Eliya nu kaa Matsɛ Ahab gbo. Moo po he foni nɛ o hyɛ bɔ nɛ gbalɔ nɛ e wa nɛ ɔ ngɛ e kpɛni bwɔmi he fiɛe, nɛ e ngɛ níhi nɛ matsɛ yiwutsotsɛ nɛ ɔ pee lɛ jeha komɛ nɛ be ɔ kaie ɔ. Eliya gblee níhi fuu a mi! Matsɛ Ahab kɛ Manyɛ Yezebel wo e he gbeye si abɔ, a tsɔ nihi kɛ nyɛɛ e se konɛ a ya nu lɛ, nɛ e piɛ nguɛ nya nɛ e wami je e dɛ. Benɛ Yezebel fã ke a gbe Yehowa gbali ɔmɛ ɔ, matsɛ ɔ tsi we e nya. Hɛ tsumi ha nɛ Ahab kɛ Yezebel pee kake kɛ wo nyumu anɔkualetsɛ ko nɛ a tsɛɛ lɛ ke Nabot he, nɛ a gbe e kɛ e binyumu ɔmɛ. Enɛ ɔ he ɔ, Eliya ngɔ kojomi sɛ gbi nɛ je Yehowa ngɔ kɛ ya ha Ahab. E tsɔɔ kaa a ma kpata Ahab kɛ e we ɔ tsuo hɛ mi. Mawu munyu ɔ ba mi. Ahab gbo kaa bɔ nɛ Yehowa de ɔ.​​—1 Matsɛmɛ 18:4; 21:1-26; 22:37, 38; 2 Matsɛmɛ 9:26.

Ngɛ lɔ ɔ tsuo se ɔ, Eliya le kaa e sa nɛ e ya nɔ nɛ e fĩ si ejakaa loloolo ɔ, Yezebel nɛ e ji yiwutsotsɛ ɔ ngɛ e weku ɔ kɛ ma a tsuo nɔ yee. Se Eliya kɛ si himi nɛ mi wa maa kpe. Jehanɛ hu ɔ, níhi babauu ngɛ nɛ e sa kaa e tsɔɔ Elisha nɛ ji nɔ nɛ ma ba ye e se ɔ. Enɛ ɔ he ɔ, nyɛ ha nɛ waa hyɛ níhi etɛ komɛ nɛ Eliya tsu loko e sɔmɔmi ní tsumi ɔ ba nyagbe. Wa ma susu bɔ nɛ e hemi kɛ yemi ɔ ye bua lɛ ha nɛ e nyɛ fĩ si ɔ he. Kɛkɛ ɔ, wa maa hyɛ nɔ́ nɛ wɔ hu wa ma nyɛ maa pee konɛ wa hemi kɛ yemi ɔ mi nɛ wa ngɛ je nɛ mi wa nɛ ɔ mi.

Benɛ Ahab kɛ Yezebel a binyumu Ahazia ba ngɛ nɔ yee ngɛ Israel ɔ, e kase we ní kɛ ji nɔ́ nɛ ba e fɔli ɔmɛ a nɔ ɔ mi. Mohu ɔ, e ya wo a nane. (1 Matsɛmɛ 22:52) Ahazia hu ja Baal kaa bɔ nɛ e fɔli ɔmɛ pee ɔ. Baal jami haa nɛ nihi peeɔ ní yayahi fuu. Kaa nɔ hyɛmi nɔ́ ɔ, bɔmi nami yaa nɔ ngɛ a jami he ɔmɛ, nɛ a kɛ a bimɛ sãa afɔle. Anɛ nɔ́ ko ma ha nɛ Ahazia nɛ tsake e juɛmi konɛ e ha nɛ e ma mi bi ɔmɛ nɛ a kpa yayami nɛ ɔmɛ peemi kɛ si Yehowa lo?

