Lweny me Armagedon obedo lweny me agikki ma bibedo i kin gamente pa dano ki Lubanga. Gamente magi kacel ki jo ma cwakogi gijemo i kom Lubanga kadi wa i kare-ni pien gikwero mine i te locce. (Jabuli 2:2) Lweny me Armagedon bikelo agikki me loc pa dano.—Daniel 2:44.

 Lok man ni ‘Armagedon-ni’ kicoyo kicel keken i Baibul i Niyabo 16:16. Lok pa lanebi ma tye i Niyabo nyuto ni “i kabedo ma gilwongo i leb Ibru ni Armagedon,” “luker me wi lobo ducu” gibigure “kacel pi mony [lweny] i nino madit pa Lubanga Won Twer Ducu.”—Niyabo 16:14.

 Angagi ma gibilweny i Armagedon? Yecu Kricito bitelo wi mony me polo me loyo lweny i kom lumone pa Lubanga. (Niyabo 19:11-16, 19-21) Lumone magi kwako jo ma gijemo i kom twero pa Lubanga dok bene pe giwore.—Ejekiel 39:7.

 Tika lweny me Armagedon bitimme i Middle East? Ku. Lweny me Armagedon bitimme i wi lobo ducu, ento pe i kabedo acel keken.—Jeremia 25:32-34; Ejekiel 39:17-20.

 Armagedon, ma i kare mukene gonye ni “Har–Magedon” (i leb Ibru Har Meghiddohnʹ), te lokke ni “Got me Megido.” Megido con obedo boma mo i Icrael. Lok me tekwaro nyuto ni lweny ma pigi tego otimme cok ki Megido, kadi wa lweny mogo ma kitito pigi i Baibul. (Lungolkop 5:19, 20; 2 Luker 9:27; 23:29) Ento, Armagedon pe obedo kabedo mo macok ki Megido. Pe tye got mo madit kunnu, dok bene kabedo murumo ka ngete ma kilwongo ni jejreel tidi tutwal ma pe twero coko jo ducu ma gibilweny i kom Lubanga. Ma ka meno, i Armagedon, luloc me lobo-ni gibicokke kacel me lweny i kom gamente pa Lubanga.

 Piny-nye bibedo nining i kare me lweny me Armagedon? Kadi bed pe wangeyo kit ma Lubanga bitic kwede ki tekone, ento en bibedo ki jami lweny calo ma en otiyo kwede i kare macon—pee, oyengyeng, pii aluka, mac ki calfa, lut kot, ki dong two. (Yubu 38:22, 23; Ejekiel 38:19, 22; Kabakuk 3:10, 11; Jekaria 14:12) I kare meno ma wigi binywene woko, lumone pa Lubanga gibineke kekengi, ento gibiniang atir ka maleng ni Lubanga aye tye ka lweny i komgi.—Ejekiel 38:21, 23; Jekaria 14:13.

 Tika Armagedon bibedo agikki me lobo? Pe bibedo agikki me lobo man, kit macalo dano bibedo i lobo man matwal. (Jabuli 37:29; 96:10; Latitlok 1:4) Ma ka tyeko dano lumuku, lweny me Armagedon bilarogi aye, pien “lwak dano mapol ata” ma gubedo lutic pa Lubanga gibibwot.—Niyabo 7:9, 14; Jabuli 37:34.

 Mapat ki lobo man ma obedo pacowa-ni, i Baibul, nyig lok man ni ‘lobo-ni’ i kine mukene tyen lokke tye ni jo ma gijemo i kom Lubanga. (1 Jon 2:15-17) I yo ma kit man, Armagedon bikelo ‘agikki piny.’—Matayo 24:3.

 Lweny me Armagedon bitimme awene? I kare ma Yecu tye ka lok i kom “twon can madit atika” ma bigik ki lweny me Armagedon, en owacci: “Nino meno ki cawa meno, pe tye ngat mo ma ngeyo, kadi wa lumalaika ma i polo, kadi wa Wod, ento kono Lubanga Won keken aye ngeyo gire.” (Matayo 24:21, 36) Kadi bed kumeno, Baibul nyuto ni Armagedon bitimme i kare ma nongo Yecu tye ka loc i wi polo, dok man ocakke i mwaka 1914.—Matayo 24:37-39.