1 Mose 26:1-35
26 Jehanɛ ɔ, hwɔ ko kpale ba zugba a nɔ kɛ piɛɛ kekleekle hwɔ nɛ ba ngɛ Abraham be ɔ mi ɔ he, enɛ ɔ he ɔ, Isak ya Abimelek, Filisti bi ɔmɛ a matsɛ ɔ ngɔ ngɛ Gerar.
2 Kɛkɛ nɛ Yehowa je e he kpo kɛ tsɔɔ lɛ nɛ e de ke: “Ko kple kɛ ya Egipt. Hii zugba nɛ ma tsɔɔ mo ɔ nɔ.
3 Hii zugba nɛ ɔ nɔ kaa ma se no, nɛ i kɛ mo maa hi si nɛ ma jɔɔ mo, ejakaa ma ngɔ zugba nɛ ɔmɛ tsuo kɛ ha o kɛ o nina,* nɛ ma ye kita nɛ i kã o tsɛ Abraham ɔ nɔ. I de lɛ ke:
4 ‘Ma ha nɛ o nina* maa hiɛ kaa hiɔwe dodoehi; nɛ ma ngɔ zugba nɛ ɔmɛ tsuo kɛ ha o nina;* nɛ zugba a nɔ je mahi tsuo maa gu o nina a* nɔ kɛ ná jɔɔmi,’
5 akɛnɛ Abraham bu ye gbi tue, nɛ e ya nɔ nɛ e pee níhi nɛ i ngɛ hlae ɔ, nɛ e ye ye fami ɔmɛ, kɛ ye blɔ tsɔɔmi ɔmɛ, kɛ ye mlaa amɛ a nɔ ɔ he je.”
6 Lɔ ɔ he ɔ, Isak ya nɔ nɛ e hi Gerar.
7 Be fɛɛ be nɛ nyumu ɔmɛ nɛ a ngɛ lejɛ ɔ ma bi lɛ e yo ɔ he sane ɔ, e deɔ mɛ ke: “Ye nyɛmiyo ji lɛ.” E ye gbeye kaa e ma de ke, “Ye yo ji lɛ,” ejakaa e de ke, “Eko ɔ, nyumuhi nɛ a ngɛ hiɛ ɔ maa gbe mi ngɛ Rebeka he je,” ejakaa e he ngɛ fɛu saminya.
8 Be komɛ a se ɔ, Abimelek, Filisti bi ɔmɛ a matsɛ ɔ ngɛ e saflɛ mi hyɛe, nɛ e na Isak nɛ e ngɛ suɔmi kpo jee ha e yo Rebeka.*
9 Amlɔ nɔuu nɛ Abimelek tsɛ Isak nɛ e de lɛ ke: “Ngɛ anɔkuale mi ɔ, o yo ji lɛ! Mɛni he je nɛ o de ke o nyɛmiyo ji lɛ ɔ?” Kɛkɛ nɛ Isak de lɛ ke: “I de jã, ejakaa i ye gbeye kaa ma gbo ngɛ e he je.”
10 Se Abimelek ya nɔ nɛ e de lɛ ke: “Mɛni o pee wɔ nɛ ɔ? Jinɛ ma mi bi ɔmɛ a ti nɔ ko kɛ o yo ɔ ko ná bɔmi faa, nɛ o ko ha nɛ wa ko ye fɔ!”
11 Kɛkɛ nɛ Abimelek fã ni ɔmɛ tsuo ke: “Nɔ fɛɛ nɔ nɛ e maa ta nyumu nɛ ɔ kɛ e yo ɔ a he ɔ, a maa gbe lɛ kokooko!”
12 Nɛ Isak bɔni ní dumi ngɛ jamɛ a zugba a nɔ. Jamɛ a jeha a, e kpa ní nɛ e du ɔ kɛ bɔ he si 100, ejakaa Yehowa ngɛ lɛ jɔɔe.
13 Nyumu ɔ ba ná ní, nɛ níhi a mi hi ha lɛ hluu kɛ ya si be nɛ e ba pee niatsɛ kpanaa.
14 E ná jijɔhi, kɛ nahi, kɛ sɔmɔli babauu, nɛ Filisti bi ɔmɛ a hɛ bɔni e nɔ kɔmi.
15 Lɔ ɔ he ɔ, Filisti bi ɔmɛ ngɔ zu kɛ tsi vuhi tsuo nɛ e tsɛ ɔ sɔmɔli ɔmɛ tsua ngɛ e tsɛ Abraham be ɔ mi ɔ.
16 Kɛkɛ nɛ Abimelek de Isak ke: “Jee wa kpɔ ɔ mi kɛ ho, ejakaa o he ba wa kulaa pe wɔ.”
17 Lɔ ɔ he ɔ, Isak je lejɛ ɔ nɛ e ya to si ngɛ Gerar dɔgba a* mi, nɛ e hi lejɛ ɔ.
18 Nɛ vuhi nɛ a tsua ngɛ Isak tsɛ Abraham be ɔ mi nɛ́ Filisti bi ɔmɛ tsi mɛ ngɛ Abraham gbenɔ se ɔ, Isak kpale tsua a mi ekohu, nɛ e kɛ biɛhi nɛ e tsɛ ɔ wo vu nɛ ɔmɛ ɔ kpale wo mɛ.
