1 Kronika 29:1-30
29 Jehanɛ ɔ, Matsɛ David de asafo ɔ tsuo ke: “Ye binyumu Salomo, nɔ nɛ Mawu hla a wɛ, nɛ e be níhi a si kpami,* nɛ ní tsumi ɔ kle, ejakaa sɔlemi we* ɔ nɛ a maa ma a, pi adesa ko nɔ́, mohu ɔ, Yehowa Mawu nɔ́.
2 Nɛ i bɔ mɔde wawɛɛ nɛ i bua níhi a nya konɛ a kɛ ma ye Mawu ɔ we ɔ; sika tsu nɛ a kɛ ma tsu sika tsu ní tsumi ɔmɛ, sika hiɔ nɛ a kɛ ma tsu sika hiɔ ní tsumi ɔmɛ, akɔblee nɛ a kɛ ma tsu akɔblee ní tsumi ɔmɛ, dade nɛ a kɛ ma tsu dade ní tsumi ɔmɛ, tsohi nɛ a kɛ ma tsu tso ní tsumi ɔmɛ, oniks tɛhi, kɛ tɛhi nɛ a kɛ mɔɔta maa fia, tɛ tsɔwitsɔwihi nɛ a ngɛ fɛu nɛ a kɛ tɛniɔ níhi, tɛ saisaa nɛ he jua wa, kɛ alabastro tɛhi babauu.
3 Jehanɛ hu ɔ, akɛnɛ ye bua jɔ ye Mawu ɔ we ɔ he he je ɔ, i kɛ imi nitsɛ ye sika tsu kɛ ye sika hiɔ ngɛ hae konɛ a kɛ ma ye Mawu ɔ we ɔ, kɛ piɛɛ níhi tsuo nɛ i dla kɛ to kɛ ha we klɔuklɔu ɔ mami ɔ he.
4 I ha sika tsu nɛ je Ofir talɛnt* 3,000, kɛ sika hiɔ nɛ a tsu he talɛnt 7,000 konɛ a kɛ ha gbogbo ɔmɛ a he ngɛ we ɔmɛ a mi,
5 sika tsu nɛ a kɛ ma tsu sika tsu ní tsumi ɔmɛ, kɛ sika hiɔ nɛ a kɛ ma tsu sika hiɔ ní tsumi ɔmɛ, kɛ nɔ́ nɛ a kɛ ma tsu ní tsumihi tsuo nɛ ga ní tsuli ɔmɛ ma tsu ɔ. Amlɔ nɛ ɔ, mɛnɔ suɔ kaa e maa je e tsui mi faa nɛ e ke Yehowa ní mwɔnɛ ɔ?”
6 Lɔ ɔ he ɔ, a tsɛmɛ a we ɔmɛ a mi nikɔtɔma amɛ, Israel wɛtso ɔmɛ a mi nikɔtɔma amɛ, nimli akpehi kɛ nimli lafahi a nya dali ɔmɛ, kɛ matsɛ ɔ ní tsumihi a nya dali ɔmɛ je a tsui mi faa nɛ a ba.
7 Nɛ a ha ní nɛ ɔmɛ konɛ a kɛ tsu anɔkuale Mawu ɔ we ɔ sɔmɔmi ní tsumi ɔ: sika tsu talɛnt 5,000, darik* 10,000, sika hiɔ talɛnt 10,000, akɔblee talɛnt 18,000, kɛ dade talɛnt 100,000.
8 Nɔ fɛɛ nɔ nɛ ngɛ tɛ nɛ he jua wa a ngɔ kɛ ya Yehowa we ɔ juetli to he ɔ. Yehiel, Gershonno ɔ ji nɔ nɛ hyɛɔ juetli to he ɔ nɔ.
9 Ni ɔmɛ nya ngɛ afɔlehi nɛ a je a tsui mi faa kɛ ha a he je, ejakaa a kɛ a tsui tsuo lɛ ha Yehowa afɔlehi nɛ je tsui mi faa nɛ ɔ nɛ, nɛ Matsɛ David hu nya wawɛɛ nitsɛ.
