Ngo ma Baibul Waco i kom Bedo Kacel Labongo Nyomme?

TUKI

Lagam ma Baibul miyo

Baibul waco ni Lubanga mito ni dano ‘guwek tim kwele obedi.’ (1 Jo Tecalonika 4:3) I Baibul, lok man ni “tim kwele” kwako tim abor, tim me tekgung, ki dong buto i kin laco ki dako ma pe gunyomme.

Pingo Lubanga paro ka laco ki dako gunyomme onyo pe?

Lubanga aye ocako te yub me nyom. En ocako i kare ma okelo laco ki dako mukwongo kacel. (Acakki 2:22-24) En pe oyubo ni laco ki dako gubed kacel labongo nyomme.
Lubanga ngeyo gin maber loyo pi dano. En oyubo ni nyom obed gin ma ribo laco ki dako matwal kun kelo adwogi maber dok gwoko jo ducu me ot. Tam kong i kom lapor man. Ka iwilo kom nyo meja ki bot kampuni mo, pol kare bino ma nongo peya kicano. Ento, kampuni meno bene miyo latin buk ma nyuto kit me canone. I yo acel-li, Lubanga bene miniwa tira i kom kit me bedo ki yomcwiny i kwo me ot. Tira pa Lubanga kare ducu kelo adwogi maber bot jo ma gilubo.—Icaya 48:17, 18.

Ka iwilo kom nyo meja ki bot kampuni mo, pol kare bino ma nongo peya kicano. Ento, kampuni meno bene miyo latin buk ma nyuto kit me canone. I yo acel-li, Lubanga bene miniwa tira i kom kit me bedo ki yomcwiny i kwo me ot.
Buto ki ngat ma pe inyomme kwede twero kelo adwogi maraco adada. Me labolle, twero kelo yaco ma pe iyubbe pire, two ma kobo i yo me buto, ki dong turcwiny.
Lubanga omiyo bot co ki mon kero me nywal kun wok ki i tim me buto. Lubanga neno kwo calo gin maleng, dok kero me nywalo lutino obedo mic madit. Lubanga mito ni water mic meno ki woro kun waketo deyo i kom yub me nyom.—Jo Ibru 13:4.

Tika porre me bedo kacel ma peya wunyomme me niang ka wutwero bedo ki yomcwiny?

Me bedo ki yomcwiny i nyom, pe mitte ni kong wubed kacel pi kare mo labongo nyomme. Ma ka meno, nyom moni jing matek ka laco ki dako gumoko tamgi me bedo kacel ki dok me tic kacel me cobo pekogi. a Jo moni kong gikwonge ma peya gunyomme, pi meno gibedo ki miti matek me medde ki bedo kacel.—Matayo 19:6.