Ke o ka kaa o kɛ nɔ́ ko maa fia anunu ɔ, eko ɔ, o maa na kaa e be gbɔjɔɔ kulaa. Akɛnɛ a he sɔɔ wawɛɛ he je ɔ, a numi yee.

 Je mi si kpali na kaa anunu komɛ nɛ a pɔɔ mɛ nami ngɛ tso yiblii nɔ ɔ poɔ a he kaa bɔ nɛ ɛlopleehi nɛ a kɛ yaa ta poɔ a he ɔ. Anunu nɛ ɔmɛ nyɛɔ nɛ a poɔ a he nɛ e sui tsuifia kake po. Ní lelɔ ko nɛ a tsɛɛ lɛ ke Michael Dickinson tsɔɔ kaa ke a fɔ anunu nɛ ɔmɛ nɔuu po ɔ, “a nyɛɔ teɔ kaa ngua amɛ. E ngɛ kaa nɔ́ nɛ a ngɔ bimwɔyo nɛ a fɔ lɛ nɔuu kɛ wo ta yami ɛloplee ko mi nɛ bimwɔyo ɔ nyɛ ngɛ ɛloplee ɔ kudɔe.”

 Níhi a mi hlali po anunu nɛ ɔmɛ video nɛ a hyɛ bɔ nɛ a teɔ ha. A yɔse kaa ke a ngɛ tee ɔ, a fiaa a pɛli ɔmɛ maa pee si 200 ngɛ tsuifia kake mi. Se kɛ̃ ɔ, ke a na oslaa ko ɔ, a ma nyɛ maa fia a pɛli si kake pɛ kɛ po a he.

 Lohwe nɛ ɔmɛ a he sɔɔ wawɛɛ. Níhi a mi hlali tsɔɔ kaa ke a na kaa oslaa ko ma a, a kɛ he sɔmi ma nyɛ maa yu a he kaa tsuifia kake nɛ a gba mi 50. Dickinson tsɔɔ nya kaa “ngɛ jamɛ a be kpiti ɔ mi ɔ, a ma nyɛ maa bu akɔtaa nɛ a na he nɛ oslaa a je kɛ ma kɛ he nɛ e sa nɛ a te kɛ gu konɛ oslaa a ko ná mɛ.”

 Níhi a mi hlali ngɛ mɔde bɔe kaa a maa nu bɔ nɛ lohwe nɛ ɔ kalegbɔ nyafii ɔ haa nɛ e nyɛɔ peeɔ ní nɛ ɔmɛ ɔ sisi, se a nɛ nya.

 Kɛ o susu kɛɛ? Anɛ níhi nɛ anunu nɛ ɔ nyɛɔ peeɔ ba kɛkɛ lo? Aloo nɔ ko lɛ to he blɔ nya?