Jehahi babauu ji nɛ ɔ nɛ nihi tuɔ munyu kɛ siɔ Yehowa Odasefohi kaa a ngɔɛ muɔ ngɛ hiɔ tsami mi. Behi fuu ɔ, dɔkitahi kɛ Yehowa Odasefohi kpa we gbi ngɛ ngmami nɛ tsɔɔ kaa ‘waa yu wa he ngɛ muɔ he’ nɛ a kɛ tsuɔ ní ɔ he, ejakaa dɔkita amɛ susu kaa nɔ́ nɛ a le ɔ maa ye bua hiɔtsɛ ɔ mohu.​—⁠Bɔfo Ɔmɛ A Ní Tsumi 15:29.

Se lingmi nɛ ɔ, dɔkitahi nɛ a se kɛ ngɛ ní tsumi ɔ mi ɔ deɔ kaa odase fuu ngɛ nɛ tsɔɔ kaa hiɔ tsami blɔ nɔ tomi kpakpahi ngɛ nɛ hi pe muɔ nɛ a kɛ haa hiɔtsɛmɛ ɔ.

Ngɛ April 2013 ɔ mi ɔ, Stanford University School of Medicine ɔ ngma munyu ko ngɛ a womi tɛtlɛɛ ko nɛ ji Stanford Medicine ɔ mi. Munyu ɔ yi ji “Against the Flow​—What’s Behind the Decline in Blood Transfusions?” (Mɛni He Je Nɛ Nihi Sume Nɛ A Ngɔ Muɔ Hu ɔ?) Sarah C. P. Williams nɛ ngma jamɛ a munyu ɔ de ke: “Níhi a mi hlami nɛ a pee ngɛ hiɔ tsami hehi babauu ngɛ je ɔ mi ɔ tsɔɔ kaa, ngɛ jeha nyɔngma nɛ be ɔ mi ɔ, dɔkitahi haa hiɔtsɛmɛ muɔ, nɛ a haa mɛ fuu be mi nɛ e he hia we kaa a ha mɛ.”

Sarah Williams tsɛ munyu ko nɛ Patricia Ford tu ɔ se. Patricia Ford lɛ hyɛɛ hiɔ tsami nɛ a kɛ muɔ tsu we ní ngɛ mi, kɛ operation peemi nɔ ngɛ Pennsylvania hiɔ tsami he ɔ.

Dr. Ford de ke: “A tsɔɔ dɔkitahi ngɛ sukuu kaa ke nɔ ko muɔ nɔ gbɔ kɛ su he ko nɛ a ha we lɛ muɔ ɔ, nɔ ɔ ma gbo. Munyu nɛ ɔ ji anɔkuale ngɛ si fɔfɔɛ pɔtɛɛ komɛ a mi, * se ngɛ hiɔtsɛmɛ fuu a blɔ fa mi ɔ, tsa pi anɔkuale kaa ke a ha we mɛ muɔ ɔ, a ma gbo.”

Dr. Ford nɛ e tsaa Yehowa Odasefohi maa pee 700 daa jeha a de ke: “Dɔkitahi fuu nɛ i kɛ mɛ sɛɛ ní ɔ hɛɛ susumi kaa hiɔtsɛmɛ babauu ngɛ nɛ ke a ha we mɛ muɔ ɔ, a ma gbo. Be ko nɛ be ɔ, jinɛ imi hu i susu jã. Se i ba na kaa, ní tsɔwitsɔwi komɛ ngɛ nɛ wa ma nyɛ maa pee kɛ ye bua hiɔtsɛmɛ nɛ e he be hiae kaa wa ha mɛ muɔ.”

Dɔkitahi a kuu ko ngɔ jeha 28 kɛ hla níhi a mi ngɛ nihi nɛ a ngɛ tsui hiɔ nɛ a pee mɛ operation ɔ a he. Ngɛ August 2012 mi ɔ, a ngma nɔ́ nɛ a na a ngɛ womi tɛtlɛɛ ko nɛ ji Archives of Internal Medicine ɔ mi kaa Yehowa Odasefohi nɛ a piɛɛ hiɔtsɛmɛ nɛ ɔmɛ a he ɔ ná he wami pe nihi nɛ a ha mɛ muɔ ɔ. Odasefo ɔmɛ a kpɛti nihi fuu se kɛ we ngɛ hiɔ tsami he ɔ, a ná he wami mla, nɛ a kpɛti nihi fuu hi si jeha 20 kɛ se.

Ngɛ April 8, 2013 ɔ, munyu ko nɛ je kpo ngɛ The Wall Street womi tɛtlɛɛ ɔ mi ɔ de ke: “Jehahi babauu nɛ be ɔ, a pee hiɔtsɛmɛ nɛ a jami ngmɛ́ mɛ blɔ kaa a ngɔ muɔ ɔ operation, nɛ a ha we mɛ muɔ. Amlɔ nɛ ɔ, hiɔ tsami hehi fuu kplɛɛ hiɔ tsami blɔ nɔ tomi ehe nɛ ɔ nɔ . . . Dɔkitahi nɛ a bua jɔ hiɔ tsami nɛ a kɛ muɔ tsu we ní ngɛ mi he ɔ tsɔɔ kaa hiɔ tsami blɔ nɔ tomi nɛ ɔ bɔ we hiɔ kulaa, ejakaa a puɛ we sika kɛ he muɔ, a puɛ we sika nɛ a ngɔ muɔ ɔ kɛ to, nɛ a puɛ we sika nɛ a ngɔ klamahi kɛ hyɛ muɔ ɔ mi loko a ngɔ kɛ ha hiɔtsɛmɛ. Jehanɛ hu ɔ, hiɔtsɛmɛ ná we nyagbahi tsɔ nɛ ma ha nɛ a se maa kɛ ngɛ hiɔ tsami he ɔ.”

E be nyakpɛ kaa dɔkita ko nɛ a tsɛɛ lɛ ke Robert Lorenz nɛ e hyɛɛ muɔ nɛ a kɛ tsuɔ ní ngɛ Cleveland hiɔ tsami he ɔ nɔ ɔ de ke: “Sisije ɔ, e maa pee mo kaa ke o ha hiɔtsɛ ɔ muɔ ɔ, e maa ye bua lɛ, se odase tsɔɔ kaa nyagbenyagbe ɔ, e maa ye lɛ awi.”