19 Benɛ Isak sɔmɔli ɔmɛ ngɛ si tsuae ngɛ dɔgba a* mi ɔ, a ya pã nyu hɛngmɛ ko nɔ.
20 Nɛ Gerar to hyɛli ɔmɛ kɛ Isak to hyɛli ɔmɛ bɔni pɛmi nɛ a de mɛ ke: “Wa nɔ́ ji nyu ɔ nɛ!” Lɔ ɔ he ɔ, e wo vu ɔ biɛ ke Esek,* ejakaa a kɛ lɛ pɛ ngɛ he.
21 Nɛ a bɔni vu kpa tsuami, nɛ a kɛ lɛ bɔni pɛmi ngɛ lɔ ɔ hu he. Lɔ ɔ he ɔ, e wo lɛ biɛ ke Sitna.*
22 Pee se ɔ, e je lejɛ ɔ nɛ e ya tsua vu kpa, se lɔ ɔ lɛɛ a kɛ lɛ pɛ́ ngɛ he. Lɔ ɔ he ɔ, e wo lɛ biɛ ke Rehobot,* nɛ e de ke: “Ejakaa amlɔ nɛ ɔ, Yehowa ha wɔ hi he nɛ kle, nɛ e ha nɛ wa he hiɛ babauu ngɛ zugba a nɔ.”
23 Kɛkɛ nɛ e je lejɛ ɔ nɛ e kuɔ kɛ ho Beer-sheba ya.
24 Jamɛ a nyɔ ɔ mi ɔ, Yehowa je e he kpo kɛ tsɔɔ lɛ nɛ e de lɛ ke: “Imi ji o tsɛ Abraham Mawu ɔ nɛ. Koo ye gbeye, ejakaa i kɛ mo ngɛ, nɛ ma jɔɔ mo, nɛ ma ha nɛ o nina* maa hiɛ babauu ngɛ ye sɔmɔlɔ Abraham he je.”
25 Lɔ ɔ he ɔ, e ma afɔle sami la tɛ ngɛ lejɛ ɔ nɛ e tsɛ Yehowa biɛ ɔ. Nɛ Isak ma e bo tsu ɔ ngɛ lejɛ ɔ, nɛ e sɔmɔli ɔmɛ tsua vu ngɛ lejɛ ɔ.
26 Pee se ɔ, Abimelek, kɛ e ga wolɔ Ahuzat, kɛ e tabo ɔ nya dalɔ Fikol je Gerar kɛ ba e ngɔ.
27 Benɛ a ba a, Isak bi mɛ ke: “Nyɛ nɛ́ nyɛ nyɛ mi, nɛ́ nyɛ fiee mi kɛ je nyɛ kpɔ ɔ mi ɔ, mɛni he je nɛ nyɛ ba ye ngɔ?”
28 Kɛkɛ nɛ a he nɔ ke: “Wa na heii kaa Yehowa kɛ mo ngɛ. Lɔ ɔ he ɔ, wa ke, ‘Wa kpa mo pɛɛ, ha nɛ wa kã wa sibi kita, nɛ waa kɛ mo nɛ so
29 kaa o be wɔ nɔ́ yayami ko pee kaa bɔ nɛ wɔ hu wa yi mo awi, se mohu kpakpa pɛ nɛ wa pee mo, nɛ́ wa wo mo blɔ ngɛ tue mi jɔmi mi ɔ he je. Amlɔ nɛ ɔ, Yehowa jɔɔ mo.’”
30 Kɛkɛ nɛ e ngmɛ mɛ okplɔɔ, nɛ a ye ní nɛ a nu ní.
31 E nɔ jena mɔtu ɔ, a te si mla nɛ a kã a sibi kita. Lɔ ɔ se ɔ, Isak wo mɛ blɔ, nɛ a je kɛ ho ngɛ tue mi jɔmi mi.
32 Jamɛ a ligbi ɔ, Isak sɔmɔli ɔmɛ ba bɔ lɛ amaniɛ kɛ kɔ vu ɔ nɛ a tsua a he, nɛ a de lɛ ke: “Wa ná nyu!”
33 Lɔ ɔ he ɔ, e wo vu ɔ biɛ ke Shiba. Enɛ ɔ he je nɛ a tsɛɛ ma a ke Beer-sheba kɛ ba si mwɔnɛ ɔ nɛ.
34 Benɛ Esau ye jeha 40 ɔ, e ngɔ Yudit, Hit no Beeri biyo ɔ kaa e yo, nɛ e ngɔ Basemat, Hit no Elon biyo ɔ hulɔ.
35 Yi nɛ ɔmɛ ha nɛ Isak kɛ Rebeka ye tsui wawɛɛ nitsɛ.*
Sisi Ningmahi
^ Ngɛ Hebri gbi mi ɔ, “ngmɛdu.” Hyɛ Munyu Komɛ A Sisi Tsɔɔmi.
^ Ngɛ Hebri gbi mi ɔ, “ngmɛdu.”
^ Ngɛ Hebri gbi mi ɔ, “ngmɛdu.”
^ Ngɛ Hebri gbi mi ɔ, “ngmɛdu ɔ.”
^ Aloo “e ngɛ e yo Rebeka fuae.”
^ Aloo “dɔ ɔ.”
^ Aloo “dɔ ɔ.”
^ E sisi ji “Pɛ.”
^ E sisi ji “Nya Pomi.”
^ E sisi ji “Hehi Nɛ A Kle.”
^ Ngɛ Hebri gbi mi ɔ, “ngmɛdu.”
^ Ngɛ Hebri gbi mi ɔ, “mumi ye aywilɛho.”
