1 Mose 39:1-23
39 Jehanɛ ɔ, a ngɔ Yosef kɛ kple kɛ ho Egipt ya, nɛ Potifar, Farao matsɛ we ɔ mi nikɔtɔma amɛ a ti nɔ kake, nɛ e ji buli ɔmɛ a nya dalɔ ɔ, nɛ́ Egipt no ji lɛ ɔ ya he Yosef ngɛ Ishmael bi nɛ a kɛ lɛ ba lejɛ ɔ a dɛ.
2 Se Yehowa kɛ Yosef ngɛ. Enɛ ɔ he ɔ, níhi ya nɔ saminya ha lɛ, nɛ e nyɔmtsɛ ɔ, nɛ ji Egipt no ɔ ngɔ lɛ kɛ to e we ɔ nya.
3 Nɛ e nyɔmtsɛ ɔ na kaa Yehowa kɛ lɛ ngɛ, nɛ Yehowa haa nɛ nɔ́ fɛɛ nɔ́ nɛ e peeɔ ɔ yeɔ manye.
4 Yosef hɛ mi ba nyami ngɛ e nyɔmtsɛ ɔ hɛ mi, nɛ e ba pee Potifar sɔmɔlɔ nɛ́ e he lɛ ye. Enɛ ɔ he ɔ, e hla lɛ konɛ e hyɛ e we ɔ nɔ, nɛ e ngɔ lɛ kɛ to e níhi tsuo nya.
5 Kɛ je be nɛ e hla lɛ kaa e hyɛ e we ɔ kɛ e níhi tsuo a nɔ ɔ, Yehowa ya nɔ nɛ e jɔɔ Egipt no ɔ we ɔ ngɛ Yosef he je, nɛ Yehowa jɔɔ níhi tsuo nɛ e ngɛ ngɛ we ɔ mi kɛ níhi tsuo nɛ e ngɛ ngɛ nga a nɔ ɔ nɔ.
6 Nyagbenyagbe ɔ, e ngɔ níhi tsuo nɛ e ngɛ ɔ kɛ wo Yosef dɛ, nɛ e gba we e he nya ngɛ nɔ́ ko nɔ́ ko he kaa ja niye ní nɛ e yeɔ ɔ pɛ. Jehanɛ hu ɔ, Yosef wa nɛ e ba pee nyumu nɛ e he ngɛ fɛu.
7 Jehanɛ ɔ, ngɛ ní nɛ ɔmɛ a se ɔ, e nyɔmtsɛ ɔ yo ɔ kɛ hɛngmɛ ko bɔni Yosef hyɛmi, nɛ e de lɛ ke: “O kɛ mi nɛ ba hwɔ.”
8 Se Yosef kplɛɛ we, nɛ e de e nyɔmtsɛ ɔ yo ɔ ke: “Hyɛ, ye nyɔmtsɛ ɔ li níhi nɛ ngɛ ye dɛ ngɛ we ɔ mi ɔ nya. E ngɔ e nɔ́ fɛɛ nɔ́ kɛ wo ye dɛ.
9 Nɔ ko be nɛ e nɔ kuɔ pe mi ngɛ we nɛ ɔ mi, nɛ e tsi we ye nya ngɛ nɔ́ ko nɔ́ ko he kaa ja mo pɛ, ejakaa e yo ji mo. Lɛɛ mɛni he je mɔ nɛ ma tɔ̃ tɔmi agbo nɛ ɔ, nɛ ma pee yayami kaa kikɛ nɛ ɔ kɛ si Mawu?”
10 Daa ligbi ɔ, yo ɔ kɛ munyu nɛ ɔ hii Yosef haoe, se Yosef kplɛɛ we kaa e kɛ lɛ maa hwɔ aloo kaa e maa hi e kasa nya.
11 Se ligbi ko nɛ Yosef ya we ɔ mi konɛ e ya tsu e ní tsumi ɔ, we ɔ mi sɔmɔli ɔmɛ a ti nɔ ko nɔ ko be we ɔ mi.
12 Kɛkɛ nɛ yo ɔ nu Yosef tade ɔ nɛ e de ke: “O kɛ mi nɛ ba hwɔ!” Se Yosef je e tade ɔ he ngɛ yo ɔ dɛ mi nɛ e tu fo kɛ je kpo.
13 Benɛ yo ɔ na kaa Yosef je e tade ɔ he ngɛ e dɛ mi, nɛ e tu fo kɛ je kpo ɔ,
14 yo ɔ bɔni ngmlaa kpami kɛ ngɛ e we ɔ mi nyumu ɔmɛ tsɛe, nɛ e de ke: “Nyɛɛ hyɛ! E ngɔ Hebri nyumu nɛ ɔ kɛ ba nɛ e ba ye wa he fɛu. E ba ye ngɔ konɛ e kɛ mi nɛ ba hwɔ, se i wo ye gbi nɔ kɛ bɔni ngmlaa kpami.
15 Benɛ e nu nɛ i wo ye gbi nɔ kɛ bɔni ngmlaa kpami ɔ, e je e tade ɔ he ngɛ ye kasa nya nɛ e tu fo kɛ je kpo.”
16 Lɔ ɔ se ɔ, e ngɔ Yosef tade ɔ kɛ fɔ e kasa nya kɛ ya si be nɛ Yosef nyɔmtsɛ ɔ ba we ɔ mi.
17 Kɛkɛ nɛ e de lɛ nɔ́ kake ɔ nɔuu ke: “Hebri no sɔmɔlɔ ɔ nɛ o ya ngɔ lɛ kɛ ba a ba ye ngɔ konɛ e ba ye ye he fɛu.
18 Se benɛ i wo ye gbi nɔ kɛ bɔni ngmlaa kpami pɛ ɔ, e je e tade ɔ he ngɛ ye kasa nya nɛ e tu fo kɛ je kpo.”
19 Benɛ Yosef nyɔmtsɛ ɔ nu nɛ e yo ɔ de lɛ ke: “Níhi nɛ o sɔmɔlɔ ɔ pee mi ji nɛ ɔ,” amlɔ nɔuu nɛ e mi mi fu wawɛɛ.
20 Lɔ ɔ he ɔ, Yosef nyɔmtsɛ ɔ nu lɛ nɛ e ya wo lɛ tsu ngɛ he nɛ matsɛ ɔ woɔ nihi tsu ngɛ ɔ, nɛ e hi tsu womi he ɔ.
21 Se Yehowa ya nɔ nɛ e piɛɛ Yosef he nɛ e je suɔmi nɛ se pui kpo kɛ tsɔɔ lɛ, nɛ e ha nɛ e hɛ mi ba nyami ngɛ tsu womi he nɔ hyɛlɔ nɔkɔtɔma a hɛ mi.
22 Lɔ ɔ he ɔ, tsu womi he nɔ hyɛlɔ nɔkɔtɔma a ngɔ Yosef kɛ to nihi nɛ a wo mɛ tsu ɔ tsuo a nya ngɛ tsu womi he ɔ, nɛ nɔ́ fɛɛ nɔ́ nɛ a peeɔ ngɛ lejɛ ɔ, lɛ ji nɔ nɛ e haa nɛ a peeɔ.
23 Tsu womi he nɔ hyɛlɔ nɔkɔtɔma a gba we e he nya ngɛ níhi tsuo nɛ e ngɔ kɛ wo Yosef dɛ ɔ he, ejakaa Yehowa kɛ Yosef ngɛ, nɛ Yehowa haa nɛ e yeɔ manye ngɛ nɔ́ fɛɛ nɔ́ nɛ e peeɔ ɔ mi.
