Maako 11:1-33
11 Jehanɛ ɔ, benɛ e piɛ bɔɔ nɛ a maa su Yerusalɛm ngɛ Betfage kɛ Betania ngɛ Oliv Yoku ɔ he ɔ, e tsɔ e kaseli ɔmɛ a kpɛti ni enyɔ
2 nɛ e de mɛ ke: “Nyɛɛ ya kɔpe ɔ nɛ wa ngɛ hyɛe nɛ ɔ mi. Ke nyɛ sɛ mi pɛ ɔ, nyɛ maa na teji ku nyafii ko nɛ nɔ ko hí nɔ hyɛ kɛ ba si amlɔ nɛ ɔ nɛ a muɔ lɛ si. Nyɛɛ pɛne lɛ, nɛ nyɛɛ ngɔ lɛ kɛ ba hiɛ ɔ.
3 Nɛ ke nɔ ko bi nyɛ ke, ‘Mɛni he je nɛ nyɛ ngɛ nɔ́ nɛ ɔ pee ɔ?’ nyɛ de ke, ‘E he hia Nyɔmtsɛ ɔ, nɛ e maa kpale ngɔ lɛ kɛ ba hiɛ ɔ piɔ.’”
4 Enɛ ɔ he ɔ, a pue nɔ kɛ ho nɛ a ya na teji ku nyafii ɔ nɛ a muɔ lɛ si ngɛ sinya ko nya, ngɛ blɔ ɔ he, nɛ a pɛne lɛ.
5 Se nihi nɛ a daa si ngɛ lejɛ ɔmɛ a ti ni komɛ bi mɛ ke: “Mɛni he je nɛ nyɛ ngɛ teji ku nyafii ɔ pɛnee ɔ?”
6 A de mɛ nɔ́ nɛ Yesu de mɛ ke a de ɔ pɛpɛɛpɛ, nɛ a ngmɛ mɛ blɔ nɛ a ho.
7 Nɛ a ngɔ teji ku nyafii ɔ kɛ ba ha Yesu, nɛ a ngɔ tadehi nɛ a wo ngɛ a tade ɔmɛ a nɔ ɔ kɛ pue teji ɔ nɔ, nɛ e hi nɔ.
8 Jehanɛ se hu ɔ, nihi fuu ngɔ tadehi nɛ a wo ngɛ a tade ɔmɛ a nɔ ɔ kɛ pue gbɛjegbɛ ɔ nɔ, se ni komɛ hu ya poo tso kɔnihi kɛ je ngmɔ ɔmɛ a mi.
9 Nɛ nihi nɛ a nyɛɛ e hɛ mi, kɛ ni nɛmɛ nɛ a nyɛɛ e se ɔ ngɛ ngmlaa kpae ke: “Wa kpa mo pɛɛ, he e yi wami! A jɔɔ nɔ nɛ e ma ngɛ Yehowa* biɛ ɔ mi ɔ!
10 A jɔɔ wa tsɛ David Matsɛ Yemi ɔ nɛ ma a! Wa kpa mo pɛɛ, mo he e yi wami, ngɛ hiɔwe lokoo!”
11 Kɛkɛ nɛ e sɛ Yerusalɛm nɛ e ya sɔlemi we ɔ, nɛ e hyɛ nɔ́ fɛɛ nɔ́ kɛ kpe, se akɛnɛ je ngɛ jɔe he je ɔ, e je kpo kɛ ho Betania ya, nɛ Ni Nyɔngma Kɛ Enyɔ ɔmɛ piɛɛ e he.
12 E nɔ jena benɛ a ngɛ Betania jee ɔ, hwɔ ye lɛ.
13 E hɛ ngmɛ gba fig tso ko nɔ ngɛ tsitsaa nɛ bahi ngɛ nɔ, nɛ e ya hyɛ kaa e maa na nɔ́ ko ngɛ nɔ lo. Se benɛ e su he ɔ, e nɛ nɔ́ ko ngɛ nɔ kaa bahi kɛkɛ, ejakaa e sui be nɛ fig tsohi maa wo lolo.
14 Enɛ ɔ he ɔ, e de tso ɔ ke: “Nɔ ko nɔ ko nɛ e ko ye o nɔ yiblii hu gblegbleegble.” Nɛ e kaseli ɔmɛ nu.
15 Jehanɛ ɔ, a ba Yerusalɛm. Benɛ a su lejɛ ɔ, e sɛ sɔlemi we ɔ nɛ e bɔni nihi nɛ a ngɛ ní juae kɛ ni nɛmɛ nɛ a ngɛ ní hee ngɛ sɔlemi we ɔ fiemi, nɛ e plɛ sika tsakeli ɔmɛ a we okplɔɔ ɔmɛ, kɛ ni nɛmɛ nɛ a ngɛ lahuɛhi juae ɔmɛ a sɛ ɔmɛ ngɔ bu si,
16 nɛ e ngmɛ́ nɔ ko blɔ nɛ e tloo nɔ́ ko kɛ be ngɛ sɔlemi we ɔ.
