Baibul tito jami ma bitimme ki dong kit pa dano, ma binyuto ni ‘agikki piny’ dong cok. (Matayo 24:3) Baibul lwongo kare meno ni ‘kare me agikki.’—2 Temceo 3:1; Daniel 8:19

 Baibul otito jami mapol ma bitimme lawangacel ma ‘binyuto’ kit ma kwo bibedo kwede i kare me agikki. (Luka 21:7) Nen kong labol mogo:

 Lweny bitimme i wi lobo ducu. Yecu owacci: “Rok bilweny ki rok wadi, ki ker bene bilweny ki ker wadi.” (Matayo 24:7) I yo acel-lu, buk me Niyabo 6:4 otito pi langwec ki aguragura ma cung pi lweny ma “kwanyo kuc woko ki i wi lobo.”

 Kec. Yecu otito ni: “Kec bene bipoto i lobo.” (Matayo 24:7) Buk me Niyabo otito pi langwec ki aguragura mukene ma bikelo kec i kabedo mapol.—Niyabo 6:5, 6.

 Oyengyeng madongo. Yecu owacci “oyengyeng biyengo lobo i kabedo mapol.” (Matayo 24:7; Luka 21:11) Oyengyeng madongo magi bikelo deno can kacel ki to i rwom ma lamal loyo kare mo keken i twok lobo ducu

 Two. Yecu owacci “two gemo mapatpat bipoto i kabedo mapol.”—Luka 21:11.

 Turo cik. Kadi bed dano gubedo ka turo cik pi mwaki miya mapol, Yecu owacci i kare me agikki, “tim maraco bibedo ka medde ameda.”—Matayo 24:12.

 Balo lobo. Buk me Niyabo 11:18 otito ni dano ‘bibalo lobo.’ Gibitimo man i yo mapol calo timo jami maraco ki dong balo kabedo murumowa.

 Kit dano biballe woko. I buk pa 2 Temceo 3:1-4, Baibul otito ni dano “pe gibimiyo pwoc mo, gibibedo jo ma pe leng, . . . gibibedo jo ma pe timo kica bot dano, gibibedo lucok dog jo mukene, gibibedo jo ma mitgi pe jukke, jo ma ger ma gidag gin mo maber, luroro, jo ma tye atata ma pe giparo piny, jo ma gikette malo kengi ki wakke.” Dano onongo gibinyuto kit magi i rwom ma lamal adada mumiyo kitwero waco ni kare meno ‘bibedo marac adada.’

 Balle pa gangi. I buk pa 2 Temceo 3:2, 3, Baibul owaco ni dano mapol “pe gibimaro” jo me gangigi dok lutino “pe gibiwinyo lunyodogi.”

 Dano gibirwenyo margi pi Lubanga. Yecu otito ni: “Mar pa jo mapol bikwe woko.” (Matayo 24:12) Yecu onongo tye ka wacci dano mapol birwenyo margi pi Lubanga. I yo acel-lu, 2 Temceo 3:4 waco ni i kare me agikki, jo magi ‘gibimaro yomcwiny ma ka maro Lubanga.’

 Dano gibiporo odenge ni gibedo ludini. I buk pa 2 Temceo 3:5, Baibul otito ni dano gibiwacci giworo Lubanga, ento nongo pe gikwo kit ma Lubanga mito.

 Niango i kom lok pa lunebi me Baibul bimedde. Buk pa Daniel otito ni ‘i kare me agikki,’ jo mapol gibinongo ngec matir me Baibul, ma i kine tye iye ngec matir i kom lok pa lunebi.—Daniel 12:4.

 Tic me tito kwena ma kwako wi lobo ducu. Yecu otito ni: “Lok man me kwena maber me Ker pa Lubanga gibitito i wi lobo ducu.”—Matayo 24:14.

 Lungala bibedo dwong. Yecu otito ni pol pa dano gibikwero lanyut ma moko ka maleng ni agikki me lobo man dong cok. (Matayo 24:37-39) Medo i kom meno, 2 Petero 3:3, 4 otito ni jo mogo gibingalo ni lanyut magi pe moko gin mo keken.

 Lok pa lunebi ducu bicobbe. Yecu otito ni i kare me agikki, lok pa lunebi magi ducu bicobbe lawangacel, pe ni manok nyo polle.—Matayo 24:33.

 Eyo. Jami ma tye ka timme i lobo, kacel ki cura ma jenge i lok me Baibul nyuto ni kare me agikki ocakke i 1914, mwaka ma Lweny me Acel me Wi Lobo ocakke iye. Me neno kit ma jami ma tye ka timme i lobo nyuto kwede ni watye ka kwo i kare me agikki, nen vidio man:

 I mwaka 1914, Ker pa Lubanga ocako loc i polo. I kin jami mukwongo ma Ker man otimo obedo me ryemo Catan Larac-ci ki jogine ki i polo dok kiketo lageng i komgi pe me dok i polo ento me bedo i lobo keken. (Niyabo 12:7-12) Tic pa Catan i kom dano nen ka maleng i kit maraco mapol ma dano gitye kwede i kare man me agikki, mumiyo ‘piny rac adada.’—2 Temceo 3:1.

 Dano mapol cwinygi tur i kare man ma kwo tek-ki. Gitye ki par ni dano dong pe gingeyo kit me bedo kacel. Jo mukene gilworo ni anyim pa dano pe.

 Ki tungcel, jo mukene ma cwinygi bene tye ka tur pi jami ma tye ka timme i lobo-ni, gitye ki gen pi anyim. Gipe ki akalakala mo ni cokcok-ki, Ker pa Lubanga bicobo pekki ducu ma i lobo-ni. (Daniel 2:44; Niyabo 21:3, 4) Gidiyo cwinygi kun gikuro Lubanga me cobo cikkene, dok ginongo cuko cwiny i lok pa Yecu ni: “Ngat ma biciro nio wa i agikki bilarre.”—Matayo 24:13; Mika 7:7.