1 Kronika 12:1-40
-
Nihi nɛ a fĩ David matsɛ yemi ɔ se (1-40)
12 Nyumu nɛ ɔmɛ ji nihi nɛ a ba David ngɔ ngɛ Ziklag benɛ e nyɛ we nɛ e yaa nɛ e baa faa ngɛ Kish binyumu Saul he je ɔ, nɛ a piɛɛ tatsɛmɛ nɛ a he wa nɛ a fĩ e se ngɛ ta mi ɔ a he.
2 A hɛɛ kɛ̃ɛ̃, nɛ a nyɛɔ ngɔɔ a hiɔ nine kɛ a muɔ nine tsuo kɛ fɔɔ amlami tɛ aloo a kɛ tsɛ̃ɔ kɛ̃ɛ̃. A piɛɛ Saul nyɛminyumu ɔmɛ a he, nɛ a je Benyamin wɛtso ɔ mi.
3 A nyatsɛ ji Ahiezer, kɛ Yoash, mɛ ni enyɔ ɔmɛ tsuo a ji Gibeano Shemaa binyumuhi; Yeziel kɛ Pelet, Azmavet binyumu ɔmɛ, Beraka, Yehu, Anatotno ɔ,
4 Ishmaya, Gibeonno ɔ, e ji tatsɛ nɛ he wa ngɛ nimli nyingmi etɛ ɔmɛ a kpɛti, nɛ lɛ nɛ e hyɛɔ nimli nyingmi etɛ ɔmɛ a nɔ; jehanɛ hu ɔ, Yeremia, Yahaziel, Yohanan, Yozabad, Gederano ɔ,
5 Eluzai, Yerimot, Bealia, Shemaria, Shefatia, Harifno ɔ,
6 Elkana, Ishia, Azarel, Yoezer, kɛ Yashobeam, Kora bi ɔmɛ;
7 kɛ Yoela kɛ Zebadia, Yeroham nɛ je Gedor ɔ binyumu ɔmɛ.
8 Gadbi ɔmɛ a kpɛti ni komɛ ya David ngɔ ngɛ he piɛ pomi he ɔ ngɛ nga a nɔ; a ji tatsɛmɛ nɛ a he wa, tabuli nɛ a tsɔse mɛ kɛ ha ta, nɛ a le tsɛ̃i ngua kɛ akplɔ hɛɛmi, nɛ a hɛ mi ngɛ kaa jata hɛ mi, nɛ a he sɔɔ kaa odabɔhi nɛ a ngɛ yokuhi a nɔ.
9 Ezer ji a nyatsɛ, Obadia ji nɔ enyɔne, Eliab ji nɔ etɛne,
10 Mishmana ji nɔ eywiɛne, Yeremia ji nɔ enuɔne,
11 Atai ji nɔ ekpane, Eliel ji nɔ kpaagone,
12 Yohanan ji nɔ kpaanyɔne, Elzabad ji nɔ nɛɛne,
13 Yeremia ji nɔ nyɔngmane, Makbanai ji nɔ nyɔngma kɛ kakene.
14 Ni nɛ ɔmɛ piɛɛ Gadbi ɔmɛ a he, a ji tabo ɔ nyatsɛmɛ. Nɔ nyafii pe kulaa ngɛ a kpɛti ɔ kɛ nimli 100 ma nyɛ maa hwu ta, nɛ nɔ ngua pe kulaa ngɛ a kpɛti ɔ kɛ nimli 1,000 ma nyɛ maa hwu ta.
15 Nyumu nɛ ɔmɛ lɛ a po Yordan Pa a ngɛ kekleekle nyɔhiɔ ɔ mi benɛ pa a hyi kɛ be nɔ ɔ nɛ, nɛ a fiee nihi tsuo nɛ a ngɛ dɔ ɔ mi ɔ kɛ ho puje he kɛ pusinɔ he ya.
