•  Nɔ́ nɛ e sa nɛ o le

•  Nɔ́ nɛ o ma nyɛ maa pee

•  Nɔ́ nɛ o juami bi de

 Loko o fɔli ɔmɛ ma he mo ye ɔ, e daa si ngɛ o we anɔkuale yemi nɔ. Tue bumi nɛ o maa pee kɛ ha o fɔli ɔmɛ ɔ ngɛ kaa hiɔ ko nɛ o ngɛ woe. O hɛɛ o fɔli ɔmɛ hiɔ. Nɛ lɔ ɔ ji tue bumi nɛ o maa pee kɛ ha mɛ. Ke o nyɛɔ nɛ o woɔ mɛ hiɔ nɛ ɔ, jã nɔuu kɛ̃ nɛ mɛ hu a ma ha mo he yemi fuu. Se ke o yí anɔkuale nɛ a nyɛ we nɛ a he mo ye ɔ, lɛɛ e ko pee mo nyakpɛ kaa a be mo he yemi fuu hae.

 E ma he be loko o fɔli ma he mo ye. E sa nɛ o bɔ mɔde nɛ o ha nɛ o ní peepee nɛ tsɔɔ kaa o hɛ ka si. Ke o pee jã a, o fɔli ɔmɛ ma ha mo he yemi fuu.

 SANE KO NƐ YA NƆ NITSƐ: “Benɛ i ji niheyo ɔ, i le nɔ́ tutuutu nɛ ye fɔli ɔmɛ suɔ kaa ma pee, lɔ ɔ he ɔ, i bua peeɔ jamɛ a ní ɔmɛ, se i peeɔ nɔ́ nɛ imi nitsɛ i suɔ ngɛ laami mi. Enɛ ɔ ha nɛ e ye ha ye fɔli ɔmɛ kaa a ma he mi ye. Be bɔɔ se ɔ, i ba yɔse kaa loko o ma ná he yemi ɔ, ja o yeɔ anɔkuale. Ke o yi anɔkuale ɔ, a be nyɛe ma he mo ye.”​—Craig.

 Moo tu anɔkuale, ke jã peemi he wa po. Nɔ fɛɛ nɔ tɔ̃ɔ, se ke o yeɔ lakpa kɛ laa o tɔmihi a nɔ (aloo o tui anɔkuale ɔ fitsofitso) ɔ, lɔ ɔ ma ha nɛ o fɔli ɔmɛ be mo hee ye hu. Se ke ji kaa a le mo kaa o ji nɔ ko nɛ tuɔ anɔkuale ɔ, o fɔli ɔmɛ ma na kaa o wa, nɛ o ma nyɛ ma tsu o nyagbahi a he ní. E be yee kaa a ma he nɔ ko kaa kikɛ nɛ ɔ maa ye.

 “Ke o kplɛɛ o tɔmihi a nɔ be fɛɛ be ɔ, a ma he mo maa ye, se ke o bɔɔ mɔde kaa o maa laa o tɔmihi a nɔ daa nɛ ɔ, nɔ ko be mo hee ye.”​—Anna.

 Baiblo ɔ de ke: “Wa suɔ kaa wa maa ba wa je mi ngɛ anɔkuale yemi mi ngɛ nɔ́ fɛɛ nɔ́ mi.”​—Hebri Bi 13:18.

•   Mo susu he nɛ o hyɛ: Ke o fɔli ɔmɛ bi mo ke jije o yaa nɛ mɛni o yaa pee ɔ, anɛ o deɔ mɛ anɔkuale ɔ tsuo lo? Aloo ke a bi mo ke jije o je nɛ mɛni o ya pee ɔ, o ngɔɔ ní komɛ kɛ laa mɛ lo?

 Tsu o blɔ nya ní tsumihi. Bu mlaahi tsuo nɛ o fɔli ɔmɛ wo mo ɔ tue. Tsu o we mi ní tsumihi oya nɔuu. Ke a to be kɛ ha mo ɔ, ye nɔ pɛpɛɛpɛ. Bɔɔ mɔde nɛ mo nitsɛ o tsu sukuu ní tsumihi nɛ a ha mo ɔ. Ke o fɔli ha mo be nɛ e sa kaa o kɛ ba su we mi ɔ, ye nɔ.

 “Ke o fɔli ngmɛ mo blɔ kaa o kɛ o huɛmɛ nɛ je kpo nɛ o kpale kɛ ba we mi gbɔkuɛ ngmlɛ 9:00 nɛ o ba ngmlɛ 10:30 a, ko susu kaa be kpa a, a maa ngmɛ mo blɔ nɛ o kɛ o huɛmɛ nɛ je kpo ekohu!”​—Ryan.

 Baiblo ɔ de ke: “Nɔ fɛɛ nɔ ma tsu lɛ nitsɛ e blɔ nya ní tsumi.”​—Galatia Bi 6:5, sisi ningma.

•   Mo susu he nɛ o hyɛ: Anɛ o fɔli le mo kaa nɔ ko nɛ yeɔ be nɔ, o tsuɔ we mi ní tsumihi a he ní ngɛ be nya, nɛ o buɔ mlaahi tsuo nɛ a wo mo ɔ tue, ke o bua jɔɛ ekomɛ a he po lo?

 Moo to o tsui si. Ke o tɔ̃ mlaa ko nɛ o fɔli wo mo ɔ nɔ hyɛ ɔ, e ma he be loko a ma he mo ye ekohu. Bɔɔ mɔde nɛ o to o tsui si.

 “Benɛ i wa kɛ su he ko ɔ, i pee basaa benɛ ye fɔli ɔmɛ sume kaa a kɛ blɔ nya ní tsumihi fuu maa wo ye dɛ ɔ. I ba yɔse kaa pi jeha abɔ nɛ nɔ ko ye ɔ nɛ tsɔɔ kaa e hɛ ka si. Enɛ ɔ he ɔ, i bi ye fɔli ɔmɛ níhi nɛ ma nyɛ ma pee konɛ a he mi ye. E he be, se i ye manye. Nɛ i ba na kaa pi jeha nɛ nɔ ko ye nɛ ma ha nɛ a he lɛ ye, mohu ɔ, e ní peepee.”​​—Rachel.

 Baiblo ɔ de ke: “Nyɛɛ ya nɔ nɛ nyɛɛ hi nyɛ mi kpae konɛ nyɛ kɛ tsɔɔ nimli nɛ nyɛ nitsɛmɛ nyɛ ji.”​—2 Korinto Bi 13:5.

•   Mo susu he nɛ o hyɛ: Mɛni ji ní komɛ nɛ o ma nyɛ maa pee konɛ o fɔli ɔmɛ nɛ a he mo ye?

 GA WOMI: Ngɔɔ kɛ pee oti kaa o maa ye o be nɔ, o maa tsu o we mi ní tsumihi, o maa ye be nɛ a to mo ɔ nɔ, aloo nɔ́ kpa ko. Ha nɛ o fɔli ɔmɛ nɛ a le o yi mi kpɔ mwɔmihi, nɛ o bi mɛ nɛ a de mo níhi nɛ a suɔ kaa o pee konɛ a he mo ye. Lɔ ɔ se ɔ, bɔɔ mɔde nɛ o kɛ Baiblo mi ga womi nɛ ɔ nɛ tsu ní: ‘Je su momo ɔ nɛ kɛ o blema je mi bami ɔ kɔ ɔ kɛ fɔ he.’ (Efeso Bi 4:22) Ngɛ be nɛ sa mi ɔ, o fɔli ɔmɛ maa yɔse o mɔde bɔmi ɔ!