Tlukaa a, nɔ́ yobu ko ba matsɛ nɛ woɔ e he nɔ nɛ ɔ nɔ. E tsɔ́ kɛ je e hiɔwe tsu saflɛ mi kɛ ba nɔ si nɛ e plaa wawɛɛ nitsɛ. E ngɛ mi kaa e wami ya je oslaa mi mohu lɛɛ se e bi we yemi kɛ buami kɛ ji Yehowa ngɔ. Mohu ɔ, e tsɔ nihi kɛ ho Filisti bi ɔmɛ a ma nɛ a tsɛɛ ke Ekron ɔ ya konɛ a ya bi ní ngɛ Filisti bi ɔmɛ a mawu nɛ ji Baalzebub ɔ ngɔ ha lɛ kaa e yi ma ná wami lo. Nɔ́ nɛ e pee ɔ ngɔɛ Yehowa nya kulaa. Enɛ ɔ he ɔ, Yehowa tsɔ bɔfo ko kɛ ya Eliya ngɔ konɛ e ya kpale Ahazia tsɔli ɔmɛ. Gbalɔ ɔ ha nɛ a kpale konɛ a ngɔ sɛ gbi ko nɛ ngɛ hɛdɔ kɛ ya ha matsɛ ɔ. Nɔ́ nɛ Ahazia pee ɔ ngɛ hɛdɔ wawɛɛ. E pee e ní kaa nɔ́ nɛ Mawu ko be Israel. Enɛ ɔ he ɔ, Yehowa tsɔɔ kaa Ahazia yi be wami náe.​​—2 Matsɛmɛ 1:2-4.

Ahazia kplii e tsui, nɛ e bi tsɔli ɔmɛ ke: “Nyumu ɔ nɛ nyɛɛ kɛ lɛ kpe nɛ e de nyɛ ní nɛ ɔmɛ ɔ, kɛ e ngɛ kɛɛ?” Tsɔli ɔmɛ kale tade nɛ gbalɔ ɔ wo ɔ kɛ tsɔɔ lɛ. Kɛkɛ nɛ Ahazia de ke: “Lɛ ji Eliya.” (2 Matsɛmɛ 1:7, 8) Bɔ nɛ Eliya pee e si himi kpokploo nɛ e kɛ e juɛmi ma Yehowa ní tsumi ɔ nɔ ɔ ha nɛ e yi kulaa kaa a kɛ e he dlami ma yo lɛ. Se Ahazia kɛ e fɔli ɔmɛ lɛɛ a pee we a si himi kpokploo, a kɛ hɛkɔ bua he lo nya níhi fuu a nya kɛ ha a he. Eliya si himi ɔ kaiɔ wɔ ga womi nɛ Yesu kɛ ha wɔ kaa waa pee wa si himi kpokploo, nɛ waa ngɔ wa juɛmi kɛ ma níhi nɛ a he hia amɛ a nɔ ɔ.​​—Mateo 6:22-24.

Ahazia mi mi fu Eliya. Enɛ ɔ he ɔ, e tsɔ asafoatsɛ kake kɛ e ta buli 50 konɛ a ya nu Eliya kɛ ba. Benɛ a ya na Eliya nɛ “e hii si ngɛ yoku ko yi mi” ɔ, * asafoatsɛ ɔ fã Eliya ngɛ matsɛ ɔ biɛ mi ke, “kple si nɛ o ba.” Eko ɔ, munyu nɛ e kɛ tsu ní ɔ tsɔɔ kaa a maa ngɔ lɛ kɛ ho nɛ a ya gbe lɛ. Mo susu he nɛ o hyɛ! E ngɛ mi kaa ta buli ɔmɛ le kaa Eliya ji “Mawu nɔmlɔ” mohu lɛɛ, se a pee a juɛmi kaa a maa wo e he gbeye. Se a bua po! Eliya de asafoatsɛ ɔ ke: “Ke Mawu nɔmlɔ ji mi ɔ, lɛɛ la nɛ e je hiɔwe ba sã mo kɛ o we bihi nyingmi enuɔ ɔmɛ!” Kɛkɛ nɛ Mawu ha nɛ “la je hiɔwe ba sã asafoatsɛ ɔ kɛ e we bi nyingmi enuɔ ɔmɛ.” (2 Matsɛmɛ 1:9, 10) Nɔ́ nɛ ba ta buli nɛ ɔmɛ a nɔ ɔ tsɔɔ heii kaa ke nihi ngɛ Yehowa sɔmɔli yi mi wae aloo a bui mɛ ɔ, Yehowa be si hie nɛ e hi hyɛe.​—1 Kronika 16:21, 22.

