1 Kronika 16:1-43
16 Lɔ ɔ he ɔ, a ngɔ anɔkuale Mawu ɔ Daka a kɛ ba, nɛ a kɛ ba ma bo tsu nɛ David pee kɛ ha lɛ ɔ mi; nɛ a sã sami afɔlehi kɛ tue mi jɔmi afɔlehi ngɛ anɔkuale Mawu ɔ hɛ mi.
2 Benɛ David sã sami afɔle ɔmɛ kɛ tue mi jɔmi afɔle ɔmɛ ta a, e jɔɔ ma a ngɛ Yehowa biɛ mi.
3 Lɔ ɔ se ɔ, e gba abolo lokotoo, zani keeki, kɛ wai yiblii gbigbli keeki kɛ ha Israelbi ɔmɛ tsuo; e gba kɛ ha nyumu fɛɛ nyumu kɛ yo fɛɛ yo.
4 Nɛ e hla Levibi ɔmɛ a kpɛti ni komɛ konɛ a sɔmɔ ngɛ Yehowa Daka a hɛ mi, nɛ́ a wo Yehowa, Israel Mawu ɔ hɛ mi nyami,* nɛ́ a na lɛ si, nɛ́ a je e yi.
5 Asaf ji a nyatsɛ, nɛ nɔ nɛ nyɛɛ e se ji Zakaria; nɛ Yeyel, Shemiramot, Yehiel, Matitia, Eliab, Benaya, Obed Edom, kɛ Yeyel fia kpa sakuhi kɛ sakuhi; nɛ Asaf fia ayawa amɛ,
6 nɛ osɔfo Benaya kɛ osɔfo Yahaziel kpaa titimati ɔmɛ ngɛ anɔkuale Mawu ɔ somi daka a hɛ mi daa.
7 Jamɛ a ligbi ɔ ji kekleekle be nɛ David po sina la ha Yehowa, konɛ Asaf kɛ e nyɛminyumu ɔmɛ nɛ a la:
8 “Nyɛɛ na Yehowa si, nyɛɛ wo e biɛ ta,Nyɛ ha nɛ a le níhi nɛ e pee ɔ ngɛ ni ɔmɛ a kpɛti!
9 Nyɛ la ha lɛ, nyɛ la yi jemi lahi* ha lɛ,Nyɛ susu e nyakpɛ ní ɔmɛ tsuo a he.*
10 Nyɛɛ kɛ e biɛ klɔuklɔu ɔ nɛ fĩa.
Nihi nɛ a ngɛ Yehowa se blɔ hlae ɔ a tsui nɛ nya.
11 Nyɛ hla Yehowa kɛ e he wami ɔ se blɔ.
Nyɛɛ ya e hɛ mi daa.
12 Nyɛ kai nyakpɛ níhi nɛ e pee ɔ,E nyakpɛ ní ɔmɛ, kɛ e kojomi ɔmɛ,
13 Nyɛ nɛ nyɛ ji e sɔmɔlɔ Israel nina,*Nyɛ Yakob bimɛ, nɛ ji nihi nɛ e hla.
14 Lɛ ji Yehowa, wa Mawu ɔ nɛ.
E kojomi ɔmɛ hyi zugba a nɔ tsuo.
15 Nyɛ kai e somi ɔ kɛ ya neneene,Si nɛ e wo ɔ,* nyɛ kai kɛ ya si yi nɔ nɛ ji akpe,
16 Somi nɛ e kɛ Abraham so,Kɛ kita nɛ e kã Isak,
17 Nɛ́ e ma nɔ mi kaa mlaa kɛ ha Yakob,Kɛ neneene somi kɛ ha Israel,
18 Nɛ́ e de ke, ‘Ma ngɔ Kanaan zugba a kɛ ha moKaa nyɛ weto ní’ ɔ.
19 Jamɛ a be ɔ mi ɔ, nyɛ he pi,Ee, nyɛ he pi kulaa, nɛ nyɛ ji nibwɔhi ngɛ zugba a nɔ.
20 A nyɛɛ kɛ je je ma kake nɔ kɛ ya je ma kpa nɔ,Kɛ je matsɛ yemi kake sisi kɛ ya matsɛ yemi kpahi a sisi.
21 E ha we nɛ nɔ ko nɛ wa mɛ yi mi,Mohu ɔ, e kã matsɛmɛ a hɛ mi ngɛ a he je,
22 Nɛ e de ke, ‘Nihi nɛ i pɔ mɛ nu ɔ, nyɛ ko ta a he,Nɛ ye gbali ɔmɛ hu, nyɛ ko pee mɛ nɔ́ yayami ko.’
23 Nyɛ la ha Yehowa, nyɛ zugba a tsuo!
Nyɛɛ fiɛɛ e yi wami hemi ɔ daa ligbi!
24 Nyɛɛ jaje e hɛ mi nyami ɔ ngɛ je ma amɛ a kpɛti,Nyɛɛ jaje e nyakpɛ ní tsumi ɔmɛ ngɛ ni ɔmɛ tsuo a kpɛti.
25 Ejakaa Yehowa kle nɛ e sa yi jemi wawɛɛ nitsɛ.
E sa nɛ a ye lɛ gbeye pe mawu kpa amɛ tsuo.
