1 Mose 25:1-34
25 Jehanɛ ɔ, Abraham ngɔ yo ekohu, nɛ a tsɛɛ lɛ ke Ketura.
2 Pee se ɔ, e fɔ Zimran, Yokshan, Medan, Midian, Ishbak kɛ Shuah kɛ ha lɛ.
3 Yokshan fɔ Sheba kɛ Dedan.
Dedan binyumuhi ji Ashurim, Letushim, kɛ Leumim.
4 Midian binyumuhi ji Efa, Efer, Hanok, Abida, kɛ Eldaa.
Ketura binyumuhi ji mɛ tsuo.
5 Pee se ɔ, Abraham ngɔ nɔ́ fɛɛ nɔ́ nɛ e ngɛ ɔ kɛ ha Isak,
6 se Abraham ke e binyumu ɔmɛ nɛ e kɛ e yi kpa amɛ fɔ ɔ ní. Benɛ e ngɛ wami mi loloolo ɔ, e wo mɛ blɔ kɛ ho puje he blɔ ya kɛ je e binyumu Isak he. E wo mɛ blɔ kɛ ho Puje He zugba a nɔ ya.
7 Jeha nɛ Abraham ye ngɛ e wami si himi mi ji jeha 175.
8 Benɛ Abraham bwɔ nɛ e tsui nɔ e mi ngɛ si himi mi ɔ, e wo e nyagbe mumu nɛ e gbo be mi nɛ e wa saminya. Nɛ a pu lɛ kaa bɔ nɛ a pu e nɛmɛ ɔmɛ ɔ.*
9 E binyumu Isak kɛ e binyumu Ishmael pu lɛ ngɛ Makpela tɛ puɔ ɔ mi ngɛ Efron, Hit no Zohar binyumu ɔ zugba a nɛ ngɛ Mamre hɛ mi ɔ,
10 nɛ ji zugba nɛ Abraham he ngɛ Het binyumu ɔmɛ a dɛ ɔ mi. A pu Abraham ngɛ lejɛ ɔ kɛ piɛɛ e yo Sara he.
11 Ngɛ Abraham gbenɔ se ɔ, Mawu ya nɔ nɛ e jɔɔ e binyumu Isak, nɛ Isak hi Beer-lahairoi kasa nya.
12 Ishmael, Abraham binyumu ɔ nɛ Egipt no Hagar, nɛ ji Sara mawayo ɔ fɔ ha Abraham ɔ he sane ji nɛ ɔ nɛ.
13 Ishmael binyumu ɔmɛ a biɛhi, kɛ wekuhi nɛ je a mi ɔ a biɛhi ji nɛ ɔmɛ nɛ: Ishmael kekleekle bi ji Nebayot, nɛ e se ɔ, Kedar, Adbeel, Mibsam,
14 Mishma, Duma, Masa,
15 Hadad, Tema, Yetur, Nafish, kɛ Kedema.
16 Ishmael binyumu ɔmɛ ji nɛ ɔmɛ nɛ, nɛ a biɛhi ngɛ a hi hehi kɛ a sito hehi* a nya ji nɛ ɔmɛ nɛ; a ji ganɔhi 12 kɛ a wɛtsohi.
17 Nɛ Ishmael hi si jeha 137. Kɛkɛ nɛ e wo e nyagbe mumu nɛ e gbo nɛ a pu lɛ kaa bɔ nɛ a pu e nɛmɛ ɔmɛ ɔ.*
18 Nɛ a hi kɛ je Havila nɛ ngɛ Shur kasa nya, nɛ́ e kɛ Egipt he kɛ we ɔ, hluu kɛ ya si Asiria tɔɔ. E hi e nyɛminyumu ɔmɛ tsuo a kasa nya.*
19 Abraham binyumu Isak he sane ji nɛ ɔ nɛ.
Abraham fɔ Isak.
20 Benɛ Isak ye jeha 40 ɔ, e ngɔ Rebeka. Rebeka ji Betuel nɛ ji Aram no nɛ e je Padanaram ɔ biyo. Rebeka ji Laban, Aram no ɔ nyɛmiyo.
21 Isak ya nɔ nɛ e kpa Yehowa pɛɛ ngɛ e yo ɔ he je, ejakaa yosa ji lɛ; lɔ ɔ he ɔ, Yehowa bu e pɛɛ kpami ɔ tue, nɛ e yo Rebeka ba ngɔ hɔ.
