1 Kronika 28:1-21
28 Lɔ ɔ se ɔ, David kpee Israel ma nikɔtɔma amɛ tsuo kɛ ba Yerusalem: wɛtso ɔmɛ a mi nikɔtɔma amɛ, kuu ɔmɛ nɛ a sɔmɔɔ matsɛ ɔ a nya dali ɔmɛ, nimli akpehi kɛ nimli lafahi a nya dali ɔmɛ, nya dali nɛ a hyɛɔ matsɛ ɔ kɛ e binyumu ɔmɛ a weto ní kɛ a lohwehi tsuo a nɔ ɔ, kɛ matsɛ we ɔ mi nikɔtɔma amɛ kɛ nyumu fɛɛ nyumu nɛ e ji katsɛ ɔ.
2 Kɛkɛ nɛ Matsɛ David te da e nane nɔ, nɛ e de ke:
“Ye nyɛmimɛ nyumuhi kɛ ye we bi, nyɛɛ bu mi tue. Ngɛ ye tsui mi ɔ, jinɛ i suɔ kaa ma ma we nɛ́ maa pee he jɔɔmi he kɛ ha Yehowa somi daka a, kɛ nɔ́ nɛ wa Mawu ɔ kɛ e nane maa ma nɔ, nɛ i dla níhi kɛ to kɛ ha we ɔ mami.
3 Se anɔkuale Mawu ɔ de mi ke, ‘O be we mae kɛ ha ye biɛ ɔ, ejakaa o hwu tahi, nɛ o pue muɔ si.’
4 Se Yehowa, Israel Mawu ɔ hla mi ngɛ ye tsɛ we ɔ konɛ ma ba pee matsɛ, nɛ ma ye Israel nɔ kɛ ya neneene, ejakaa e hla Yuda kaa hɛ mi nyɛɛlɔ, nɛ ngɛ Yuda we ɔ, e hla ye tsɛ we ɔ, nɛ ngɛ ye tsɛ ɔ binyumu ɔmɛ a kpɛti ɔ, imi ji nɔ nɛ e bua jɔ e he, nɛ e wo mi matsɛ konɛ ma ye Israel tsuo nɔ.
5 Yehowa ha mi binyumuhi babauu, nɛ ngɛ ye binyumu ɔmɛ tsuo a kpɛti ɔ, e hla ye binyumu Salomo konɛ e hi Yehowa matsɛ yemi sɛ ɔ nɔ nɛ́ e ye Israel nɔ.
6 “E de mi ke, ‘O binyumu Salomo ji nɔ nɛ maa ma ye we ɔ, kɛ ye yale ɔmɛ, ejakaa i hla lɛ kaa ye binyumu, nɛ ma pee e tsɛ.
7 Ke e fia e pɛɛ si kaa e maa ye ye kita amɛ kɛ ye fami ɔmɛ a nɔ kaa bɔ nɛ e ngɛ pee amlɔ nɛ ɔ, ma ha nɛ e matsɛ yemi ɔ maa ma si kpɛii kɛ ya neneene.’
8 Lɔ ɔ he ɔ, i ngɛ nɔ́ nɛ ɔ dee ngɛ Israel tsuo, nɛ ji Yehowa asafo ɔ hɛ mi, kɛ wa Mawu ɔ hɛ mi ke: Nyɛ hla Yehowa, nyɛ Mawu ɔ kita amɛ tsuo a se blɔ, nɛ nyɛɛ ye a nɔ sisiisi, konɛ zugba kpakpa a nɛ pee nyɛ nɔ́, nɛ nyɛ kɛ ha nyɛ binyumuhi nɛ a maa ba ngɛ nyɛ se ɔ kaa gbosi ní kɛ ya neneene.
9 “Nɛ mo ye binyumu Salomo, moo le o tsɛ ɔ Mawu ɔ, nɛ o sɔmɔ lɛ kɛ o tsui tsuo, nɛ o je o suɔmi mi hu kɛ sɔmɔ lɛ,* ejakaa Yehowa hlaa tsuihi tsuo a mi, nɛ e naa susumi fɛɛ susumi nɛ ngɛ juɛmi ɔ mi. Ke o hla e se blɔ ɔ, e ma ha nɛ o na lɛ, se ke o je e he ɔ, e ma kua mo kɛ ya neneene.
10 Hyɛ, amlɔ nɛ ɔ, Yehowa hla mo kaa o ma we nɛ a kɛ maa pee jami he. Moo pee kã, nɛ o ya tsu ní.”
11 Kɛkɛ nɛ David ngɔ foni ɔ nɛ a maa hyɛ nɔ kɛ ma ablanaa kɛ e he we ɔmɛ, nito he tsu ɔmɛ, hiɔwe tsu ɔmɛ, se tsu ɔmɛ, kɛ kpatami we* ɔ kɛ ha e binyumu Salomo.