Ahazia tsɔ asafoatsɛ kpa kɛ lɛ hu e we bi 50. Asafoatsɛ enyɔne ɔ lɛɛ e pa biɛ pe kekle nɔ ɔ. Eko ɔ, e na nihi 51 ɔ nɛ la a sã mɛ ɔ a la zu ngɛ yoku ɔ nɔ, se e kase we nɔ́ ko kɛ ji nɔ́ nɛ ba a nɔ ɔ mi. Jehanɛ hu ɔ, e de we Eliya ke “kple si nɛ o ba” kaa bɔ nɛ kekle asafoatsɛ ɔ pee ɔ kɛkɛ. Mohu ɔ, e de kɛ piɛɛ he ke “esɔ!” E biɛ wawɛɛ! Enɛ ɔ he ɔ, e kɛ e we bi ɔmɛ hu gbo kaa bɔ nɛ kekle ni ɔmɛ gbo ɔ. Matsɛ ɔ lɛɛ e pa biɛ pe mɛ tsuo. Nɔ́ nɛ ba a si we lɛ kpu. Mohu ɔ, e tsɔ ta buli a kuu etɛne. Bua jɔmi sane ji kaa asafoatsɛ etɛne ɔ kɛ nile tsu ní. E kɛ he si bami ya Eliya ngɔ, nɛ e kpa lɛ pɛɛ kaa e na e kɛ e we bi ɔmɛ mɔbɔ. Eliya je Yehowa mɔbɔ nami ɔ kpo kɛ tsɔɔ asafoatsɛ nɛ baa e he si nɛ ɔ. Yehowa bɔfo ɔ de Eliya kaa e kɛ ta buli ɔmɛ nɛ ya. Eliya kɛ mɛ ho kaa bɔ nɛ bɔfo ɔ de ɔ, nɛ e kɛ kojomi sɛ gbi ɔ ya ha matsɛ yiwutsotsɛ ɔ. Ahazia gbo kaa bɔ nɛ Mawu de ɔ. E ye ma a nɔ jeha enyɔ pɛ.​—2 Matsɛmɛ 1:11-17.

E ngɛ mi kaa nihi nɛ a kplii a tsui kɛ atuã tsɔli sɔuu nɛ Eliya kɛ mɛ hi si mohu lɛɛ, se mɛni ye bua lɛ nɛ e nyɛ nɛ e fĩ si? Sane bimi nɛ ɔ he hia wawɛɛ mwɔnɛ ɔ. Eko ɔ, o na kaa nɔ ko wo blɔ yaya ko, nɛ akɛnɛ o susuɔ e he wawɛɛ he je ɔ, o bɔ mɔde kaa o maa wo lɛ ga, se e kua, nɛ enɛ ɔ hao mo wawɛɛ. Ke e ba jã a, mɛni maa ye bua mo konɛ o nyɛ nɛ o fĩ si? Wa ma nyɛ maa kase nɔ́ ko kɛ je ‘yoku ɔ yi mi’ he nɛ ta buli ɔmɛ ya na Eliya ngɛ ɔ. Baiblo ɔ tsɔɔ we nɔ́ tutuutu he je nɛ Eliya ya yoku ɔ yi mi ɔ, se eko ɔ, akɛnɛ lejɛ ɔ ngɛ dii nɛ Eliya kɛ sɔlemi fiɛ we he je ɔ, e na kaa e ma nyɛ maa hi lejɛ ɔ kɛ sɔle konɛ e hɛ lɛ kɛ su Mawu he. (Yakobo 5:16-18) Wɔ hu wa ma nyɛ maa to be kɛ ha sɔlemi konɛ waa kɛ Mawu nɛ pɔ ní sɛɛmi. Wa ma nyɛ ma tsɛ e biɛ nɛ waa ngɔ wa nyagba amɛ kɛ wa haomi ɔmɛ kɛ fɔ e hɛ mi. Ke nihi nɛ a bɔle wɔ ɔ peeɔ ní yayahi po ɔ, sɔlemi ma nyɛ maa ye bua wɔ nɛ wa fĩ si.

