1 Kronika 15:1-29
15 David ya nɔ nɛ e ma wehi kɛ ha e he ngɛ David Ma a mi, nɛ e dla he ko kɛ ha anɔkuale Mawu ɔ Daka a, nɛ e ma bo tsu kɛ ha Daka a.
2 Jamɛ a be ɔ mi nɛ David de ke: “Nɔ ko nɛ ko tloo anɔkuale Mawu ɔ Daka a kaa ja Levibi ɔmɛ pɛ, ejakaa mɛ lɛ Yehowa hla kaa a tloo Yehowa Daka a, nɛ́ a sɔmɔ lɛ daa” a nɛ.
3 Lɔ ɔ se ɔ, David bua Israel tsuo nya ngɛ Yerusalem konɛ a ya ngɔ Yehowa Daka a kɛ kuɔ kɛ ba he nɛ e dla kɛ ha Daka a.
4 David bua Aaron sisi bimɛ ɔmɛ kɛ Levibi ɔmɛ a nya:
5 ngɛ Kohatbi ɔmɛ a kpɛti ɔ, Uriel, nɛ ji nya dalɔ ɔ, kɛ e nyɛminyumuhi 120;
6 ngɛ Meraribi ɔmɛ a kpɛti ɔ, Asaya, nɛ ji nya dalɔ ɔ, kɛ e nyɛminyumuhi 220;
7 ngɛ Gershombi ɔmɛ a kpɛti ɔ, Yoel, nɛ ji nya dalɔ ɔ, kɛ e nyɛminyumuhi 130;
8 ngɛ Elizafan sisi bimɛ ɔmɛ a kpɛti ɔ, Shemaya, nɛ ji nya dalɔ ɔ, kɛ e nyɛminyumuhi 200;
9 ngɛ Hebron sisi bimɛ ɔmɛ a kpɛti ɔ, Eliel, nɛ ji nya dalɔ ɔ, kɛ e nyɛminyumuhi 80;
10 ngɛ Uziel sisi bimɛ ɔmɛ a kpɛti ɔ, Aminadab, nɛ ji nya dalɔ ɔ, kɛ e nyɛminyumuhi 112.
11 Jehanɛ hu ɔ, David tsɛ osɔfo Zadok, kɛ osɔfo Abiatar, kɛ Levibi nɛ ji Uriel, Asaya, Yoel, Shemaya, Eliel, kɛ Aminadab,
12 nɛ e de mɛ ke: “Nyɛ ji Levibi ɔmɛ a tsɛmɛ a we ɔmɛ a nyatsɛmɛ. Nyɛɛ kɛ nyɛ nyɛminyumu ɔmɛ nyɛɛ tsu nyɛ he, nɛ́ nyɛ ya ngɔ Yehowa, Israel Mawu ɔ Daka a kɛ ba he nɛ i dla kɛ ha Daka a.
13 Akɛnɛ kekle ɔ, pi nyɛ nɛ nyɛ tloo he je ɔ, Yehowa wa Mawu ɔ we abofu ba wa nɔ, ejakaa wa hla we blɔ kpakpa nɛ e sa kaa a gu nɔ kɛ tloo.”
14 Lɔ ɔ he ɔ, osɔfo ɔmɛ kɛ Levibi ɔmɛ tsu a he konɛ a ya ngɔ Yehowa, Israel Mawu ɔ Daka a kɛ ba.
15 Kɛkɛ nɛ Levibi ɔmɛ tloo anɔkuale Mawu ɔ Daka a kɛ e he tso ɔmɛ ngɛ a konɔ kaa bɔ nɛ Mose fã mɛ ngɛ Yehowa munyu nya a pɛpɛɛpɛ.
16 Lɔ ɔ se ɔ, David de Levibi ɔmɛ a nya dali ɔmɛ kaa a hla a nyɛminyumu ɔmɛ, nɛ́ ji lali ɔmɛ konɛ a la wawɛɛ kɛ bua jɔmi nɛ a fia kpa sakuhi, sakuhi, kɛ ayawahi.