26 Je ma amɛ a mawu ɔmɛ tsuo a he be se nami,Se Yehowa ji nɔ nɛ pee hiɔwe ɔmɛ.
27 Hɛ mi nyami* kɛ agboje bɔle lɛ kɛ kpe;He wami kɛ bua jɔmi ngɛ e hi he ɔ.
28 Nyɛ je Yehowa yi, nyɛ wekuhi nɛ nyɛ ngɛ ni ɔmɛ a kpɛti,Nyɛ je Yehowa yi ngɛ e hɛ mi nyami kɛ e he wami ɔ he je.
29 Nyɛɛ kɛ hɛ mi nyami nɛ sa Yehowa biɛ ɔ nɛ ha lɛ;Nyɛɛ ngɔ nike ní kɛ ba, nɛ nyɛ ba da e hɛ mi.
Nyɛ kplã si ha* Yehowa kɛ nyɛ he tade klɔuklɔuhi.*
30 Nyɛ he nɛ do blibliibli ngɛ e hɛ mi, nyɛ je ɔ tsuo!
E ngɔ zugba a* kɛ ma si kpɛii; nɛ nɔ́ ko nɔ́ ko be nyɛe ma je kɛ je e blɔ he.*
31 Hiɔwe ɔmɛ nɛ a nya, nɛ zugba a bua nɛ jɔ;Nyɛɛ jaje ngɛ je ma amɛ a kpɛti ke: ‘Yehowa ba pee Matsɛ!’
32 Wo ɔ kɛ e mi níhi tsuo nɛ a wo gbi;Ngmɔhi kɛ a nɔ níhi tsuo nɛ a nya.
33 Jamɛ a be ɔ mi nɔuu ɔ, tsohi tsuo nɛ ngɛ hue tso ɔ mi ɔ nɛ a he ose kɛ bua jɔmi ngɛ Yehowa hɛ mi,Ejakaa e ma* nɛ́ e ba kojo zugba a.
34 Nyɛɛ na Yehowa si, ejakaa e hi;E suɔmi nɛ se pui ɔ ngɛ kɛ yaa neneene.
35 Nɛ nyɛ de ke, ‘Oo Mawu, wa yi wami helɔ, mo kpɔ̃ wɔ,Mo bua wa nya, nɛ́ o kpɔ̃ wɔ ngɛ je ma amɛ a dɛ mi,Konɛ waa ngɔ sina kɛ ha o biɛ klɔuklɔu ɔ,Nɛ waa kɛ bua jɔmi nɛ je o yi.*
36 Á je Yehowa, Israel Mawu ɔ yiKɛ ya neneene.*’”
Nɛ ma a tsuo de ke, “Amen!”* nɛ a je Yehowa yi.
37 Lɔ ɔ se ɔ, David je Asaf kɛ e nyɛminyumu ɔmɛ a he ngɛ lejɛ ɔ, ngɛ Yehowa somi daka a hɛ mi konɛ a ya nɔ nɛ a sɔmɔ ngɛ Daka a hɛ mi kaa bɔ nɛ a peeɔ daa ligbi ɔ.
38 Obed Edom kɛ e nyɛminyumu ɔmɛ, a yibɔ ji 68, nɛ Obed Edom, Yedutun binyumu ɔ, kɛ Hosa ji agbo nya buli;
39 Nɛ osɔfo Zadok kɛ e nyɛmimɛ osɔfo ɔmɛ ngɛ Yehowa bo tsu klɔuklɔu ɔ hɛ mi, ngɛ he nɛ ya hiɔwe* ɔ ngɛ Gibeon
40 konɛ a sã sami afɔle kɛ ha Yehowa daa mɔtu kɛ gbɔkuɛ ngɛ afɔle sami latɛ nɛ a sãã sami afɔle ngɛ nɔ ɔ nɔ, nɛ́ a pee níhi tsuo nɛ a ngma ngɛ Yehowa Mlaa a nɛ e wo Israel ɔ mi.
41 Heman kɛ Yedutun, kɛ nyumu kpahi nɛ a je blɔ wo a biɛ ta a hu piɛɛ a he konɛ a na Yehowa si, ejakaa “e suɔmi nɛ se pui ɔ ngɛ kɛ yaa neneene”;
42 nɛ Heman kɛ Yedutun piɛɛ a he konɛ a kpa titimati ɔmɛ, nɛ a fia ayawa amɛ, kɛ la fiami níhi nɛ a kɛ jeɔ anɔkuale Mawu ɔ yi ɔ;* nɛ Yedutun binyumu ɔmɛ ngɛ agbo ɔ nya.
43 Lɔ ɔ se ɔ, ni ɔmɛ tsuo ho a wehi a mi ya, nɛ David ya nɛ e ya jɔɔ lɛ nitsɛ e we mi bimɛ ɔmɛ.
Sisi Ningmahi
^ Ngɛ Hebri gbi mi ɔ, “nɛ a kai Yehowa, Israel Mawu ɔ.”
^ Aloo “nyɛɛ fia la.”
^ Baiblo komɛ de ke “Nyɛɛ tu e nyakpɛ ní ɔmɛ tsuo a he munyu.”
^ Ngɛ Hebri gbi mi ɔ, “ngmɛdu.” Hyɛ Munyu Komɛ A Sisi Tsɔɔmi.
^ Ngɛ Hebri gbi mi ɔ, “Fami nɛ e fã a.”
^ Aloo “Bumi.”
^ Baiblo komɛ de ke “akɛnɛ e ngɛ klɔuklɔu wawɛɛ ɔ he je.”
^ Aloo “Nyɛ ja.”
^ Aloo “zugba nɛ baa ní ɔ.”
^ Aloo “e be nyɛe ma mimiɛɛ.”
^ Aloo “e ba.”
^ Aloo “wa bua nɛ jɔ ngɛ o yi jemi ɔ mi.”
^ Aloo “Kɛ je neneene kɛ ya neneene.”
^ Aloo “E ba mi jã!”
^ Aloo “níhi nɛ a kɛ fiaa la ha anɔkuale Mawu ɔ.”