Lucaden pa Jehovah pe gikwero nino me nywal pien wangeyo ni kodi kwer meno pe yomo cwiny Lubanga. Kadi bed pe kicoyo atir atir i Baibul ni pe wakwer nino me nywal, ento lok ma iye konyowa me niang tam pa Lubanga ka odok i kom kwer ma kit magi. Kong wanen gin ma Baibul waco iye.

1.   Kwero nino me nywal ocakke ki bot lukamfiri. Ma lubbe ki buk mo ma wiye tye ni Funk & Wagnalls Standard Dictionary of Folklore, Mythology, and Legend, kwer magi ocakke ki i tam ni i nino me nywal pa ngat moni, “cen maraco gitye ki kare me lweny i kom jo ma gitye ka kwero nino me nywalgi” ki dok ni “lurem ki lok mabeco ma giloko pi anyim pa ngat meno twero gwokke.” Buk me The Lore of Birthdays waco ni i kare macon, rekod me nino me nywal onongo kitiyo kwede me “tyet ki lakalatwe ki miti me niang gin ma bitimme i anyim.” Buk man bene owaco ni “i kare macon, onongo kitamo ni kandol ma kitiyo kwede i nino me nywal onongo tye ki teko me cobo gin ma ngat moni mito i anyim.”

    Ento Baibul kwero tim tyet tyet, nyo ‘gin mo keken ma kubbe kwede.’ (Nwoyo Cik 18:14; Jo Galatia 5:19-21) Ki lok ada, tyen lok acel mumiyo Lubanga ongolo kop i kom boma me Babilon i kare macon obedo pien ni jone onongo gityeto tyet ki lakalatwe ki miti me niang gin ma bitimme i anyim. (Icaya 47:11-15) Lucaden pa Jehovah pe giketo cwinygi tutwal me niang kit ma kwer ducu gucakke kwede; kadi bed kumeno, ka Ginacoya omiyo tira ka maleng kit macalo oloko kwede i kom tim tyet tyet, watero calo gin ma pire tek.

2.   Lukricitayo me kare macon onongo pe gikwero nino me nywal. Buk mo ma wiye tye ni The World Book Encyclopedia waco ni “onongo gineno kwero nino me nywal calo kwer pa lukamfiri.” Baibul nyuto ni lukwena ki jo mukene ma Yecu kikome aye opwonyogi guweko lanen ma Lukricitayo ducu myero gulubi.—2 Jo Tecalonika 3:6.

3.   Gin acel keken ma kiciko Lukricitayo me po iye pe obedo nino me nywal ento nino me to pa Yecu. (Luka 22:17-20) Man myero pe obed me ur pien Baibul waco ni “nino me to pa dano, ber kato nino ma ginywale iye.” (Latitlok 7:1) I agikki me kwone i lobo kany, Yecu onongo dong oyubo nying maber ki Lubanga, mumiyo nino me tone pire tek loyo nino me nywalle.—Jo Ibru 1:4.

4.   Baibul pe loko pi latic pa Lubanga mo ma okwero nino me nywalle. Meno pe obedo mere pien ni wic owil awila iye pien Baibul loko i kom jo aryo ma pe giworo Lubanga ma kikwero nino me nywalgi. Ento, yub aryo magi ducu gubedo ki adwogi maraco.—Acakki 40:20-22; Marako 6:21-29.

 Calo lunyodo weng ma kitgi beco, Lucaden pa Jehovah ginyuto mar bot lutinogi kare ducu, ma man kwako minigi mic ki dong namo kacel ki luwotgi ki yomcwiny. Gitute me lubo lanen ma pud dong ber loyo pa Lubanga, ma miyo jami mabeco bot lutinone i cawa mo keken. (Matayo 7:11) Lutino pa Lucaden pe giwinyo calo gitye ka keng gin mo, kit macalo labol magi ginyuto kwede:

•   “Yomo cwinya ma loyo ka anongo mic mo i cawa ma pe abyeko.”—Tammy, mwaka 12.

•   “Kadi bed pe anongo mic i nino nywalla, lunyodona pud giwilla mic i kare mukene. Amaro kit ma gitimo kwede dok meno yomo cwinya adada.”—Gregory, mwaka 11.

•   “Tika itamo ni pati ma tero dakika apar, kek mogo manok, ki dong wer acel keken obedo pati? Omyero ibin gangwa ci inen kit ma pati kikome bedo kwede!”—Eric, mwaka 6.