17 Lɔ ɔ he ɔ, Levibi ɔmɛ hla Heman, nɛ ji Yoel binyumu ɔ, nɛ ngɛ e nyɛminyumu ɔmɛ a kpɛti ɔ, a hla Asaf, nɛ ji Berekia binyumu ɔ, nɛ ngɛ Meraribi ɔmɛ, nɛ ji a nyɛminyumu ɔmɛ a kpɛti ɔ, a hla Etan, nɛ ji Kushaya binyumu ɔ.
18 Nihi nɛ piɛɛ a he ji a nyɛminyumu ɔmɛ nɛ a ngɛ kuu enyɔne ɔ mi ɔ, Zakaria, Ben, Yaaziel, Shemiramot, Yehiel, Uni, Eliab, Benaya, Maaseya, Matitia, Elifelehu, kɛ Mikneya, kɛ agbo nya buli nɛ ji Obed Edom kɛ Yeyel.
19 Lali nɛ a maa fia akɔblee ayawa amɛ ji Heman, Asaf, kɛ Etan;
20 nɛ nihi nɛ a fia kpa sakuhi nɛ́ a kɛ fɔ̃ Alamot* ɔ ji Zakaria, Aziel, Shemiramot, Yehiel, Uni, Eliab, Maaseya, kɛ Benaya;
21 nɛ nihi nɛ a fia sakuhi nɛ a kɛ fɔ̃ Sheminit,* nɛ́ a sɔmɔ kaa nɔ hyɛli ɔ ji Matitia, Elifelehu, Mikneya, Obed Edom, Yeyel, kɛ Azazia.
22 Kenania, nɛ ji Levibi ɔmɛ a nya dalɔ ɔ ji nɔ nɛ hyɛ Daka a tloomi nɔ, ejakaa e he be ngɛ mi,
23 nɛ Berekia kɛ Elkana ji agbo nya buli kɛ ha Daka a.
24 Osɔfo ɔmɛ, nɛ ji Shebania, Yoshafat, Netanel, Amasai, Zakaria, Benaya, kɛ Eliezer kpa titimati ɔmɛ wawɛɛ ngɛ anɔkuale Mawu ɔ Daka a hɛ mi, nɛ Obed Edom kɛ Yehia hu sɔmɔ kaa agbo nya buli kɛ ha Daka a.
25 Kɛkɛ nɛ David kɛ Israel nikɔtɔma amɛ kɛ nimli akpehi a nya dali ɔmɛ nyɛɛ kɛ ho konɛ a ya ngɔ Yehowa somi daka a kɛ je Obed Edom we ɔ mi kɛ ba kɛ nyami.
26 Akɛnɛ anɔkuale Mawu ɔ ye bua Levibi ɔmɛ nɛ́ a tloo Yehowa somi daka a he je ɔ, a ngɔ na ku wawi kpaago kɛ agbosu kpaago kɛ sã afɔle.
27 David wo tade klɔii ko nɛ kɔni be he nɛ́ a kɛ bo kpakpa pee, nɛ Levibi ɔmɛ tsuo nɛ a tloo Daka a, lali ɔmɛ, kɛ Kenania, nɛ ji nya dalɔ nɛ hyɛɔ Daka a tloomi kɛ lali ɔmɛ a nɔ ɔ hu wo eko; David wo klala efɔd ko hulɔ.
28 Israelbi ɔmɛ tsuo ngɔ Yehowa somi daka a kɛ kuɔ kɛ ba. Benɛ a ma a, a kɛ bua jɔmi ngɛ ose hee, nɛ a ngɛ bɛhi kɛ titimatihi kpae, nɛ a ngɛ ayawahi kɛ kpa sakuhi kɛ sakuhi fiae wawɛɛ.
29 Se benɛ a kɛ Yehowa somi daka a ba David Ma a mi ɔ, Saul biyo Mikal hyɛ zugba kɛ gu saflɛ ɔ mi, nɛ e na Matsɛ David nɛ e ngɛ tuue kɛ ngɛ yae kɛ ngɛ bae nɛ e ngɛ nyae; nɛ David he pee lɛ tai ngɛ e tsui mi.
