Nenowa ki jami ma watimo ma lubbe ki yub me yik jenge i kom pwony me Baibul, kit ma kiryeyo kwede piny:

•   Pe obedo gin marac me kumu ka ngat ma wamaro oto. Lupwonnye pa Yecu gukok i kare ma ngat ma gimaro oto. (Jon 11:33-35, 38; Tic pa Lukwena 8:2; 9:39) Pi meno, pe waneno yub me yik calo kare me yomcwiny ki myel. (Latitlok 3:1, 4; 7:1-4) Me ka meno, obedo kare me nyuto parwa.​—Jo Roma 12:15.

•   Jo muto pe gingeyo gin mo. Kadi bed waa ki i kaka nyo tekwaro mapatpat, wagwokke ki kwer mogo ma jenge i kom pwony goba ni jo muto pud gingeyo piny dok gitwero timo gin mo i kom jo ma kwo. (Latitlok 9:5, 6, 10) Man kwako kwer mogo calo wang o me ryemo cen, yik i rwom ma malo, yub me po pi ngat muto-ni mwaka ki mwaka, tyero jami bot jo muto, lok ki jo muto nyo penyo doggi, ki dong kwer mogo ma kitimo i kom ngat ma luote oto. Wagwokke ki tim me tekwaro nyo kwer magi, pien walubo cik me Baibul ni: “Wupokke woko kwedgi, . . . pe wugud gin mo ma kome ki keni.”​—2 Jo Korint 6:17.

•   Gen tye pi jo muto. Baibul pwonyo ni kibicero jo muto dok ni kare bibino ma to dong bibedo pe. (Tic pa Lukwena 24:15; Niyabo 21:4) Gen man weko pe dok wakumu mukato kare woko. Gen me nicer bene okonyo Lukricitayo macon.​—1 Jo Tecalonika 4:13.

•   Baibul miniwa tam me bedo ki neno mupore. (Carolok 11:2) Pe waneno yub me yik calo obedo kare me “wakke” ki jami nyo rwom ma watye kwede. (1 Jon 2:16) Pe watero yub me yik calo obedo kare me namo, nyo wilo canduk lyel ma welle lamal tutwal ki bongo yik ma kite dok pat me nyutte bot dano.

•   Pe wadiyo dano me lubo niyewa ma lubbe ki yub me yik. Walubo cik ma iye lac man: “Ngat acel acel i kinwa bidok i lok ma i kome pire kene bot Lubanga.” (Jo Roma 14:12) Kadi bed kit meno, ka kiminiwa kare, ci watito pi niyewa “ki mwolo dok ki woro.”​—1 Petero 3:15.

 Kabedo: Ka jo me gang gumoko me bedo ki yub me yik, ci yubbe bibedo ka mo keken ka ma lupaco guyero, calo i Ot me Ker, i gang lyel, i gang pa ngat mukene nyo i limu.

 Yub: Kimiyo pwony me cuko cwiny ot to kun kitito gin ma Baibul pwonyo i kom to ki gen me nicer. (Jon 11:25; Jo Roma 5:12; 2 Petero 3:13) Kitwero bene tito kit mabeco ma lato obedo kwede, nyo lok i kom pwony ma wanongo ki i kit ma en ogwoko kwede ki dong gennene.​—2 Camuel 1:17-27.

 Kitwero bene wero wer ma jenge i Baibul. (Jo Kolocai 3:16) Kigiko yub me yik ki lega ma kweyo cwiny.​—Jo Pilipi 4:6, 7.

 Cul nyo ajog: Pe kiculo pi gin mo keken ma watimo, man kwako wa yub me yik, dok bene pe wajogo ajog i cokkewa.​—Matayo 10:8.

 Kijolo jo mene: Kijolo kadi wa jo ma pe Lucaden pa Jehovah me winyo pwony me yik ma bedo i Ot me Ker. Calo yub me cokkewa mukene-ni, yub me yik bene tye pi lwak.

 Lacaden acel acel moko tamme pire kene ma lubbe ki cwiny ma ngolle kop. (1 Temceo 1:19) Kadi bed kumeno, pe wanywako i tim ki kwer me dini ma pe rwatte ki cik me Baibul.​—2 Jo Korint 6:14-17.