Benɛ be ba su nɛ Eliya maa ngɔ e ní tsumi ɔ kɛ ha nɔ kpa a, mɛni e pee? Benɛ e kɛ Elisha ngɛ Gilgal ma a mi jee ɔ, Eliya de Elisha ke e mlɛ ngɛ lejɛ ɔ konɛ lɛ Eliya nɔ kake too nɛ tsa nɔ maa pee kilomita 11 kɛ ya Betel. Elisha de lɛ ke: ‘Be abɔ nɛ Yehowa ngɛ nɛ mo hu o ngɛ nɛ ɔ, i be mo sie.’ Benɛ a ya su Betel ɔ, Eliya kpale de Elisha kaa e mlɛ nɛ lɛ nɔ kake too nɛ tsa nɔ kɛ ya Yeriko, maa pee kilomita 22 blɔ hiami. Elisha kplɛɛ we kaa kekle ɔ nɔuu. Benɛ a su Yeriko ɔ, Eliya kpale de Elisha si etɛne kaa e mlɛ nɛ lɛ nɔ kake too nɛ tsa nɔ kɛ ya Yordan Pa a nya. Kɛ je Yeriko kɛ ya Yordan Pa a nya maa su kilomita 8. Se loloolo ɔ, Elisha kplɛɛ we. E sume nɛ e kpale ngɛ Eliya se!​—2 Matsɛmɛ 2:1-6.

Elisha je su ko nɛ he hia wawɛɛ kpo. Lɔ ɔ ji suɔmi nɛ se pui gblegbleegble. Suɔmi nɛ ɔ nɛ Rut je kpo kɛ tsɔɔ Naomi ɔ nɛ. Suɔmi nɛ ɔ haa nɛ nɔ mɛtɛɔ e nyɛmi he nɛ e yeɔ lɛ anɔkuale be fɛɛ be, nɛ ke a ngɛ lɛ kpɔe po ɔ, e kpɔ we. (Rut 1:15, 16) Amlɔ nɛ ɔ ji be nɛ Yehowa sɔmɔli hia su nɛ ɔ wawɛɛ. Anɛ o na bɔ nɛ su nɛ ɔ he hia ha kaa bɔ nɛ Elisha na a lo?

Hyɛ bɔ nɛ suɔmi nɛ se pui nɛ Elisha je kpo ɔ maa ta Eliya tsui he ha. Su nɛ ɔ nɛ Elisha je kpo ɔ ha nɛ e na nyagbe nyakpɛ nɔ́ nɛ Eliya pee ɔ. E ngɛ mi kaa Yordan Pa a mi kuɔ nɛ e beɔ wawɛɛ mohu lɛɛ, se benɛ a su pa a nya a, Eliya ngɔ e tade ɔ kɛ fia nyu ɔ mi, nɛ nyu ɔ mi gba hiɛ kɛ hiɛ. “Gbali a kuu ɔ mi nihi nyingmi enuɔ” hu na nyakpɛ nɔ́ nɛ ɔ. E ma nyɛ maa ba kaa a piɛɛ nihi nɛ a ngɛ mɛ tsɔsee konɛ a nyɛɛ Mawu we bi a hɛ mi ɔ a he. (2 Matsɛmɛ 2:7, 8) Eko ɔ, Eliya nɛ hyɛɛ blɔ nya tomi nɛ a kɛ tsɔseɔ mɛ ɔ nɔ. Be ko nɛ be ɔ, jinɛ Eliya susu kaa lɛ pɛ ji Mawu sɔmɔlɔ anɔkualetsɛ nɛ piɛ ngɛ Israel. Yehowa jɔɔ Eliya ngɛ si nɛ e fĩ ɔ he je, nɛ e ha nɛ e hi je mi, nɛ e na bɔ nɛ Yehowa sɔmɔli ya a hɛ mi ha.​—1 Matsɛmɛ 19:10.

Benɛ a po Yordan Pa a ta a, Eliya de Elisha ke: “Mɛni o suɔ nɛ ma pee ha mo loko a ba ngɔ mi kɛ je o he?” Eliya na kaa e be kɛe nɛ e maa je Elisha he, se e dɔɛ lɛ kaa Elisha ma ná he blɔhi, nɛ e ma he biɛ kaa gbalɔ. Mohu ɔ, Eliya suɔ kaa e maa pee nɔ́ fɛɛ nɔ́ nɛ e ma nyɛ kɛ ye bua e huɛ ɔ. Elisha bi nɔ́ kake ko pɛ. E de ke: “I kpa mo pɛɛ, ha mi o mumi he wami ɔ totoe enyɔ.” (2 Matsɛmɛ 2:9) Pi nɛ e ngɛ bie kaa a ha lɛ mumi klɔuklɔu nɛ Eliya ná a totoe enyɔ, mohu ɔ, nɔ́ nɛ e bi ɔ ngɛ kaa gbosi ní nɛ a haa bitɛte. Ngɛ mlaa nya a, e sa nɛ a ha bitɛte gbosi ní nɛ kle pe kulaa aloo totoe enyɔ akɛnɛ lɛ nɛ e ma ba pee weku ɔ yi ɔ he je. (5 Mose 21:17) Akɛnɛ lɛ nɛ e ma ba ye Eliya se he je ɔ, e ngɛ heii kaa e suɔ nɛ e ná kã nɛ Eliya ná a eko konɛ e nyɛ nɛ e kɛ tsu ní ɔ.