10 Kɛkɛ nɛ David je Yehowa yi ngɛ asafo ɔ tsuo hɛ mi. David de ke: “Oo wa tsɛ Yehowa, Israel Mawu, a je o yi kɛ ya neneene.*
11 Oo Yehowa, o kle, nɛ o nɔ́ ji he wami ɔ, kɛ afɛu ɔ, kɛ hɛ mi nyami ɔ, kɛ agboje* ɔ, ejakaa nɔ́ fɛɛ nɔ́ nɛ ngɛ hiɔwe kɛ zugba a nɔ ɔ, o nɔ́. Oo Yehowa, o nɔ́ ji matsɛ yemi ɔ nɛ. Mo ji Nɔ nɛ wo e he nɔ gojoo kaa yi kɛ ha níhi tsuo ɔ nɛ.
12 Ní nami kɛ hɛ mi nyami jeɔ o ngɔ, nɛ o yeɔ nɔ́ fɛɛ nɔ́ nɔ, nɛ he wami kɛ nyɛmi ngɛ o dɛ, nɛ o nyɛɔ peeɔ nihi tsuo nimli nguahi, nɛ o haa mɛ he wami.
13 Nɛ amlɔ nɛ ɔ, Oo wa Mawu, wa ngɛ mo si nae, nɛ wa ngɛ o biɛ nɛ hɛ mi ngɛ nyami ɔ yi jee.
14 “Se kɛ̃ ɔ, mɛnɔ ji mi, nɛ mɛnɔmɛ ji ye we bi ɔmɛ nɛ e sa kaa wa nyɛ nɛ wa ha afɔlehi nɛ je tsui mi faa kikɛ nɛ ɔ? Ejakaa nɔ́ fɛɛ nɔ́ je o ngɔ, nɛ nɔ́ nɛ wa ná kɛ je mo nitsɛ o dɛ ɔ lɛ waa kɛ ba ha mo ɔ nɛ.
15 Ejakaa wa ji nibwɔhi kɛ blɔ hiali ngɛ o hɛ mi kaa bɔ nɛ e ji ngɛ wa nɛmɛ ɔmɛ tsuo a blɔ fa mi ɔ. Ejakaa ligbihi nɛ wa yeɔ ngɛ zugba a nɔ ɔ ngɛ kaa nini, hɛnɔkami ko be.
16 Oo Yehowa wa Mawu, ní nɛ ɔmɛ tsuo nɛ wa dla kɛ to konɛ a kɛ ma we kɛ ha o biɛ klɔuklɔu ɔ, mo nitsɛ o dɛ lɛ wa ná kɛ je, nɛ o níhi ji ní nɛ ɔmɛ tsuo.
17 Oo ye Mawu, i le heii kaa o hyɛɔ tsui mi, nɛ o bua jɔ anɔkuale yemi* he. I kɛ tsui nɛ da* lɛ ke mo ní nɛ ɔmɛ tsuo faa a nɛ, nɛ ye bua jɔ wawɛɛ kaa i na kaa o we bi nɛ a ngɛ hiɛ ɔ hu ha mo afɔlehi nɛ je tsui mi faa.
18 Oo Yehowa, wa nɛmɛ Abraham, Isak, kɛ Israel a Mawu, mo ha nɛ suɔmi kɛ susumi nɛ o we bi ɔmɛ ná nɛ ɔ nɛ hi a tsui mi kɛ ya neneene, nɛ́ o dɔ a tsui kɛ ba o ngɔ.
19 Nɛ́ o ha nɛ ye binyumu Salomo nɛ ngɔ e tsui tsuo kɛ ha mo, konɛ e ye o kita amɛ, o kaimi ɔmɛ, kɛ o blɔ tsɔɔmi ɔmɛ a nɔ, nɛ́ e pee ní nɛ ɔmɛ tsuo, nɛ́ e ma sɔlemi we* ɔ nɛ i dla níhi kɛ to kaa a kɛ ma a.”
