Tam ma pe tye kakare: Tyen lok mumiyo Lucaden pa Jehovah pe gikwero karama aye ni pe giye i kom Yecu.

 Lok ada: Watye Lukricitayo. Waye ni Yecu Kricito keken aye twero larowa.—Tic pa Lukwena 4:12.

Tam ma pe tye kakare: Wupoko kin jo me odi ki pwonyo dano ni pe gukwer Karama.

 Lok ada: Waparo adada pi jo me odi, dok watiyo ki Baibul me konyogi wek gudong wat matek i kingi.

Tam ma pe tye kakare: Pe wunyuto kit mabeco i kare me Karama calo yot cing, kuc, ki dong ber kit bot dano weng.

 Lok ada: Watute me nyuto yot cing ki dong bedo ki kuc nino ducu. (Carolok 11:25; Jo Roma 12:18) Me labolle, yubwa me cokke ki me tito kwena tye ma rwatte ki tira ma Yecu omiyo ni: “Wun wugamo nono labongo cul mo, wumi bene nono labongo cul.” (Matayo 10:8) Medo i kom meno, watito ki dano ni Ker pa Lubanga keken aye bikelo kuc me ada i wi lobo.—Matayo 10:7.

•   Yecu ocikowa ni wapo pi tone, ento pe pi nino nywalle.—Luka 22:19, 20.

•   Lukwena pa Yecu ki lupwonnyene macon onongo pe gikwero Karama. Buk ma wiye tye ni New Catholic Encyclopedia waco ni “kicako kwero Karama i nge mwaka 243 [K.M.],” ma meno obedo mwaka makato miya acel i nge to pa lukwena.

•   Pe tye gin mo keken ma nyuto ni kinywalo Yecu i nino dwe 25 me Decemba; nino me nywalle pe kicoyo i Baibul.

•   Pe waye ni Lubanga cwako Karama pien kwer man ocakke ki i tekwaro pa lukamfiri.—2 Jo Korint 6:17.

 Jo mapol pud gikwero Karama kadi bed gingeyo ni ocakke ki i tekwaro pa lukamfiri dok Baibul bene pe cwako. Jo ma kit meno gitwero penyo ni: Pingo Lukricitayo myero gubed pat?

 Baibul cuko cwinywa ni wati ki wiwa, nyo “kerowa me tam.” (Jo Roma 12:1, 2, NWT) Pwonyowa me tero lok ada calo gin ma pire tek. (Jon 4:23, 24) Pi meno, kadi bed waparo kit ma jo mukene ginenowa kwede, ento walubo cik ma igi lac me Baibul kadi bed biweko jo mukene pe gimarowa.

 Kadi bed wan kikomwa pe wakwero Karama, waworo twero ma ngat acel acel tye kwede me moko tamme pire kene i lok man. Pe wagengo jo mukene ki kwero karama.