1 Kronika 5:1-26
5 Ruben, nɛ ji Israel kekleekle bi ɔ binyumuhi ji nɛ ɔmɛ nɛ. Lɛ ji kekleekle bi, se akɛnɛ e ble e tsɛ sa he je ɔ, a ngɔ e bitɛte blɔ nya a kɛ ha Israel binyumu Yosef binyumu ɔmɛ, lɔ ɔ he ɔ, a ngmɛ e biɛ ngɛ a weku kpa womi ɔ mi kaa lɛ nɛ e hɛɛ bitɛte blɔ nya.
2 E ngɛ mi kaa Yuda nɔ kuɔ pe e nyɛminyumu ɔmɛ, nɛ e mi lɛ nɔ nɛ maa pee hɛ mi nyɛɛlɔ ɔ maa je kɛ ba mohu lɛɛ, se a kɛ bitɛte blɔ nya a ha Yosef.
3 Ruben nɛ ji Israel kekleekle bi ɔ binyumuhi ji Hanok, Palu, Hezron, kɛ Karmi.
4 Yoel binyumu* ji Shemaya, Shemaya binyumu ji Gog, Gog binyumu ji Shimei,
5 Shimei binyumu ji Mika, Mika binyumu ji Reaya, Reaya binyumu ji Baal,
6 Baal binyumu ji Beera, nɔ nɛ Asiria Matsɛ Tilgat Pilneser ngɔ lɛ nyɔguɛ ɔ; lɛ ji Rubenbi ɔmɛ a ganɔ.
7 Beera nyɛminyumu ɔmɛ a biɛ ngɛ a weku ɔmɛ a nya nɛ a ngma ngɛ a weku kpa womi ɔ mi ji nɛ ɔ nɛ: Yeyel, nɛ ji a nyatsɛ ɔ, Zakaria,
8 kɛ Bela, nɔ nɛ e tsɛ ji Azaz ɔ. Azaz tsɛ ji Shema, Shema tsɛ ji Yoel, nɔ nɛ hi Aroer kɛ ya si Nebo kɛ Baal Meon tɔɔ ɔ.
9 E hi puje he blɔ kɛ ya si nga a nɛ je Yufrate Pa a he ɔ nya, ejakaa a lohwe ɔmɛ a he ba hiɛ babauu ngɛ Gilead zugba a nɔ.
10 Ngɛ Saul be ɔ mi ɔ, a kɛ Hagribi ɔmɛ hwu ta, nɛ a ye Hagribi ɔmɛ a nɔ kunimi, nɛ a hi a bo tsu ɔmɛ a mi ngɛ Gilead puje he blɔ tsuo.
11 Jamɛ a be ɔ, Gad sisi bimɛ ɔmɛ hi a kasa nya ngɛ Bashan zugba a nɔ kɛ ya si Saleka tɔɔ.
12 Yoel ji a nyatsɛ ngɛ Bashan, Shafam ji nɔ enyɔne, nɛ Yanai kɛ Shafat hu ji hɛ mi nyɛɛli.
13 Nɛ a nyɛminyumuhi nɛ a je a tsɛmɛ a we ɔmɛ a mi ɔ ji Mikael, Meshulam, Sheba, Yorai, Yakan, Zia, kɛ Eber, mɛ tsuo a yibɔ ji kpaago.
14 Ni nɛ ɔmɛ ji Abihail binyumuhi. Abihail tsɛ ji Huri, Huri tsɛ ji Yaroa, Yaroa tsɛ ji Gilead, Gilead tsɛ ji Mikael, Mikael tsɛ ji Yeshishai, Yeshishai tsɛ ji Yado, Yado tsɛ ji Buz.
15 Guni binyumu Abdiel binyumu Ahi ji a tsɛ we ɔ nyatsɛ.
16 A hi Gilead kɛ Bashan kɛ mahi nɛ bɔle lɛ* ɔ a mi, kɛ lohwehi a ní yemi hehi tsuo nɛ ngɛ Sharon ɔ kɛ ya si a huzu ɔmɛ a nya tɔɔ.
