1 Kronika 11:1-47
11 Pee se ɔ, Israelbi ɔmɛ tsuo ba bua a he nya ngɛ David ngɔ ngɛ Hebron, nɛ a ba de lɛ ke: “Hyɛ! O wekuli tutuutu ji wɔ.*
2 Be ko nɛ be ɔ, benɛ Saul ji matsɛ ɔ, mo ji nɔ nɛ nyɛɛɔ Israel hɛ mi ngɛ tahi nɛ e gbaa a mi.* Nɛ Yehowa, o Mawu ɔ de mo ke: ‘O maa hyɛ ye ma Israel nɔ, nɛ o ma ba pee ye ma Israel hɛ mi nyɛɛlɔ.’”
3 Enɛ ɔ he ɔ, Israel nikɔtɔma amɛ tsuo ba matsɛ ɔ ngɔ ngɛ Hebron, nɛ David kɛ mɛ so somi ko ngɛ Hebron ngɛ Yehowa hɛ mi. Kɛkɛ nɛ a pɔ David nu kaa matsɛ konɛ e ye Israel nɔ, kaa bɔ nɛ Yehowa de kɛ gu Samuel nɔ ɔ.
4 Pee se ɔ, David kɛ Israel tsuo pue nɔ kɛ ho Yerusalem, nɛ ji Yebus ya, he nɛ Yebusbi, nɛ ji nihi nɛ a ngɛ zugba a nɔ ɔ ngɛ ɔ.
5 Nihi nɛ a ngɛ Yebus ɔ bɔ David ahlua ke: “O be hiɛ ɔ bae gblegbleegble!” Se David ngɔ he piɛ pomi he nɛ ngɛ Zion nɛ́ amlɔ nɛ ɔ, e ji David Ma a.
6 Lɔ ɔ he ɔ, David de ke: “Nɔ nɛ maa sɛ hlami nɛ e ma ya gbe Yebusbi ɔmɛ ɔ ma ba pee nya dalɔ* kɛ ma nɔkɔtɔma.” Nɛ Yoab, Zeruya binyumu ɔ ji nɔ nɛ sɛ hlami nɛ́ e kuɔ kɛ ya, nɛ e ba pee nya dalɔ.
7 Kɛkɛ nɛ David ya hi he piɛ pomi he ɔ. Enɛ ɔ he je nɛ a wo lejɛ ɔ biɛ ke David Ma a nɛ.
8 E bɔni ma a pomi kɛ ngɛ si bɔlee, kɛ je Milo* ɔ he kɛ ya si hehi nɛ bɔle lɛ ɔ, nɛ Yoab kpale po ma a nɛ piɛ ɔ.
9 Enɛ ɔ he ɔ, David ya nɔ nɛ e pee nɔmlɔ ngua, nɛ Yehowa tabohiatsɛ ɔ kɛ lɛ ngɛ.
10 Jehanɛ ɔ, David tatsɛmɛ nɛ a he wa a, a nyatsɛmɛ ji nɛ ɔmɛ nɛ. Mɛ ji nihi nɛ a kɛ Israel tsuo fĩ e matsɛ yemi ɔ se wawɛɛ, nɛ́ a wo lɛ matsɛ kaa bɔ nɛ Yehowa de ngɛ Israel he ɔ.
11 David tatsɛmɛ nɛ a he wa a ji nɛ ɔmɛ nɛ: Yashobeam, nɛ je Hakmoni weku ɔ mi ɔ, lɛ ji ni etɛ ɔmɛ a nyatsɛ. Be ko ɔ, e kɛ e we akplɔ ɔ gbe nihi 300.
12 Nɔ nɛ nyɛɛ e se ji Eleazar, nɛ ji Ahohino Dodo binyumu ɔ. E piɛɛ tatsɛmɛ etɛ nɛ a he wa a he.
13 E piɛɛ David he ngɛ Pas Damim, ngɛ he nɛ Filistibi ɔmɛ bua a he nya ngɛ kɛ ha ta hwumi ɔ. Jamɛ a be ɔ mi ɔ, zugba ko ngɛ lejɛ ɔ nɛ barli* sɔuu ji nɔ, nɛ ni ɔmɛ tu fo ngɛ Filistibi ɔmɛ a he je.
