiwa ki odi pa jo mukene bene. Waworo Lubanga macalo ngat ma ocako te yub me kwo me ot. (Acakki 2:21-24; Jo Epeco 3:14, 15) I Baibul, en miyo pwony ma okonyo dano i twok lobo lung me nongo yomcwiny i nyomgi ki dong me bedo ki wat matek i kingi.

 Wayelle matek me lubo tira me Baibul pien konyowa me yubo kitwa macalo co, mon, ki dong lunyodo. (Carolok 31:10-31; Jo Epeco 5:22–6:4; 1 Temceo 5:8) Ryeko ma nonge i Baibul bene konyo jo me odi ma danone gitye i dini mapat pat me bedo ki kwo maber. (1 Petero 3:1, 2) Winy kong lok magi ki bot jo ma pe gubedo Lucaden ma luotgi gudoko Lucaden pa Jehovah:

•   “Mwaka abicel mukwongo me nyomwa opong ki daa ki arem cwiny. Ento, ma Ivete odoko Lacaden pa Jehovah, marre ki diyo cwiny ma en nyuto omedde. Alokaloka ma en otimo olaro nyomwa.”—Clauir, ma a ki i lobo Brazil.

•   “Cwinya pe obedo yom i kare ma cwara, Chansa, ocako kwano Baibul ki Lucaden pa Jehovah, pien onongo atamo ni gipoko kin jo me odi. Nicakke i kare meno, dong aniang ni i adane Baibul okonyo nyomwa.”—Agness, ma a ki i lobo Zambia.

 I ticwa me pwony, wanyuto bot jo mukene kit ma lubo ryeko ma i Baibul twero konyogi kwede me

•   Yero ngat me anyoma

•   Kemme ki ariya i mwaka mukwongo me nyom

•   Bedo ki wat maber ki luotgi

•   Tic ki cente i yo mupore

•   Juko daa

•   Pwonyo kit me timo kica

•   Pwonyo lutinogi

 Ki lok ada, i cawa mukene kelo. Me labolle, ripot mo ma okatti ki bot kampuni mo me kwedo lok ma kilwongo ni Sofres, i mwaka 1998 owaco ni nyom acel i kom pyeraryo ma nongo ngat acel i kingi obedo Lacaden pa Jehovah obedo ki pekki madongo i kare ma ngat meno oloko dinine.

 Yecu otito ni i kare mukene, jo ma gilubo pwonye gibikemme ki peko i kwo me ot. (Matayo 10:32-36) Lakwed lok me Tekwaro ma nyinge Will Durant otito ni i te Ker me Roma, “Kimoro adot i kom Lukricitayo ni gipoko kin jo me odi,” a dok Lucaden pa Jehovah mogo gikemme ki adot meno i kare-ni bene. Ento, tika meno tyen lokke ni Lucaden pa Jehovah aye gipoko kin jo me odi?

 I kare ma European Court of Human Rights ongolo kop i kom adot ma kimoro i kom Lucaden pa Jehovah ni gituro kin jo me odi, guwaco ni wadigi ma pe gubedo Lucaden pa Jehovah aye pol kare ginyayo woo pien gikwero “ye ki woro twero pa wadigi me yero ki lubo dinigi.” Kot man omedde ni: “Man obedo gin ma timme i nyom mapol, ma nongo luot moni gitye i dini mapat pat, wa i kin Lucaden pa Jehovah bene.” b Kadi bed Lucaden pa Jehovah gitye ka kato ki i adegadega pi dini ma guyero, pud gitute me lubo tira me Baibul man ma waco ni: “Pe wucul wang gin marac ki gin marac i kom dano mo, . . . Ka ce twerre ki tung botwu, myero wubed ki kuc ki dano ducu.”—Jo Roma 12:17, 18.

 Lucaden pa Jehovah gilubo tira ma Baibul miyo ni gunyomme “i kin jo pa Rwot keken,” ma te lokke ni nyomme ki ngat ma nywako niye acel kwedgi. (1 Jo Korint 7:39) Cik man jenge i Baibul dok bene tiyo. Me labolle, i mwaka 2010 Journal of Marriage and Family owacci “jo munyomme ma gitye i dini acel” pol kare gibedo ki wat maber loyo i kingi. c

 Kadi bed kumeno, Lucaden pa Jehovah pe gicuko cwiny jo ma tye i dinigi me pokke woko ki bot luotgi ma pe tye Lacaden. Baibul waco ni: “Ka ce Lakricitayo mo tye ki dakone ma pe oye Yecu, ka dako-nu oye me medde ki bedo kwede, laco pe myero oryeme woko. Ka dako mo bene tye ki cware ma pe oye Yecu, ka ce cware oye me medde ki bedo kwede, pe myero okwer cware.” (1 Jo Korint 7:12, 13) Lucaden pa Jehovah gilubo cik man.