Se Eliya si lɔ ɔ kɛ ha Yehowa. Ke Yehowa ma Eliya ngɔmi kɛ je nɛ Yehowa ha nɛ Elisha na nɔ́ nɛ ɔ, lɛɛ e tsɔɔ kaa Mawu ma ha Elisha nɔ́ nɛ e bi ɔ. Lɔ ɔ se pɛ ɔ, benɛ huɛmɛ enyɔ nɛ ɔmɛ ngɛ nyɛɛe nɛ “a ngɛ ní sɛɛe kɛ yaa a,” nyakpɛ nɔ́ ko ba!​—2 Matsɛmɛ 2:10, 11.

A na la ko nɛ kpɛ ngɛ hiɔwe nɛ e ngɛ a he sue bɔɔbɔɔbɔɔ. Moo po he foni nɛ o hyɛ, si kake too ɔ, a na nɔ́ ko nɛ ngɛ kpɛe wawɛɛ nɛ ngɛ fo tue kɛ ma a ngɔ, nɛ kɔɔhiɔ nɛ nya wa ngɛ fiae nɛ e ngɛ pɛe wawɛɛ. Kɔɔhiɔ nɛ nya wa a ha nɛ a gbee senyasenya, nɛ a mi gba, nɛ a nya kpɛ a he. Nɔ́ nɛ a na a ji ta zugba lɛ ko nɛ ngɛ tsoe kaa la. Enɛ ɔ ha nɛ Eliya na kaa e be ɔ su. Anɛ e kuɔ ta zugba lɛ ɔ lo? Baiblo ɔ de we. Bɔ fɛɛ bɔ nɛ e ba ha a, benɛ lasiogblee ɔ gba a kpɛti ɔ, Eliya na kaa nɔ́ ko sa lɛ kɛ ho kɔɔhiɔ mi ya!

Benɛ Elisha ngɛ nɔ́ nɛ ngɛ nɔ yae ɔ hyɛe ɔ, e nya kpɛ e he. Akɛnɛ e na nyakpɛ nɔ́ nɛ ɔ he je ɔ, e le kaa kokooko ɔ, Yehowa ma ha lɛ mumi nɛ ha nɛ Eliya ná kã a “totoe enyɔ.” Se kɛ̃ ɔ, Elisha bua jɔɛ. Mɛni he je? Ejakaa e li he nɛ e huɛ nɛ e suɔ lɛ ɔ yaa, nɛ e li kaa e maa na lɛ ekohu lo. Enɛ ɔ ha nɛ e hao. E kpa ngmlaa ke: “Tsaatsɛ! Tsaatsɛ! Israel ta zugba lɛhi kɛ a we okpɔngɔ ta buli!” E hyɛ mɛ too kɛ ya si benɛ e tsɔɔlɔ ɔ yi kuɛ se mi laa; kɛkɛ nɛ Elisha kɛ aywilɛho gba e tade ɔ mi.​—2 Matsɛmɛ 2:12.

Benɛ Eliya yaa ngɛ kɔɔhiɔ mi ɔ, anɛ e nu nɛ e huɛ ɔ kɛ aywilɛho yemi kpa ngmlaa wawɛɛ, nɛ eko ɔ, vo nyu kake loo enyɔ ko je e hɛ ngmɛ mi lo? Bɔ nɛ e ji ha fɛɛ ko ɔ, Eliya le kaa e huɛ ɔ ye bua lɛ nɛ e nyɛ fĩ si ngɛ kahi a mi. E sa nɛ waa kase Eliya konɛ waa kɛ nihi nɛ a suɔ Yehowa nɛ a peeɔ e suɔmi nya ní ɔ nɛ bɔ!

