1 Kronika 10:1-14
-
Saul kɛ e binyumu ɔmɛ gbo (1-14)
10 Ligbi ko ɔ, Filistibi ɔmɛ kɛ Israel ngɛ ta hwue, nɛ Israel nyumu ɔmɛ tu fo ngɛ Filistibi ɔmɛ a nya, nɛ a gbe nihi fuu ngɛ Gilboa Yoku ɔ nɔ.
2 Filistibi ɔmɛ ya ná Saul kɛ e binyumu ɔmɛ, nɛ Filistibi ɔmɛ gbe Saul binyumu ɔmɛ, Yonatan, Abinadab, kɛ Malkishua.
3 Ta a mi wa wawɛɛ kɛ wo Saul, nɛ kɛ̃ɛ̃ tsɛli ɔmɛ na lɛ, nɛ a plaa lɛ.
4 Kɛkɛ nɛ Saul de e ta hwumi ní hɛɛlɔ ɔ ke: “Hiaa o klaate ɔ nɛ o kɛ gbe mi, bɔ nɛ pee nɛ nyumu mɔmlɔtɔtsɛmɛ nɛ ɔmɛ nɛ a ko ba pee mi basabasa.” Se e ta hwumi ní hɛɛlɔ ɔ sume kaa e maa pee jã, ejakaa e ye gbeye wawɛɛ. Lɔ ɔ he ɔ, Saul ngɔ klaate ɔ kɛ gbe e he.*
5 Benɛ Saul ta hwumi ní hɛɛlɔ ɔ na kaa Saul gbo ɔ, lɛ hu e kɛ lɛ nitsɛ e klaate ɔ gbe e he.*
6 Enɛ ɔ he ɔ, Saul kɛ e binyumu etɛ ɔmɛ, kɛ e we mi bi ɔmɛ tsuo gbo si kake.
7 Benɛ Israelbi ɔmɛ tsuo nɛ a ngɛ dɔgba a mi ɔ na kaa nɔ fɛɛ nɔ tu fo, nɛ́ Saul kɛ e binyumu ɔmɛ gbo ɔ, a bɔni a ma amɛ a he jemi, nɛ a tu fo; nɛ Filistibi ɔmɛ ba nɛ a ba hi ma amɛ a mi.
8 E nɔ jena benɛ Filistibi ɔmɛ ba konɛ a ba je nihi nɛ a gbe mɛ ɔ a he níhi ɔ, a na Saul kɛ e binyumu ɔmɛ nɛ a gbo kɛ pueɔ si ngɛ Gilboa Yoku ɔ nɔ.
9 Lɔ ɔ he ɔ, a je e he níhi, nɛ a po e yi, nɛ a ngɔ e ta hwumi ní ɔmɛ, nɛ a tsɔ nɛ a kɛ sɛ gbi ya Filistibi ɔmɛ a zugba a nɔ tsuo, nɛ a ya bɔ a wɔ ɔmɛ kɛ ni ɔmɛ amaniɛ.
10 Lɔ ɔ se ɔ, a ngɔ e ta hwumi ní ɔmɛ kɛ ya to ngɛ a mawu ɔ we* ɔ, nɛ a ka e yi koklodo ɔ kɛ wo Dagon we ɔ he.
11 Benɛ nihi tsuo nɛ a ngɛ Yabesh ngɛ Gilead ɔ nu níhi tsuo nɛ Filistibi ɔmɛ pee Saul ɔ,
12 tatsɛmɛ ɔmɛ tsuo te si nɛ a ya ngɔ Saul kɛ e binyumu ɔmɛ a gbogboe ɔmɛ. A ngɔ mɛ kɛ ba Yabesh, nɛ a ba pu a wu ɔmɛ ngɛ tso ngua a sisi ngɛ Yabesh, nɛ a ha hwɔ ligbi kpaago.
13 Lɔ ɔ he ɔ, Saul gbo ngɛ anɔkuale nɛ e yi Yehowa a he je, ejakaa e bui Yehowa gbi tue, nɛ jehanɛ hu ɔ, e ya bi ní ngɛ ní peelɔ ngɔ
14 mohu pe nɛ e ma ya bi Yehowa juɛmi. Lɔ ɔ he ɔ, e* gbe lɛ, nɛ e ngɔ matsɛ yemi ɔ kɛ ha David, nɛ ji Ishai binyumu ɔ.
Sisi Ningmahi
^ Ngɛ Hebri gbi mi ɔ, “Saul ngɔ klaate ɔ nɛ e nɔ nya.”
^ Ngɛ Hebri gbi mi ɔ, “e nɔ lɛ nitsɛ e klaate ɔ nya nɛ e gbo.”
^ Aloo “jami he.”
^ Nɛ ji Yehowa.