NÍHI NƐ MAA YE BUA WEKUHI
Bɔ Nɛ O Ma Nyɛ Maa Ye Abofu Nɔ Ha
Eko ɔ, o yo ɔ aloo o huno ɔ de nɔ́ ko, aloo e pee nɔ́ ko nɛ o bua jɔɛ he, nɛ o ngɔ e he abofu kɛ wo o mi. Se e na kaa nɔ́ ko ngɛ o nya gbae, lɔ ɔ he ɔ, e bɔni mo he sane bimi. Sanehi nɛ e ngɛ mo bie ɔ po ha nɛ o mi mi pa fu wawɛɛ. Mɛni o ma nyɛ maa pee konɛ o ye abofu nɔ ngɛ si fɔfɔɛhi kaa jã mi?
Nɔ́ nɛ e sa nɛ o le
Abofu ma nyɛ maa wo mo hiɔ. Níhi a mi hlami tsɔɔ kaa e yi kulaa kaa nihi nɛ a mi mi fuɔ mlamlaamla a ma ná tsui hiɔ, mi mi hiɔ kɛ ekpahi. Nihi nɛ a tsui gbaa a nya a nyɛ we mahe hwɔmi, a náa he womi nɔ hiɔhi kɛ stroke. Enɛ ɔ he ɔ, Baiblo ɔ de ke: “O mi mi ko fu hu . . . , ejakaa e ma nyɛ maa ye mo awi.”—La 37:8, NW, sisi ningma.
Ke o ngɔ abofu kɛ wo o mi ɔ, e ma nyɛ maa ye mo awi. Ke o ngɔ abofu kɛ wo o mi ɔ, e ma ba pee kaa hiɔ ko nɛ e ngɛ níhi puɛe ngɛ o mi. Kaa nɔ hyɛmi nɔ́ ɔ, e ma nyɛ ma ha nɛ o tu nihi a he munyu nyanyaanya, aloo e ma nyɛ ma ha nɛ o tu he fɛu yemi munyuhi. Ke o ngɛ jã a, e maa ye ha ni kpahi kaa a kɛ mo maa hi si, nɛ e ma nyɛ maa ngɔ nyagbahi kɛ ba o gba si himi ɔ mi.
Nɔ́ nɛ o ma nyɛ maa pee
Mo hla ní kpakpahi mohu ngɛ o yo ɔ loo o huno ɔ he. Ngmaa níhi etɛ nɛ o yo ɔ loo huno ɔ peeɔ nɛ o bua jɔ he. Kɛkɛ ɔ, be fɛɛ be ko nɛ o mi mi ma fu lɛ ɔ, mo susu su kpakpahi nɛ o na ngɛ e he ɔ a he. Enɛ ɔ ma nyɛ maa ye bua mo konɛ o ye abofu ɔ nɔ.
Baiblo sisi tomi mlaa: “Nyɛɛ pee nyɛ he nihi nɛ a le sina.”—Kolose Bi 3:15.
Moo kase bɔ nɛ a kɛ yayami paa ha. Kekleekle ɔ, ngɔɔ o he kɛ wo o yo ɔ aloo o huno ɔ si fɔfɔɛ mi. Enɛ ɔ maa ye bua mo, nɛ o ma je mɔbɔ nami kpo, aloo kaa bɔ nɛ Baiblo ɔ de ɔ, o maa “nu he kɛ ha” lɛ. (1 Petro 3:8) Lɔ ɔ se ɔ, mo bi o he ke, ‘Anɛ nɔ́ nɛ e pee ɔ ngɛ hɛdɔ tsɔ nɛ i be nyɛe ma kɛ pa lɛ lo?’
Baiblo sisi tomi mlaa: ‘Ke nɔ ko tɔ̃ o nɔ nɛ o pui mi ɔ, lɔ ɔ maa wo o hɛ mi nyami.’—Abɛ 19:11.
Muu tu nyagba a he munyu ngɛ mi mi jɔmi kɛ nile mi. Ke o maa tu munyu ɔ, mo de ke “i” aloo “imi.” Kaa nɔ hyɛmi nɔ́ ɔ, o ma nyɛ ma de ke, “Ke je jɔ nɛ i nui o he ɔ, e haa nɛ i yeɔ tsui,” mohu pe nɛ o ma de ke, “Ke je jɔ nɛ o tsɛ we mi nɛ o ma de mi he nɛ o ngɛ ɔ, e haa nɛ i nuɔ he kaa o susuu we ye he.” Mi mi jɔmi nɛ o kɛ maa tu munyu ɔ be hae nɛ o mi mi nɛ fu.
Baiblo sisi tomi mlaa: “Be fɛɛ be ɔ, nyɛ ha nɛ nyɛ munyuhi nɛ ngɔ, nɛ ngo nɛ hi mi.”—Kolose Bi 4:6.
Moo bu o yo ɔ loo o huno ɔ hu tue. Ke o de o huno ɔ loo o yo ɔ nɔ́ nɛ ngɛ o tsui mi ta a, ngmɛɛ lɛ blɔ nɛ lɛ hu e tu munyu nɛ o ko po e nya nɔ. Ke e tu munyu ta a, moo ti nɔ́ nɛ o nu ɔ mi kɛ tsɔɔ lɛ kpiti kɛ hyɛ kaa o nu nɔ́ nɛ e de ɔ sisi saminya lo. O yo ɔ loo o huno ɔ tue nɛ o maa bu ɔ ma nyɛ maa ye bua wawɛɛ nɛ abofu ɔ maa ba si.
Baiblo sisi tomi mlaa: “Nɔ fɛɛ nɔ he nɛ e sɔ kɛ bu munyu tue, e he nɛ e ko sɔ kɛ tu munyu.”—Yakobo 1:19.