Jud 1:1-25
1 Jud, Yesu Kristo nyɔguɛ, nɛ e ji Yakobo nyɛminyumu ɔ, kɛ ya ha nihi nɛ a tsɛ mɛ nɛ Mawu nɛ ji Tsɛ ɔ suɔ mɛ nɛ e baa a yi kɛ ha Yesu Kristo ɔ:
2 Mɔbɔ nami, kɛ tue mi jɔmi, kɛ suɔmi nɛ hiɛ kɛ ha nyɛ.
3 Nihi nɛ i suɔ, e ngɛ mi kaa jinɛ i ngɛ mɔde bɔe wawɛɛ kaa ma ngma nyɛ kɛ kɔ yi wami hemi ɔ nɛ wɔ tsuo wa hɛɛ mi ɔ he mohu lɛɛ, se i na kaa e he hia nɛ ma ngma nyɛ kɛ wo nyɛ he wami konɛ nyɛɛ hwu hemi kɛ yemi ɔ nɛ a ngɔ kɛ ha ni klɔuklɔu ɔmɛ si kake nyɔngloo ɔ he ta a wawɛɛ.
4 Nɔ́ he je ji kaa ni komɛ ju si kɛ ba sɛ nyɛ kpɛti, nihi nɛ blema lokoo ɔ, Ngmami ɔ hla mɛ ngɔ to kɛ ha kojomi nɛ ɔ; a ji nihi nɛ a yi Mawu gbeye nɛ a ngɔɔ wa Mawu ɔ dloomi ɔ kɛ jeɔ a nya kɛ ha nɔ buimi ngmlikiti* ní peepeehi, nɛ a yi nɔ nɛ lɛ pɛ e níhi ji wɔ,* nɛ ji Nyɔmtsɛ Yesu Kristo ɔ anɔkuale.
5 E ngɛ mi kaa nyɛ le enɛ ɔ tsuo saminya mohu lɛɛ, se i suɔ nɛ ma kai nyɛ kaa benɛ Yehowa* he nihi a yi wami kɛ je Ijipt ɔ, pee se ɔ, e kpata ni nɛmɛ nɛ a tsɔɔ we kaa a ngɛ hemi kɛ yemi ɔ a hɛ mi.
6 Nɛ hiɔwe bɔfo ɔmɛ nɛ a hí mɛ nitsɛmɛ a kekleekle blɔ he ɔ, se mohu a kua mɛ nitsɛmɛ a sihi he kpakpa a, e bɔ mɛ neneene pãhi kɛ to ngɛ diblii kpii mi kɛ ha ligbi ngua a nɔ kojomi ɔ.
7 Jã nɔuu kɛ̃ nɛ Sodom kɛ Gomora kɛ mahi nɛ bɔle mɛ ɔ hu ngɔ a he kɛ ha ajuama bɔmi nɛ ngɛ tai,* nɛ a ya di he lo nya akɔnɔhi nɛ a kɛ adebɔ blɔ nya tomi kɔ we ɔmɛ a se; a kɛ mɛ da wa hɛ mi kaa kɔkɔ bɔmi he nɔ hyɛmi nɔ́ kɛ gu neneene la a nɛ a kɛ gbla a tue ɔ nɔ.
8 Ngɛ enɛ ɔ tsuo se ɔ, nimli nɛ ɔmɛ hu ngɔ a he kɛ ngɛ nlamihi a mi woe, a ngɛ he lo ɔ blee, a bui blɔ nya, nɛ a ngɛ nihi nɛ a hɛ mi ngɛ nyami ɔmɛ a he munyu yayami tue.
9 Se benɛ Maikɛl nɛ ji bɔfo nɔkɔtɔma a kɛ Abosiami sã nya nɛ a ngɛ pɛe ngɛ Mose gbogboe ɔ he ɔ, e bɔɛ mɔde kaa e maa ngɔ jɛmi munyuhi kɛ kojo lɛ, se mohu e de ke: “Yehowa* nɛ kã o hɛ mi.”
10 Se nimli nɛ ɔmɛ ngɛ níhi tsuo nɛ a nui sisi saminya amɛ a he munyu yayami tue. Nɛ ngɛ níhi tsuo nɛ a daa a he numi nɔ kɛ nuɔ sisi kaa bɔ nɛ lohwehi nɛ a susuu we níhi a he peeɔ ɔmɛ a mi ɔ, a yaa nɔ nɛ a hii a he puɛe.
11 E be hie ha mɛ kulaa, ejakaa a ya nyɛɛ Kain blɔ ɔ nɔ nɛ a kɛ oya yemi ya gu Baalam blɔ yayami ɔ nɔ ngɛ hiɔwo he je, nɛ a hɛ mi kpata ngɛ Kora atua tsɔmi munyu tumi ɔ mi!
12 Nimli nɛ ɔmɛ ji tɛ sahi nɛ a laa ngɛ nyu sisi ngɛ nyɛ suɔmi okplɔɔ ngmɛmi ɔmɛ a sisi be mi nɛ a kɛ nyɛ ngɛ ní yee ɔ, to nɔ hyɛli nɛ a lɛɔ mɛ nitsɛmɛ a he nɛ a yi gbeye; bɔku nɛ nyu be mi nɛ kɔɔhiɔ fiaa lɛ kɛ yaa kɛ baa; tsohi nɛ a wui yiblii ngɛ gbo be ɔ nyagbe, a gbo si enyɔne* nɛ a hiaa mɛ kɛ pue si;
13 wo oslɔkehi nɛ a pee hamahama nɛ a jeɔ mɛ nitsɛmɛ a zo hwɔli ɔ kpo; dodoehi nɛ a be blɔ pɔtɛɛ nɛ a nyɛɛɔ nɔ, nɛ́ diblii nɛ mi ti pe kulaa lɛ ngɛ kɛ ha mɛ kɛ yaa neneene ɔ.