12 E ngɔ foni ɔ nɛ a maa hyɛ nɔ kɛ pee nɔ́ fɛɛ nɔ́ nɛ a je kɛ tsɔɔ lɛ ngɛ nina mi* kɛ kɔ Yehowa we ɔ yale ɔmɛ, ní yemi tsuhi tsuo nɛ bɔle lɛ ɔ, anɔkuale Mawu ɔ we ɔ juetli to he ɔmɛ, kɛ níhi nɛ a pee mɛ klɔuklɔu* ɔ a to he ɔmɛ a he ɔ kɛ ha lɛ;
13 jehanɛ hu ɔ, e kɛ Levibi ɔmɛ kɛ osɔfo ɔmɛ nɛ a gba a mi kɛ wo kuuhi a mi ɔ, ní tsumi nɛ a ma tsu ngɛ Yehowa we ɔ, kɛ níhi tsuo nɛ a kɛ ma sɔmɔ ngɛ Yehowa we ɔ he blɔ tsɔɔmi ha lɛ;
14 jehanɛ hu ɔ, e tsɔɔ lɛ sika tsu ɔ, nɛ ji sika tsu nɛ a kɛ maa pee níhi nɛ a kɛ ma tsu sɔmɔmi ní tsumi slɔɔto ɔmɛ a jiɔmi, kɛ sika hiɔ níhi tsuo a jiɔmi, nɛ e tsɔɔ lɛ níhi tsuo nɛ a kɛ ma tsu sɔmɔmi ní tsumi slɔɔto ɔmɛ hulɔ;
15 jehanɛ hu ɔ, e tsɔɔ lɛ sika tsu kane tso ɔmɛ kɛ a sika tsu kane ɔmɛ a jiɔmi, kane tso slɔɔto ɔmɛ kɛ a kane ɔmɛ a jiɔmi, kɛ sika hiɔ kane tso ɔmɛ a jiɔmi, ngɛ kane tso fɛɛ kane tso kɛ e kane ɔmɛ a ní tsumi nya;
16 jehanɛ hu ɔ, e tsɔɔ lɛ sika tsu nɛ a kɛ maa pee hɛ mi mami abolo* okplɔɔ ɔmɛ ɔ eko fɛɛ eko jiɔmi, kɛ sika hiɔ nɛ a kɛ maa pee sika hiɔ okplɔɔ ɔmɛ,
17 kɛ fɔɔki ɔmɛ, tsesi ɔmɛ, kplu ngua amɛ nɛ a kɛ sika tsu ngmingmiingmi pee ɔ, kɛ sika tsu tsesi tsɔwi ɔmɛ eko fɛɛ eko jiɔmi, kɛ sika hiɔ tsesi tsɔwi ɔmɛ eko fɛɛ eko jiɔmi.
18 Jehanɛ hu ɔ, e tsɔɔ sika tsu nɛ a tsu he nɛ a kɛ maa pee afɔle sami latɛ nɛ a maa sã tsopa kɛ e he via ngɛ nɔ ɔ, kɛ nɔ́ nɛ daa si kɛ ha zugba lɛ ɔ, nɛ ji sika tsu kerub ɔmɛ nɛ a gbɛ a pɛlihi a mi kɛ ha Yehowa somi daka a nɔ ɔ a jiɔmi.
19 David de ke: “Yehowa nine ngɛ ye nɔ, nɛ e ha mi nɔ́ se kɔmi konɛ ma ngma tsu ɔ he níhi tsuo fitsofitso kɛ fɔ si.”
20 Kɛkɛ nɛ David de e binyumu Salomo ke: “Moo pee kã, nɛ o he nɛ wa, nɛ o ya tsu ní. Koo ye gbeye, nɛ koo nu sawale hulɔ, ejakaa Yehowa Mawu, nɛ ji ye Mawu ɔ kɛ mo ngɛ. E be mo sie, nɛ e be mo kuae, mohu ɔ, e maa piɛɛ o he kɛ ya si be nɛ o maa gbe Yehowa we ɔ sɔmɔmi ní tsumi ɔ tsuo nya.
21 Nɛ hyɛ, osɔfo ɔmɛ kɛ Levibi ɔmɛ a kuu ɔmɛ nɛ a ma tsu anɔkuale Mawu ɔ we ɔ sɔmɔmi ní tsumi ɔ tsuo ɔ ji nɛ ɔ nɛ. O ngɛ ga ní tsuli nɛ a suɔ kaa a ma tsu sɔmɔmi ní tsumi saisaa, kɛ ma nikɔtɔmahi kɛ ma a tsuo nɛ a maa ye blɔ tsɔɔmihi tsuo nɛ o ma ha mɛ ɔ nɔ.”
Sisi Ningmahi
^ Aloo “o sɔmɔ lɛ kɛ klaa nɛ ngɛ bua jɔmi.” Hyɛ Munyu Komɛ A Sisi Tsɔɔmi.
^ Ngɛ Hebri gbi mi ɔ, “kpatami nya nɔ́ we.”
^ Ngɛ Hebri gbi mi ɔ, “nɛ mumi ɔ je tsɔɔ lɛ.”
^ Aloo “níhi nɛ a jɔɔ nɔ.”
^ Nɛ ji abolo nɛ a toɔ ɔ.
