Ee. Watye Lukricitayo pi tyen lok magi:

•   Watute me lubo pwony pa Yecu Kricito ki kite.—1 Petero 2:21.

•   Waye ni Yecu aye yo me nongo larre, dok ni “pe tye nying mo mukene i wi lobo man ma gimiyo ki wan dano ma myero walarre iye.”—Tic pa Lukwena 4:12.

•   Ka ngat moni odoko Lacaden pa Jehovah, en nongo batija i nying Yecu.—Matayo 28:18, 19.

•   Walego i nying Yecu.—Jon 15:16.

•   Waye ni Yecu aye Latelawa, nyo ni en aye ngat ma kicimo me bedo ki twero i kom dano ducu.—1 Jo Korint 11:3.

 Kadi bed kit meno, tye jami mapol ma pokowa woko ki i kom dini mukene ma kilwongogi bene ni Lukricitayo. Me labolle, watye ki niye ni Baibul pwonyo ni Yecu obedo Wod pa Lubanga, ento pe Lubanga. (Marako 12:29) Pe waye i kom tipo ma pe to, dok wangeyo ni Ginacoya pe cwako ni Lubanga wango dano pi naka i mac me kapiny, nyo ni jo ma gitelo dini myero kilwonggi ki nying me dog tic mogo ma kite dok pat.—Latitlok 9:5; Ejekiel 18:4; Matayo 23:8-10.