14 Ee, Enɔk, nɛ ji nɔ kpaagone kɛ je Adam nɔ ɔ hu gba ngɛ a he benɛ e de ke: “Hyɛ! Yehowa* ngɔ e ni klɔuklɔu ɔmɛ akpe nyɔngmahi abɔ kɛ ba
15 nɛ e ba kojo nihi tsuo, nɛ e bu nihi tsuo nɛ a yi Mawu gbeye ɔ fɔ ngɛ a Mawu gbeye nɛ a yi ní peepee ɔmɛ tsuo nɛ a pee ngɛ blɔ nɛ tsɔɔ kaa a yi Mawu gbeye ɔ nɔ ɔ he je, kɛ gbeye níhi tsuo nɛ yayami peeli nɛ a yi Mawu gbeye ɔ de kɛ si lɛ ɔ he.”
16 Nimli nɛ ɔmɛ a ji munyu huitihuiti tuli, nihi nɛ a tuɔ a si himi ɔ he munyu nyanyaanya, nɛ a nyɛɛɔ mɛ nitsɛmɛ a we akɔnɔhi a se, nɛ a kɛ a nya tuɔ fĩami munyu nguanguahi, be mi nɛ a gbeɔ ni kpahi a yi mi* ngɛ mɛ nitsɛmɛ a se nami he ɔ.
17 Se nyɛ nihi nɛ i suɔ, nyɛ kai munyuhi nɛ wa Nyɔmtsɛ Yesu Kristo bɔfo ɔmɛ tu be ko nɛ be* ɔ,
18 a pɔɔ nyɛ demi ke: “Ngɛ nyagbe be ɔ mi ɔ, he fɛu yeli maa ba, nɛ a maa nyɛɛ mɛ nitsɛmɛ a we akɔnɔhi a se kɛ pee ní yayamihi.”
19 Ni nɛ ɔmɛ ji nihi nɛ a ngɔɔ mi gbamihi kɛ baa a nɛ, adesahi nɛ a peeɔ a ní kaa lohwehi,* nɛ a be mumi ɔ.
20 Se nyɛ nihi nɛ i suɔ, nyɛɛ fia nyɛ he ngɔ ma si ngɛ nyɛ hemi kɛ yemi klɔuklɔu ɔ nɔ, nɛ nyɛɛ sɔle kɛ mumi klɔuklɔu,
21 konɛ nyɛɛ ngɔ nyɛ he kɛ to ngɛ Mawu suɔmi ɔ mi, be mi nɛ nyɛ ngɛ wa Nyɔmtsɛ Yesu Kristo mɔbɔ nami ɔ nɛ e kɛ nɔ yaa neneene wami mi ɔ mlɛe ɔ.
22 Jehanɛ se hu ɔ, nyɛɛ ya nɔ nɛ nyɛɛ na nihi nɛ a yi mi peeɔ mɛ enyɔɔnyɔ ɔ mɔbɔ;
23 nyɛɛ gbla mɛ kɛ je la a mi kɛ he a yi wami. Se nyɛɛ ya nɔ nɛ nyɛɛ na ni kpahi mɔbɔ, nyɛɛ kɛ gbeye yemi nɛ hi jã pee, be mi nɛ nyɛ hiɔɔ tade ɔ nɛ a kɛ he lo ɔ wo he mu ɔ.
24 Jehanɛ ɔ, nɔ nɛ e ma nyɛ maa bu nyɛ he konɛ nyɛ ko tɛ nɔ́, nɛ e ma ha nɛ nyɛɛ da si nɛ mu ko be nyɛ he hie ngɛ e hɛ mi nyami ɔ hɛ mi* kɛ bua jɔmi babauu ɔ,
25 Mawu kake pɛ nɛ ji wa Yi Wami Helɔ kɛ gu wa Nyɔmtsɛ Yesu Kristo nɔ ɔ, a ngɔ hɛ mi nyami, agboje, he wami, kɛ blɔ nya kɛ ha lɛ kɛ je behi tsuo nɛ a be, kɛ amlɔ nɛ ɔ, kɛ jehanɛ se hu kɛ ya neneene tsuo. Amen.
Sisi Ningmahi
^ Aloo “ní peepee nɛ tsɔɔ kaa nɔ ko zo tɔ ywia.” Hela, aselʹgeia. Hyɛ Munyu Komɛ A Sisi Tsɔɔmi.
^ Aloo “ji wa nyɔmtsɛ.”
^ Hyɛ Munyu Komɛ A Sisi Tsɔɔmi.
^ Hyɛ Munyu Komɛ A Sisi Tsɔɔmi.
^ Hyɛ Munyu Komɛ A Sisi Tsɔɔmi.
^ Aloo “a gbo kulaa.”
^ Hyɛ Munyu Komɛ A Sisi Tsɔɔmi.
^ Aloo “a bua jɔɔ nihi a he.”
^ Aloo “de to.”
^ Aloo “he lo mi nimli.”
^ Aloo “bami ɔ nɛ hɛ mi ngɛ nyami ɔ mi.”