22 Nɛ binyumu ɔmɛ nɛ a ngɛ Rebeka mi mi ɔ kɛ a sibi bɔni kunɔ nɔmi, lɔ ɔ he ɔ, e de ke: “Ke kikɛ ji bɔ nɛ e ngɛ ɔ, lɛɛ mɛni he je nɛ e sa nɛ ma ya nɔ nɛ ma hi wami mi mɔ?” Lɔ ɔ he ɔ, e ya bi Yehowa juɛmi.
23 Nɛ Yehowa de lɛ ke: “Je mahi enyɔ ngɛ o fɔmi kotoku ɔ mi, nɛ mahi enyɔ maa je o mi, nɛ a mi ma gba; nɛ ma kake he maa wa pe ma kake, nɛ nɔkɔtɔma a ma sɔmɔ jokuɛ ɔ.”
24 Benɛ be ba su nɛ e ma fɔ ɔ, hyɛ! hawi ngɛ e fɔmi kotoku ɔ mi.
25 Kɛkɛ nɛ nɔ nɛ ba kekle ɔ tsuɔ papaapa, nɛ e he womi ngɛ kaa tade nɛ a kɛ bwɔmi pee, lɔ ɔ he ɔ, a wo lɛ biɛ ke Esau.*
26 Lɔ ɔ se ɔ, e nyɛminyumu ɔ je kpo nɛ e kɛ e nine nu Esau nane se ja, lɔ ɔ he ɔ, e wo lɛ biɛ ke Yakob.* Isak ye jeha 60 benɛ Rebeka fɔ mɛ ɔ.
27 Benɛ nyumuwi ɔmɛ ngɛ wae ɔ, Esau ba pee detsɛ nɛ e he be, nɛ e pɔɔ nga mi himi, se Yakob lɛɛ sane ko be e he, nɛ e hiɔ bo tsuhi a mi.
28 Isak suɔ Esau, ejakaa e haa lɛ de lo nɛ e yeɔ, se Rebeka lɛɛ e suɔ Yakob.
29 Ligbi ko nɛ Yakob ngɛ flɔɔ pee ɔ, Esau je nga a nɔ kɛ ba kɛ pɔtɔ.
30 Lɔ ɔ he ɔ, Esau de Yakob ke: “I kpa mo pɛɛ, o he nɛ e sɔ nɛ o ha mi o flɔɔ tsutsu* nɛ ɔ eko,* ejakaa pɔ tɔ ye he!”* Lɔ ɔ he je nɛ a tsɛɛ lɛ ke Edom* ɔ nɛ.
31 Kɛkɛ nɛ Yakob de lɛ ke: “Kekleekle ɔ, jua o blɔ nya kaa bitɛte ɔ ngɔ ha mi!”
32 Esau tsa nɔ ke: “Hyɛ, i miɔ nɛ ma gbo! Mɛni i kɛ bitɛte blɔ nya maa pee?”
33 Yakob hu de ke: “Kã mi kita kekle!” Lɔ ɔ he ɔ, e kã lɛ kita nɛ e jua e blɔ nya kaa bitɛte ɔ kɛ ha Yakob.
34 Kɛkɛ nɛ Yakob ha Esau abolo kɛ yɔ flɔɔ, nɛ e ye ní nɛ e nu ní, nɛ e te si kɛ ho. Lɔ ɔ he ɔ, Esau bui bitɛte blɔ nya a fɛɛ.
Sisi Ningmahi
^ Ngɛ Hebri gbi mi ɔ, “nɛ a bua e nya kɛ ya piɛɛ e we bi ɔmɛ a he.” E ji asilɛ munyu nɛ daa si kɛ ha gbenɔ.
^ Aloo “si tomi hehi nɛ a fia gbogbo wo a he ɔ.”
^ Ngɛ Hebri gbi mi ɔ, “nɛ a bua e nya kɛ ya piɛɛ e we bi ɔmɛ a he.” E ji asilɛ munyu nɛ daa si kɛ ha gbenɔ.
^ Baiblo komɛ de ke “E kɛ e nyɛmimɛ ɔmɛ tsuo yi.”
^ E sisi ji “Bwɔmitsɛ.”
^ E sisi ji “Nane Se Ja Nulɔ; Nɔ Blɔ Nya Kpɔlɔ.”
^ Ngɛ Hebri gbi mi ɔ, “tsutsu.”
^ Aloo “nya mi bɔ kake.”
^ Aloo “hwɔ gbe mi.”
^ E sisi ji, “Tsutsu.”