Jije lasiogblee ɔ ba ngɔ Eliya kɛ ho? Jami komɛ tsɔɔ kaa a ngɔ lɛ kɛ ho Mawu ngɔ ya. Se e be nyɛe maa ba jã. Jeha komɛ a se benɛ Yesu Kristo je hiɔwe kɛ ba zugba a nɔ ɔ, e tsɔɔ kaa nɔmlɔ ko kuɛ kɛ yɛ hiɔwe hyɛ. (Yohane 3:13) Enɛ ɔ he ɔ, ke wa kane kaa “lasiogblee sá Eliya kɛ ho hiɔwe ya” a, e sa nɛ wa bi wa he ke, Mɛni ngmami ɔ ngɛ hlae maa tsɔɔ? (2 Matsɛmɛ 2:11) Be komɛ ɔ, ke a kɛ munyungu nɛ ji “hiɔwe” tsu ní ngɛ Baiblo ɔ mi ɔ, e tsɔɔ kɔɔhiɔ mi he nɛ bɔku ɔmɛ kɛ lohwe pɛlitsɛmɛ bee ɔ ngɛ ɔ, se pi he nɛ Yehowa ngɛ ɔ pɛ. (La 147:8) Hiɔwe nɛ ji kɔɔhiɔ mi nɛ Baiblo ɔ ngɛ tsɔɔe kaa a sa Eliya kɛ ho ɔ nɛ. Lɔ ɔ se ɔ, mɛni ba?

Yehowa ha gbalɔ nɛ e suɔ e sane nɛ ɔ ní tsumi ehe ngɛ ma kpa nɔ. Ma nɛ ɔ ngɛ Yuda nɔ yemi ɔ mi. Maa pee jeha kpaago se ɔ, Ngmami ɔ tsɔɔ kaa Eliya hi ma nɛ ɔ mi kɛ tsu ní. Jamɛ a be ɔ mi ɔ, Matsɛ Yehoram yiwutsotsɛ ɔ nɛ ngɛ Yuda nɔ yee. E ngɔ Ahab kɛ Yezebel a biyo, enɛ ɔ he ɔ, a kpa we ní yayamihi peemi ngɛ ma a mi. Yehowa fã Eliya kaa e ngma kojomi sɛ gbi ko kɛ ya ha Yehoram. Kaa bɔ nɛ a tsɔɔ ɔ, Yehoram nu hiɔ gbeyegbeye ko nɛ e gbo. Nɔ́ nɛ pa puɛ sane ɔ kulaa ji kaa “benɛ e gbo ɔ, nɔ ko nɔ ko yi lɛ kɔmɔ.”​—2 Kronika 21:12-20.

Bɔ nɛ matsɛ yiwutsotsɛ nɛ ɔ nyagbe pee ha a ngɛ ekpa kulaa ngɛ Eliya nɔ́ ɔ he! Wa li be nɛ Eliya gbo kɛ bɔ nɛ e plɛ kɛ gbo ha mohu lɛɛ, se wa le kaa e gbo we kaa bɔ nɛ Yehoram gbo nɛ nɔ ko yi lɛ kɔmɔ ɔ. Elisha hɛ ja ngɛ e huɛ Eliya he, nɛ jã nɔuu nɛ gbali kpa amɛ hu a hɛ ma ja ngɛ e he. Maa pee jeha 1,000 se benɛ Yesu nɔmlɔ tso su tsake ɔ, Yehowa kɛ Eliya tsu ní ngɛ nina a mi kɛ tsɔɔ kaa loloolo ɔ, e bua jɔ e he. (Mateo 17:1-9) Anɛ o be suɔe nɛ o kase Eliya konɛ o ná hemi kɛ yemi nɛ mi wa nɛ o kɛ maa da kahi a nya lo? O hɛ ko je nɔ kaa e he hia nɛ o kɛ nihi nɛ a suɔ Mawu nɛ bɔ, konɛ lɔ ɔ nɛ ye bua mo nɛ o ngɔ o juɛmi kɛ ma Yehowa jami nɔ, nɛ o sɔle be fɛɛ be kɛ je o tsui mi. Ha nɛ o ní peepee nɛ ha nɛ Yehowa bua nɛ jɔ o he daa kaa Eliya!