17 E ngɛ mɛ ní tsɔɔe nɛ e ngɛ mɛ dee ke: “Anɛ a ngmɛ ke, ‘A ma tsɛ ye we ɔ ke sɔlemi we’ lo? Se nyɛɛ lɛɛ nyɛ ngɔ kɛ pee juli a tɛ puɔ mi.”
18 Nɛ osɔfo nikɔtɔma amɛ kɛ womi ngmali ɔmɛ nu nɔ́ nɛ ɔ, nɛ a bɔni bɔ nɛ a maa pee ha konɛ a gbe lɛ ɔ hlami; se a ngɛ lɛ gbeye yee, ejakaa e ní tsɔɔmi ɔ ha nɛ asafo kuu ɔ tsuo a nya kpɛ a he.
19 Benɛ e su gbɔkuɛ nya si ɔ, a je kpo kɛ je ma a mi.
20 Se mɔtu mla benɛ a bee ɔ, a na kaa fig tso ɔ gbo momo kɛ e sipoku tsuo.
21 Petro kai, nɛ e de lɛ ke: “Rabi, hyɛ! fig tso ɔ nɛ o gbiɛ ɔ gbo.”
22 Yesu he nɔ nɛ e de mɛ ke: “Nyɛ ná hemi kɛ yemi ngɛ Mawu mi.
23 Ngɛ anɔkuale mi ɔ, i ngɛ nyɛ dee ke, nɔ fɛɛ nɔ nɛ e ma de yoku nɛ ɔ ke, ‘Hiaa nɛ o ya nɔ wo ɔ mi,’ nɛ e be atsinyɛ jee ngɛ e tsui mi, se e ma ná hemi kɛ yemi kaa nɔ́ nɛ e de ɔ maa ba mi ɔ, e ma ha nɛ e maa ba mi.
24 Enɛ ɔ he ɔ, i ngɛ nyɛ dee ke, níhi tsuo nɛ nyɛ maa sɔle kɛ bi ɔ, nyɛ ná hemi kɛ yemi kaa nyɛ nine su a nɔ, nɛ nyɛ nine maa su a nɔ.
25 Nɛ ke nyɛ te si kɛ da si nɛ nyɛ ngɛ sɔlee ɔ, nyɛɛ ngɔ nɔ́ fɛɛ nɔ́ nɛ nɔ ko pee kɛ si nyɛ ɔ kɛ pa lɛ, konɛ nyɛ Tsɛ ɔ nɛ e ngɛ hiɔwe ɔ hu nɛ e ngɔ nyɛ he yayami ɔmɛ kɛ pa nyɛ.”
26 ——
27 A kpale kɛ ba Yerusalɛm. Nɛ benɛ e ngɛ nyɛɛe ngɛ sɔlemi we ɔ, osɔfo nikɔtɔma amɛ kɛ womi ngmali ɔmɛ kɛ nikɔtɔma amɛ ba
28 nɛ a ba bi lɛ ke: “Mɛnɔ he wami lɛ o kɛ ngɛ ní nɛ ɔmɛ pee ɔ? Aloo mɛnɔ ha mo he wami nɛ ɔ nɛ o kɛ ngɛ ní nɛ ɔmɛ pee ɔ?”
29 Yesu de mɛ ke: “Imi hu ma bi nyɛ sane kake. Nyɛ ha mi heto, kɛkɛ ɔ, imi hu ma de nyɛ nɔ nɛ e ha mi he wami nɛ i kɛ ngɛ ní nɛ ɔmɛ pee ɔ.
30 Anɛ Yohane nɔ baptisimi ɔ je hiɔwe aloo e je adesahi a ngɔ? Nyɛ ha mi heto.”
31 Enɛ ɔ he ɔ, a bɔni he susumi nɛ a ngɛ dee ke: “Ke wa de ke, ‘E je hiɔwe’ ɔ, e ma bi wɔ ke, ‘Lɛɛ mɛni he je nɛ nyɛ he we lɛ yi mɔ?’
32 Se anɛ wa ma nyɛ ma de ke, ‘E je adesahi a ngɔ’ lo?” A ngɛ asafo kuu ɔ gbeye yee, ejakaa ni nɛ ɔmɛ tsuo bu Yohane kaa e ji gbalɔ nitsɛnitsɛ.
33 Enɛ ɔ he ɔ, a ha Yesu heto ke: “Wa li.” Yesu hu de mɛ ke: “Imi hu i be nyɛ nɔ nɛ e ha mi he wami nɛ i kɛ ngɛ ní nɛ ɔmɛ pee ɔ dee.”
Sisi Ningmahi
^ Hyɛ Munyu Komɛ A Sisi Tsɔɔmi.