17 A ngma mɛ tsuo a biɛ ngɛ a weku kpa womi ɔ mi ngɛ Yuda Matsɛ Yotam be ɔ mi kɛ Israel Matsɛ Yeroboam* be ɔ mi.
18 Rubenbi ɔmɛ, Gadbi ɔmɛ, kɛ Manase wɛtso fã a ngɛ tatsɛmɛ nɛ a he wa 44,760 ngɛ a tabo ɔ mi, nɛ́ a hɛɛɔ tsɛ̃ihi, kɛ klaatehi, kɛ kɛ̃ɛ̃hi,* nɛ a tsɔse mɛ kɛ ha ta hwumi.
19 A kɛ Hagribi ɔmɛ, Yetur, Nafish, kɛ Nodab hwu ta.
20 Nɛ benɛ a kɛ mɛ ngɛ ta a hwue ɔ, Mawu ye bua mɛ, nɛ e ngɔ Hagribi ɔmɛ kɛ nihi tsuo nɛ a piɛɛ Hagribi ɔmɛ a he ɔ kɛ wo a dɛ mi, ejakaa a tsɛ lɛ kaa e ye bua mɛ ngɛ ta a mi, nɛ e bu a pɛɛ kpami ɔ tue, akɛnɛ a ngɔ a hɛ kɛ fɔ e nɔ ɔ he je.
21 A nuu a lohwe ɔmɛ: afukpɔngɔ 50,000, jijɔ 250,000, kɛ teji 2,000, kɛ nimli* 100,000.
22 A gbe nihi fuu, ejakaa ta a, anɔkuale Mawu ɔ lɛ hwu. Nɛ a hi lejɛ ɔ ngɛ a nane mi kɛ ya si be nɛ a ba nuu mɛ kɛ ho nyɔguɛ tso mi ya.
23 Manase wɛtso fã a nina amɛ hi zugba a nɔ kɛ je Bashan kɛ ya si Baal Hermon kɛ Senir kɛ Hermon Yoku ɔ nɔ. A he hiɛ babauu nitsɛ.
24 A tsɛmɛ ɔmɛ a we ɔmɛ a nyatsɛmɛ ji nɛ ɔmɛ nɛ: Efer, Ishi, Eliel, Azriel, Yeremia, Hodavia, kɛ Yadiel; a ji tatsɛmɛ nɛ a he wa, nyumuhi nɛ a he biɛ, kɛ a tsɛmɛ a we ɔmɛ a nyatsɛmɛ.
25 Se a yi a nɛmɛ a Mawu ɔ anɔkuale, nɛ a ya ja zugba a nɔ bi ɔmɛ nɛ Mawu kpata a hɛ mi ngɛ a hɛ mi ɔ a mawu ɔmɛ.
26 Lɔ ɔ he ɔ, Israel Mawu ɔ ngɔ kɛ wo Asiria Matsɛ Pul (nɛ ji Asiria Matsɛ Tilgat Pilneser) tsui mi* nɛ e ya ngɔ Rubenbi ɔmɛ, Gadbi ɔmɛ, kɛ Manase wɛtso fã a nyɔguɛ, nɛ e ngɔ mɛ kɛ ho Hala, Habor, Hara, kɛ Gozan pa a nya ya, nɛ a ngɛ lejɛ ɔ kɛ ba si mwɔnɛ ligbi nɛ ɔ.
Sisi Ningmahi
^ Ngɛ Hebri gbi mi ɔ, “binyumuhi.”
^ Aloo “mahi nɛ ngɛ e sisi.”
^ Nɛ ji, Yeroboam enyɔne ɔ.
^ Ngɛ Hebri gbi mi ɔ, “a dɔɔ kɛ̃ɛ̃ mi.”
^ Aloo “adesa klaahi.”
^ Ngɛ Hebri gbi mi ɔ, “wo e mumi ɔ he la.”
