Jo ma gunongo batija macalo Lucaden pa Jehovah ento dong pe gitito kwena, nyo bene pe gibino i cokke ki luye luwotgi, pe kikwero ribbe kwedgi. Ki lok ada, watemme me kubbe kwedgi wek wakonygi me yubo watgi ki Lubanga.

 Ka ngat mo otimo bal madit, pe te lokke ni wang ma kikwanyo woko ki i kacokke. Ento, ka Lacaden ma onongo batija oloko odoko kite me turo cik me Baibul dok pe ngut i kom balle, ci kibijuko ribbe kwede nyo kikwanye woko ki i kacokke. Baibul waco ka maleng ni: ‘Wukwany dano marac woko ki i kinwu.’—1 Jo Korint 5:13.

 Laco ma kikwanyo woko ki i kacokke, ento dakone ki lutinone pud gitye Lucaden pa Jehovah kono? En dong pe bimedde ki nywako kacel ki jo me ode i yub mo keken me woro Lubanga, ento wat i kingi macalo jo me ot bimedde. Nyomgi kacel ki mar ma ginyuto i kingi macalo jo me ot bimedde kit ma jwi.

 Jo ma kikwanyogi ki i kacokke gitwero bino i cokkewa me woro Jehovah. Ka gimito, ci giromo bene nongo kony i yo me cwiny ki bot luelda me kacokke. Miti pa luelda tye me konyo jo ma kikwanyogi woko ki i kacokke me doko Lucaden pa Jehovah odoco. Jo ma kikwanyogi ma gikwero tim maraco dok ginyuto ni gitye ki miti me kwo ma lubbe ki rwom me kit matir ma tye i Baibul kare ducu gitwero doko Lucaden pa Jehovah odoco.