14 Se e ya da ngmɔ ɔ kpɛti tutuutu, nɛ e fã ngmɔ ɔ he, nɛ e ya nɔ nɛ e gbe Filistibi ɔmɛ, nɛ Yehowa ye kunimi ngua.*
15 Nyatsɛmɛ 30 ɔmɛ a kpɛti ni etɛ kple kɛ ya tɛsa a he, ngɛ David ngɔ ngɛ Adulam tɛ puɔ ɔ mi, be mi nɛ Filistibi ɔmɛ a tabo ko ya to si ngɛ Refaim Dɔgba a mi ɔ.
16 Jamɛ a be ɔ mi ɔ, David ngɛ he piɛ pomi he ɔ, nɛ Filistibi ɔmɛ a tabo ko ya to si ngɛ Betlehem.
17 Kɛkɛ nɛ David de ke: “Kaa i ná muɔ nɛ a toɔ nyu ngɛ mi nɛ ngɛ Betlehem agbo ɔ nya a mi nyu ɔ, jinɛ i ko nu!”
18 Kɛkɛ nɛ ni etɛ ɔmɛ sɛ Filistbi ɔmɛ a sito he ɔ pani nya, nɛ a ya sa nyu ngɛ muɔ nɛ a toɔ nyu ngɛ mi nɛ ngɛ Betlehem agbo ɔ nya a mi kɛ ba ha David; se e kua nyu ɔ numi, nɛ e plɛ pue si ha Yehowa.
19 E de ke: “Kpaoo ngɛ Mawu hɛ mi kaa ma pee nɔ́ nɛ ɔ! Anɛ e sa nɛ ma nu nyumuhi nɛ a ngɔ a wami* kɛ wo oslaa mi ɔ a muɔ lo? Ejakaa a ngɔ a wami* kɛ wo oslaa mi loko a ya yɛ nyu ɔ kɛ ba.” Enɛ ɔ he ɔ, e kua nyu ɔ numi. Níhi nɛ e tatsɛmɛ etɛ nɛ a he wa a pee ji nɛ ɔmɛ nɛ.
20 Yoab nyɛminyumu Abishai ba pee ni etɛ kpa komɛ hu a nya dalɔ; e ngɔ e we akplɔ ɔ kɛ gbe nihi 300, nɛ e he biɛ kaa ni etɛ ɔmɛ.
21 Ngɛ ni etɛ kpa amɛ a kpɛti ɔ, e bɔ mɔde wawɛɛ pe a kpɛti ni enyɔ, nɛ lɛ ji a nya dalɔ; se e ná we kekleekle ni etɛ ɔmɛ.
22 Benaya, Yehoyada binyumu ɔ ji nyumu katsɛ,* nɛ e tsu ní tsumi nguanguahi fuu ngɛ Kabzeel. E gbe Moabno Ariel binyumu enyɔ ɔmɛ, nɛ ligbi ko nɛ snoo ngɛ nɛe ɔ, e kple si kɛ sɛ nyu muɔ ko mi kɛ ya gbe jata ko.
23 E gbe Egipt nyumu oblai kpanaa ko hulɔ, nyumu ɔ kami ji kɔni fã* enuɔ. E ngɛ mi kaa Egiptno ɔ hɛɛ akplɔ nɛ ngɛ kaa bo lolɔ klama mi tso ngua ngɛ e dɛ mohu lɛɛ, se e kɛ tso ya tua Egiptno ɔ, nɛ e kpɔ̃ akplɔ ɔ ngɛ e dɛ, nɛ e ngɔ Egiptno ɔ nitsɛ e we akplɔ ɔ kɛ gbe lɛ.