16 Benyamin nyumu ɔmɛ a kpɛti ni komɛ kɛ Yuda nyumu ɔmɛ a kpɛti ni komɛ hu ba David ngɔ ngɛ e he piɛ pomi he ɔ.
17 Kɛkɛ nɛ David je kpo kɛ ba da a hɛ mi nɛ e de mɛ ke: “Ke nyɛ ba ye ngɔ ngɛ tue mi jɔmi mi konɛ nyɛ ba ye bua mi ɔ, lɛɛ i kɛ nyɛ maa bɔ. Se ke nyɛ ba konɛ nyɛ ba tsɔɔ ye se blɔ kɛ ha ye he nyɛli be mi nɛ i pee we nɔ́ yayami ko ɔ, lɛɛ wa nɛmɛ a Mawu ɔ nɛ hyɛ nɛ e kojo.”
18 Kɛkɛ nɛ Mawu mumi ɔ ba* Amasai, nɛ ji nimli nyingmi etɛ ɔmɛ a nyatsɛ ɔ nɔ, nɛ e de ke:
“Oo David, o níhi ji wɔ, Ishai binyumu, waa kɛ mo ngɛ.
Tue mi jɔmi, tue mi jɔmi ha mo, nɛ tue mi jɔmi ha nɔ nɛ ngɛ mo ye buae ɔ,Ejakaa o Mawu ɔ ngɛ mo ye buae.”
Lɔ ɔ he ɔ, David he mɛ atuu, nɛ e pee mɛ e tabuli ɔmɛ a nyatsɛmɛ.
19 Manasebi komɛ hu ba piɛɛ David he benɛ e kɛ Filistibi ɔmɛ ba konɛ a kɛ Saul nɛ ba hwu ta a; se David yi bua we Filistibi ɔmɛ, ejakaa benɛ Filistibi ɔmɛ a ma nɔ yeli ɔmɛ ya ajla se ɔ, a fiee lɛ, nɛ a de ke: “E ma ya piɛɛ Saul he, nɛ lɔ ɔ kɛ wa wami maa wo oslaa mi.”
20 Benɛ e ho Ziklag ya a, Manasebi nɛ a ba piɛɛ e he ji nɛ ɔmɛ nɛ: Adnah, Yozabad, Yediael, Mikael, Yozabad, Elihu, kɛ Ziletai, a ji Manase wɛtso ɔ mi nimli akpehi a nyatsɛmɛ.
21 A ye bua David nɛ e hwu kɛ si basabasa peeli a kuu ɔ, ejakaa mɛ tsuo a he wa, a ji nyumu katsɛmɛ, nɛ a ba pee tabo ɔ nya dali.
22 Daa ligbi ɔ, nihi ba piɛɛɔ David he, nɛ a yeɔ buaa lɛ, kɛ ya si be nɛ tabo ɔ ba kle kaa Mawu tabo ɔ.
23 Nihi nɛ a dla a he kɛ ha ta nɛ a ba David ngɔ ngɛ Hebron konɛ a ba ngɔ Saul matsɛ yemi ɔ kɛ ha lɛ ngɛ Yehowa fami nya a, a nyatsɛmɛ ɔmɛ a yibɔ ji nɛ ɔ nɛ.
24 Yuda nyumuhi nɛ a hɛɛ tsɛ̃i ngua kɛ akplɔ, nɛ a dla a he kɛ ha ta a, a yibɔ ji 6,800.
25 Ngɛ Simeonbi ɔmɛ a kpɛti ɔ, nyumuhi nɛ a he wa nɛ a ji katsɛmɛ ngɛ́ tabo ɔ mi ɔ a yibɔ ji 7,100.
26 Ngɛ Levibi ɔmɛ a kpɛti ɔ, nihi 4,600.
27 Yehoyada ji Aaron binyumu ɔmɛ a hɛ mi nyɛɛlɔ, nɛ nihi nɛ a piɛɛ e he ɔ a yibɔ ji 3,700,
28 kɛ Zadok, nɛ ji niheyo nɛ he wa nɛ e ji katsɛ, kɛ nya dali 22 nɛ a je e tsɛ we ɔ nɛ a piɛɛ e he ɔ.