20 Kɛkɛ nɛ David de asafo ɔ tsuo ke: “Amlɔ nɛ ɔ, nyɛ je Yehowa, nyɛ Mawu ɔ yi.” Nɛ asafo ɔ tsuo je Yehowa, a nɛmɛ a Mawu ɔ yi, nɛ a kplã si, nɛ a ngɔ a hɛ mi kɛ bu si ha Yehowa kɛ matsɛ ɔ.
21 Nɛ a ya nɔ nɛ a sã afɔlehi kɛ ha Yehowa, nɛ e nɔ jena a, a sã sami afɔlehi kɛ ha Yehowa. A sã na ku wawi 1,000, agbosu 1,000, kɛ jijɔ ku wawi 1,000, kɛ a he dã afɔlehi; a sã afɔlehi babauu kɛ ha Israel tsuo.
22 A ya nɔ nɛ a ye ní, nɛ a nu ní, nɛ a nya wawɛɛ ngɛ Yehowa hɛ mi jamɛ a ligbi ɔ, nɛ a wo David binyumu Salomo matsɛ si enyɔne, nɛ a pɔ lɛ nu ngɛ Yehowa hɛ mi kaa hɛ mi nyɛɛlɔ, nɛ a pɔ Zadok hu nu kaa osɔfo.
23 Nɛ Salomo hi Yehowa matsɛ sɛ ɔ nɔ kaa matsɛ ngɛ e tsɛ David nane mi, nɛ e ye manye, nɛ Israelbi ɔmɛ tsuo bu lɛ tue.
24 Ma nikɔtɔma amɛ tsuo, kɛ tatsɛmɛ nɛ a he wa a, kɛ Matsɛ David binyumu ɔmɛ tsuo ba a he si ha Matsɛ Salomo.
25 Nɛ Yehowa pee Salomo nɔmlɔ ngua nitsɛnitsɛ ngɛ Israel tsuo hɛ mi, nɛ e ha nɛ e matsɛ yemi ɔ hɛ mi ba nyami pe Israel matsɛmɛ nɛ a sɛ e hlami ɔ.
26 David, Yese* binyumu ɔ ye Israel tsuo nɔ matsɛ,
27 nɛ jeha* abɔ nɛ e kɛ ye Israel nɔ ji jeha 40. E hi Hebron kɛ ye nɔ jeha 7, nɛ e hi Yerusalem kɛ ye nɔ jeha 33.
28 Nɛ e wa saminya loko e gbo, nɛ ligbihi fuu nɛ e ye,* kɛ ní nɛ e ná, kɛ e hɛ mi nɛ ba nyami ɔ ha nɛ e tsui nɔ e mi; nɛ e binyumu Salomo ba ye matsɛ ngɛ e se.
29 Matsɛ David he sane, kɛ je sisije kɛ ya si nyagbe ɔ, a ngma ngɛ ní nalɔ Samuel, gbalɔ Natan, kɛ ní nalɔ Gad a womi ɔmɛ a mi,
30 nɛ a ngma e matsɛ yemi ɔ mi sanehi tsuo, e he wami ɔ, kɛ níhi nɛ ya nɔ kɛ kɔ e kɛ Israel kɛ matsɛ yemihi tsuo nɛ bɔle lɛ ɔ a he ɔ hu kɛ piɛɛ he.
Sisi Ningmahi
^ Aloo “e he wɛ.”
^ Aloo “matsɛ ma nɛ a fia gbogbo wo he; matsɛ we.”
^ Talɛnt kake peeɔ kilogram 34.2 (oz t 1,101). Hyɛ Mi Tsɔɔmi Munyu B14.
^ Darik ji Persia bi a sika ko nɛ a kɛ sika tsu pee. Hyɛ Mi Tsɔɔmi Munyu B14.
^ Aloo “kɛ je neneene kɛ ya neneene.”
^ Aloo “bumi.”
^ Aloo “nɔ́ nɛ da.”
^ Aloo “tsui nɛ mi tsɔ.”
^ Aloo “matsɛ ma nɛ a fia gbogbo wo he; matsɛ we.”
^ Aloo “Ishai.”
^ Ngɛ Hebri gbi mi ɔ, “ligbi.”
^ Aloo, “nɛ e se nɛ kɛ ngɛ je mi.”
