1 Kronika 22:1-19
22 Kɛkɛ nɛ David de ke: “Yehowa, anɔkuale Mawu ɔ we ɔ ji nɛ ɔ nɛ, nɛ afɔle sami latɛ nɛ Israel maa sã sami afɔle ngɛ nɔ ji nɛ ɔ nɛ.”
2 Lɔ ɔ se ɔ, David fã ke a bua nibwɔhi nɛ a ngɛ Israel zugba a nɔ ɔ a nya, nɛ e ha nɛ a gba tɛ, nɛ a dla tɛ ɔmɛ a he konɛ a kɛ ma anɔkuale Mawu ɔ we ɔ.
3 Jehanɛ hu ɔ, David bua dadehi babauu nya konɛ a kɛ pee plɛɛkohi kɛ ha agbo ɔmɛ a sinya amɛ kɛ dadehi nɛ a kɛ nuɔ nɔ́, kɛ akɔblee babauu nɛ a nyɛ we nɛ a ngmɛ,
4 kɛ seda tsohi nɛ a li nya, ejakaa Sidonbi ɔmɛ kɛ Tirobi ɔmɛ ba ha David seda tsohi babauu nitsɛ.
5 Nɛ David de ke: “Ye binyumu Salomo wɛ, nɛ e be níhi a si kpami,* nɛ we ɔ nɛ a maa ma ha Yehowa a maa pee we agbo saminyayoo, nɛ a maa tu bɔ nɛ e ngɛ fɛu ha a he munyu ngɛ zugba a tsuo nɔ. Lɔ ɔ he ɔ, ma dla níhi kɛ to ha lɛ.” Enɛ ɔ he ɔ, loko David ma gbo ɔ, e bua níhi babauu nya.
6 Jehanɛ hu ɔ, e tsɛ e binyumu Salomo, nɛ e fã lɛ kaa e ma we kɛ ha Yehowa, Israel Mawu ɔ.
7 David de e binyumu Salomo ke: “Imi lɛɛ, ngɛ ye tsui mi ɔ, jinɛ i suɔ kaa ma ma we kɛ ha Yehowa, ye Mawu ɔ biɛ ɔ.
8 Se Yehowa de mi ke, ‘O pue muɔ babauu si, nɛ o hwu ta nguanguahi. O be we mae kɛ ha ye biɛ ɔ, ejakaa o pue muɔ babauu si ngɛ ye hɛ mi ngɛ zugba a nɔ.
9 Hyɛ! O ma fɔ binyumu, nɛ e maa pee tue mi jɔmi* nɔmlɔ, nɛ ma ha nɛ e he maa jɔ lɛ ngɛ e he nyɛli tsuo nɛ bɔle lɛ kɛ kpe ɔ a dɛ mi, ejakaa a ma tsɛ e biɛ ke Salomo,* nɛ ma ha Israel tue mi jɔmi kɛ he jɔmi ngɛ e be ɔ mi.
10 Lɛ ji nɔ nɛ e maa ma we kɛ ha ye biɛ ɔ. E maa pee ye binyumu, nɛ ma pee e tsɛ. Ma ha nɛ e matsɛ yemi sɛ ɔ maa ma si kpɛii, nɛ e maa ye Israel nɔ kɛ ya neneene.’
11 “Lɔ ɔ he ɔ, ye binyumu, Yehowa nɛ piɛɛ o he, nɛ́ o ye manye, konɛ o ma Yehowa, o Mawu ɔ we ɔ kaa bɔ nɛ e de ke o maa pee ɔ.
12 Ke Yehowa ha mo he wami ngɛ Israel nɔ ɔ, é ha mo hɛ si kami kɛ nɔ́ sisi numi konɛ o nyɛ nɛ o ye Yehowa, o Mawu ɔ mlaa a nɔ.
13 Ke o ye blɔ tsɔɔmihi kɛ kojomihi nɛ Yehowa fã Mose ke e kɛ ha Israel ɔ nɔ sisiisi ɔ, lɛɛ o maa ye manye. Moo pee kã, nɛ o he nɛ wa. Koo ye gbeye, nɛ koo nu sawale hulɔ.
14 Hyɛ, i gbo dengme wawɛɛ kɛ bua sika tsu talɛnt* 100,000 kɛ sika hiɔ talɛnt 1,000,000 nya, kɛ akɔblee kɛ dade babauu nitsɛ nɛ a nyɛ we nɛ a ngmɛ kɛ ha Yehowa we ɔ, nɛ i bua tsohi kɛ tɛhi hu a nya, se o kɛ eko maa piɛɛ he.
15 O ngɛ ní tsuli babauu: tɛ gbali, tɛ gbogbo fiali, tso he ní tsuli, kɛ ga ní tsuli slɔɔtoslɔɔtohi tsuo.
16 Sika tsu, sika hiɔ, akɔblee, kɛ dade ɔmɛ lɛɛ, a nyɛ we nɛ a ngmɛ. Tee si nɛ o je ní tsumi ɔ sisi, nɛ Yehowa nɛ́ piɛɛ o he.”
17 Lɔ ɔ se ɔ, David fã Israel ma nikɔtɔma amɛ tsuo ke a ye bua e binyumu Salomo. E de mɛ ke:
18 “Anɛ Yehowa, nyɛ Mawu ɔ piɛɛ we nyɛ he, nɛ e ha we nyɛ he jɔmi ngɛ he fɛɛ he lo? Ejakaa e ngɔ zugba a nɔ bi ɔmɛ kɛ wo ye dɛ, nɛ Yehowa kɛ e we bi ɔmɛ ye zugba a nɔ.
19 Amlɔ nɛ ɔ, nyɛɛ fia nyɛ pɛɛ si kaa nyɛɛ kɛ nyɛ tsui tsuo kɛ nyɛ klaa* tsuo ma hla Yehowa, nyɛ Mawu ɔ se blɔ, nɛ́ nyɛɛ je Yehowa, anɔkuale Mawu ɔ jami he ɔ mami sisi, konɛ a ngɔ Yehowa somi daka a kɛ anɔkuale Mawu ɔ ní klɔuklɔu ɔmɛ kɛ ba we ɔ nɛ a ma kɛ ha Yehowa biɛ ɔ mi.”
Sisi Ningmahi
^ Aloo “e he wɛ.”
^ Ngɛ Hebri gbi mi ɔ, “he jɔmi.”
^ A je kɛ je Hebri munyungu ko nɛ e sisi ji “Tue Mi Jɔmi” ɔ mi.
^ Talɛnt kake peeɔ kilogram 34.2 (oz t 1,101). Hyɛ Mi Tsɔɔmi Munyu B14.