29 Ngɛ Benyaminbi ɔmɛ, nɛ ji Saul nyɛminyumu ɔmɛ a kpɛti ɔ, nihi 3,000; jinɛ a ti nihi babauu fĩ Saul we ɔ se kpɛii.
30 Ngɛ Efraimbi ɔmɛ a kpɛti ɔ, nyumuhi nɛ a he wa, nɛ́ a ji katsɛmɛ nɛ a he biɛ ngɛ a tsɛmɛ a we ɔmɛ a mi ɔ a yibɔ ji 20,800.
31 Ngɛ Manase wɛtso fã a mi ɔ, nihi 18,000 lɛ a je blɔ wo a biɛ ta kaa a ba wo David matsɛ.
32 Ngɛ Isakar wɛtso ɔ mi ɔ, a nyatsɛmɛ ɔmɛ a kpɛti nihi 200. Nimli nɛ ɔmɛ le behi kɛ nɔ́ nɛ e sa kaa Israel nɛ pee, nɛ a nyɛminyumu ɔmɛ tsuo ngɛ a sisi.
33 Ngɛ Zebulun wɛtso ɔ mi ɔ, nihi 50,000 lɛ a ma nyɛ ma tsu tabuli a ní tsumi, nɛ a kɛ ta hwumi níhi tsuo ma nyɛ ma gba ta. Ni nɛ ɔmɛ tsuo fĩ David se kɛ a tsui tsuo.*
34 Ngɛ Naftali wɛtso ɔ mi ɔ, nya dali 1,000, nɛ nihi 37,000 nɛ a hɛɛ tsɛ̃i ngua kɛ akplɔ piɛɛ a he.
35 Ngɛ Danbi ɔmɛ a kpɛti ɔ, nihi 28,600 lɛ a gbaa ta.
36 Nɛ ngɛ Asher wɛtso ɔ mi ɔ, nihi 40,000 lɛ a ma nyɛ ma tsu tabuli a ní tsumi nɛ a gbaa ta.
37 Ngɛ Yordan Pa a se, ngɛ Rubenbi ɔmɛ, Gadbi ɔmɛ, kɛ Manase wɛtso fã a kpɛti ɔ, tabuli 120,000 nɛ́ a hɛɛ ta hwumi ní slɔɔtoslɔɔtohi tsuo.
38 Nyumu nɛ ɔmɛ tsuo ji tatsɛmɛ, nɛ a peeɔ kake kɛ gbaa ta; a ba Hebron kɛ a tsui tsuo konɛ a ba wo David matsɛ nɛ́ e ye Israel tsuo nɔ, nɛ Israelbi tsuo nɛ a piɛ ɔ hu suɔ* kaa a wo David matsɛ.
39 Nɛ a kɛ David hi lejɛ ɔ ligbi etɛ, nɛ a ye ní nɛ a nu ní, ejakaa a nyɛminyumu ɔmɛ dla a se.
40 Jehanɛ hu ɔ, nihi nɛ ngɛ a kasa nya, kɛ nihi nɛ a ngɛ Isakar, Zebulun, kɛ Naftali tɔɔ ɔ po ngɔ tejihi, afukpɔngɔhi, teji okpɔngɔhi, kɛ nahi kɛ a nɔ niye ní kɛ ba; mamu, fig nɛ a nyɛ nɔ keekihi, kɛ wai yiblii gbigbli keekihi, wai, nu, kɛ nahi kɛ jijɔhi babauu nitsɛ kɛ ba, ejakaa Israel ngɛ nyae.
Sisi Ningmahi
^ Ngɛ Hebri gbi mi ɔ, “ha.”
^ Aloo “Nihi tsuo nɛ a fĩ David se ɔ, hɛɛ we tsui enyɔɔnyɔ.”
^ Ngɛ Hebri gbi mi ɔ, “hɛɛ tsui kake.”
