Pe. Lobo pe kibibalone, pe kibiwangone, dok pe kibileyo kakare ki mukene. Baibul pwonyo ni Lubanga ocweyo lobo wek dano gubed iye matwal.

•   “Jo ma kitgi atir gibicamo lobo, dok gibibedo iye matwal.”—Jabuli 37:29.

•   ‘Lubanga oketo lobo ocung matek i kom gutine, ma pe biyenge wacel.’—Jabuli 104:5.

•   “Lobo bedo mere matwal.”—Latitlok 1:4.

•   “En yam pe oketo lobo ci oweko woko kun onyobbe atata, en oketo ni dano twero bedo iye.”—Icaya 45:18.

 Lubanga pe biye ni dano gubal lobo woko kwicikwici ki wolo kabedo murumowa, lweny, ki dong jami mukene. Ma ka meno, en ‘bityeko jo ma tye ka balo lobo.’ (Niyabo 11:18) En bitimo meno nining?

 Lubanga bileyo gamente pa dano, ma pe gubedo ki kero me gwoko lobo-ni, ki gamente me polo. (Daniel 2:44; Matayo 6:9, 10) Yecu Kricito, ma obedo Wod pa Lubanga, aye biloyo Ker meno. (Icaya 9:6, 7) I kare ma Yecu tye i lobo, en onyuto tekone i kom yamo kot. (Marako 4:35-41) Macalo Kabaka me Ker pa Lubanga, Yecu binyuto tekone i kom lobo ki dong jami calo yamo, kot, pii, ki mac. En biroco lobo wek obed calo poto me Eden.—Matayo 19:28; Luka 23:43.

 Pe pwonyo kumeno. Jo mogo gitamo ni lobo kibiwangone ki mac pi lok ma kicoyo i 2 Petero 3:7. Tyeng meno wacci: “Polo ki lobo me kare man dong gikano pi kuro mac.” Kong wanenu jami aryo ma romo konyowa me niang tyeng man:

1.   Baibul tiyo ki nyig lok ni “polo,” “lobo,” ki dong “mac” me lok i kom jami mapat pat. Me labolle, Acakki 11:1 waco ni: “Lobo ducu yam onongo tye ki leb acel.” Kakany, “lobo” tyen lokke ni dano.

2.   Lok murumo ka nget 2 Petero 3:7 konyowa me niang tyen lok me polo, lobo, ki dong mac ma kiloko iye i tyeng meno. I tyeng me 5 ki 6, kiloko i kom Pii Aluka ma ocorre i kare pa Nua. I kare meno, Pii Aluka otyeko “lobo” nyo jo ma lubwami, ento pe lobo man ma obedo pacowa-ni (Acakki 6:11) Pii Aluka bene otyeko “polo,” ma obedo luloc me kare meno. Ma nyutti, jo maraco aye kityekogi ento pe lobo man. Nua ki jo me ode gubwot ci gupongo lobo i nge Pii Aluka.—Acakki 8:15-18.

 Calo Pii Aluka, “mac” ma kiloko iye i 2 Petero 3:7 bikelo agikki pa jo maraco, ento pe Lobo man. Lubanga ociko pi “polo manyen ki lobo manyen ka ma kit ma atir bedo iye.” (2 Petero 3:13) “Polo manyen,” nyo gamente pa Lubanga, biloyo “lobo manyen,” nyo jo ma kitgi atir ma gibibedo i lobo. I te Ker meno, lobo bidoko paradic ma opong ki kuc.—Niyabo 21:1-4.