24 Ní nɛ ɔmɛ ji níhi nɛ Benaya, Yehoyada binyumu ɔ pee, nɛ e he biɛ kaa tatsɛmɛ etɛ nɛ a he wa a.
25 E ngɛ mi kaa e bɔ mɔde wawɛɛ pe nihi nyingmi etɛ ɔmɛ mohu lɛɛ, se e ná we ni etɛ ɔmɛ. Se kɛ̃ ɔ, David ngɔ lɛ kɛ da lɛ nitsɛ e he buli ɔmɛ a nya.
26 Tabuli ɔmɛ a kpɛti tatsɛmɛ nɛ a he wa ji Asahel, Yoab nyɛminyumu ɔ, Elhanan, nɛ ji Dodo nɛ je Betlehem ɔ binyumu ɔ,
27 Shamot, Harorino ɔ, Helez, Pelonno ɔ,
28 Ira, Tekoano Ikesh binyumu ɔ, Abiezer, Anatotno ɔ,
29 Sibekai, Hushano ɔ, Ilai, Ahohino ɔ,
30 Maharai, Netofano ɔ, Heled, Netofano Baanah binyumu ɔ,
31 Itai nɛ ji Ribai nɛ je Gibea ngɛ Benyamin ɔ binyumu ɔ, Benaya, Piratonno ɔ,
32 Hurai nɛ je Gaash dɔ* ɔ nya a, Abiel, Arbatno ɔ,
33 Azmavet, Baharumno ɔ, Eliaba, Shaalbonno ɔ,
34 Gizonno Hashem binyumu ɔmɛ, Yonatan, Hararno Shagee binyumu ɔ,
35 Ahiam, Hararno Saka binyumu ɔ, Elifal, Ur binyumu ɔ,
36 Hefer, Mekeratno ɔ, Ahiya, Pelonno ɔ,
37 Hezro, Karmelno ɔ, Naarai, Ezbai binyumu ɔ,
38 Yoel, Natan nyɛminyumu ɔ, Mibhar, Hagri binyumu ɔ,
39 Zelek, Ammonno ɔ, Naharai, Beerotno ɔ, Zeruya binyumu Yoab ta hwumi ní hɛɛlɔ ɔ;
40 Ira, Itrino ɔ, Gareb, Itrino ɔ,
41 Uria, Hitno ɔ, Zabad, Ahlai binyumu ɔ,
42 Adina, Rubenno Shiza binyumu ɔ, nɛ ji Ruben bi ɔmɛ a nyatsɛ ɔ, kɛ nihi 30 nɛ piɛɛ e he ɔ;
43 Hanan, Maaka binyumu ɔ, Yoshafat, Mitnino ɔ,
44 Uzia, Ashteratno ɔ, Shama kɛ Yeyel, Aroerno Hotam binyumu ɔmɛ;
45 Yediael, Shimri binyumu ɔ, kɛ e nyɛminyumu Yoha, Tizno ɔ,
46 Eliel, Mahavno ɔ, Yeribai kɛ Yoshavia, Elnaam binyumu ɔmɛ, kɛ Itma, Moabno ɔ;
47 Eliel, Obed, kɛ Yaasiel, Mezobano ɔ.
Sisi Ningmahi
^ Ngɛ Hebri gbi mi ɔ, “Wa ji mo nitsɛ o wu kɛ o he lo.”
^ Ngɛ Hebri gbi mi ɔ, “nɔ nɛ ngɔɔ Israel kɛ jeɔ kpo nɛ e kɛ mɛ baa mi.”
^ Ngɛ Hebri gbi mi ɔ, “nyatsɛ.”
^ E ji Hebri munyu nɛ e tsɔɔ nɔ́ ko nɛ a bua nya kaa kpongu.
^ E ji ngma henɔ ko.
^ Aloo “nɛ Yehowa ngɔ yi wami hemi ngua kɛ ba.”
^ Aloo “klaa.”
^ Aloo “klaa.”
^ Ngɛ Hebri gbi mi ɔ, “nyumu katsɛ ko binyumu.”
^ Nyumu ɔ kami maa pee mita 2.23 (nanewɛɛ 7.3). Hyɛ Mi Tsɔɔmi Munyu B14.