Ngɛ March 2020 ɔ, wa bua we wa nya ngɛ he kake hu kɛ pee kpehi akɛnɛ COVID-19 hiɔ ɔ ba a he je. Jeha nɛ ɔ, a maa pee ‘Moo To O Tsui Si’! Kpokpa Nɔ Kpe ɔ nɛ hiɛ pe 6,000 ngɛ gbihi nɛ a hiɛ pe 500 ngɛ je ɔ mi tsuo. May 12 kɛ ya si 14, 2023 ɔ ji kekleekle be nɛ a bɔni kpokpa nɔ kpehi nɛ wa buaa wa he nya kɛ peeɔ ɔ peemi ekohu.

Ngɛ nihi 1,800 kɛ se nɛ a ya kpokpa nɔ kpe nɛ a pee ngɛ Newburgh, ngɛ New York, U.S.A Kpe Peemi Asa a nɔ ɔ, a kpɛti nɔ kake ji nyɛmiyo Khrystine Torres. Nyɛmiyo nɛ ɔ de ke: “Benɛ sɛnɔhilɔ ɔ de ke: ‘Nyɛ hee’ ɔ, nihi tsuo nɛ a ngɛ tsu ɔ mi ɔ gbɔ a dɛ mi wawɛɛ. Nɔ fɛɛ nɔ bua jɔ kaa amlɔ nɛ ɔ lɛɛ a kpale ba kpe ekohu.” Nyɛminyumu Duane Smith, nɛ́ lɛ hu e ya kpe nɛ ɔ eko ɔ hu de ke: “Bɔ nɛ nihi a bua jɔ ngɛ lejɛ ɔ ha a ngɛ nyakpɛ wawɛɛ. O maa na bɔ nɛ nyɛmimɛ ɔmɛ a bua jɔ ha kaa a kpe ekohu.”

Nyɛmiyo Jessica Dolcemascolo, nɛ a baptisi lɛ benɛ COVID-19 hiɔ ɔ ba a, yɛ kpe nɛ wa buaa wa he nya kɛ peeɔ ɔ eko hyɛ. E de ngɛ e níhi a si kpami ɔ he ke: “Bua jɔmi kɛ suɔmi nɛ i ná benɛ i ya kpe nɛ ɔ, ngɛ kaa bɔ nɛ ke i na ye huɛ ko nɛ nyu bi ngɛ i kɛ lɛ wa kpɛti be kɛkɛɛ ɔ nɛ ma nu he ɔ.” Nyɛmiyo ko nɛ e ye jeha nyɔngma kɛ kpaanyɔ nɛ́ a tsɛɛ lɛ Noemi Tinajero, nɛ́ a baptisi lɛ ngɛ jeha nɛ ɔ sisi je ɔ de ke: “O maa na wekuhi kɛ huɛmɛ nɛ a bua jɔ. . . . E ngɛ kaa nɔ́ nɛ wa ngɛ je ehe ɔ mi.”

Nihi fuu tsɔɔ kaa a bua jɔ kpe ɔ munyuyi ɔ he wawɛɛ. Nyɛminyumu Sam Huh de ke: “Tsui si tomi ji su ko nɛ e he wa ha wa kpɛti nihi fuu kaa wa ma je kpo. E ji ga womi kpakpa nɛ wa nine su nɔ kaa e he hia nɛ waa kase Yehowa tsui si tomi nɛ se be ɔ.” Nyɛmiyo Frenchie Smith de ke: “Kpokpa nɔ kpe nɛ ɔ ha nɛ i na kaa tsui si tomi he hia mi ngɛ nɔ́ fɛɛ nɔ́ nɛ i peeɔ ngɛ ye si himi mi ɔ mi. Kpe ɔ blɔ nya tomi ɔ tsuo he ngɛ se nami wawɛɛ.”

Nihi tsuo nɛ a ná he blɔ kɛ ya kpokpa nɔ kpe ɔ kekleekle nɔ́ nɛ a pee ngɛ Newburgh, ngɛ New York ɔ ná he wami womi wawɛɛ! Waa kɛ nihi ayɔhi abɔ nɛ a ngɛ je kɛ wɛ ɔ ngɛ blɔ hyɛe kaa wa ma ná Baiblo mi tsɔsemi nɛ́ a to he blɔ nya nɛ ɔ he se ngɛ nyɔhiɔhi nɛ ma a mi.​—La 122:1.