1 Samuel 12:1-25
12 Nyagbenyagbe ɔ, Samuel de Israel tsuo ke: “Hyɛ, i pee níhi tsuo nɛ nyɛ bi mi ɔ,* nɛ i wo matsɛ ha nyɛ konɛ e ye nyɛ nɔ.
2 Amlɔ nɛ ɔ, matsɛ nɛ ngɛ nyɛ hɛ mi nyɛɛe ɔ ji nɛ ɔ nɛ! Imi lɛɛ i bwɔ nɛ ye yi bwɔmi hiɛ futaa, nɛ ye binyumuhi kɛ nyɛ ngɛ hiɛ ɔ, nɛ i nyɛɛ nyɛ hɛ mi kɛ je ye nihe mi hluu kɛ ba si mwɔnɛ ligbi nɛ ɔ.
3 Imi ji nɛ ɔ nɛ. Nyɛɛ po ye nya ngɛ Yehowa hɛ mi kɛ nɔ nɛ e pɔ lɛ nu ɔ hɛ mi: Mɛnɔ lɛ i kpɔ̃ e na ku aloo e teji ngɛ e dɛ hyɛ? Aloo mɛnɔ lɛ i fia lɛ ojo aloo i wa lɛ yi mi hyɛ? Mɛnɔ lɛ i he nyɔ mi ní ngɛ e dɛ kɛ plɛ sane hɛ mi bu si? Ke i pee jã a, ma to nyɛ nane mi.”
4 Kɛkɛ nɛ a de ke: “O fiɛ wɔ ojo, nɛ o wɛ wɔ yi mi, nɛ o ngɔɛ nɔ́ ko nɔ́ ko ngɛ wa ti nɔ ko dɛ hulɔ.”
5 Enɛ ɔ he ɔ, e de mɛ ke: “Yehowa ji ye we odase, nɛ nɔ nɛ e pɔ lɛ nu ɔ ji odase mwɔnɛ ligbi nɛ ɔ kaa nyɛ nɛ nɔ́ yayami ko ngɛ ye he.”* Kɛkɛ nɛ a de ke: “Lɛ ji o we odase.”
6 Enɛ ɔ he ɔ, Samuel de ni ɔmɛ ke: “Yehowa, nɔ nɛ e kɛ Mose kɛ Aaron tsu ní, nɔ nɛ e ngɔ nyɛ nɛmɛ ɔmɛ kɛ je Egipt zugba a nɔ kɛ ba a, ji odase.
7 Amlɔ nɛ ɔ, nyɛɛ da si dii, nɛ ma kojo nyɛ ngɛ Yehowa hɛ mi ngɛ dami níhi tsuo nɛ Yehowa pee ha nyɛ kɛ nyɛ nɛmɛ ɔmɛ ɔ he.
8 “Benɛ Yakob ba su Egipt nɛ nyɛ nɛmɛ ɔmɛ bɔni Yehowa tsɛmi konɛ e ye bua mɛ ɔ, amlɔ nɔuu nɛ Yehowa tsɔ Mose kɛ Aaron konɛ a ya nyɛɛ nyɛ nɛmɛ ɔmɛ a hɛ mi kɛ je Egipt, konɛ a ha nɛ a ba hi hiɛ ɔ.
9 Se a hɛ je Yehowa a Mawu ɔ nɔ, nɛ e jua mɛ kɛ wo Sisera, nɛ ji Hazor tabo ɔ nya dalɔ ɔ dɛ mi, kɛ Filisti bi ɔmɛ a dɛ mi, kɛ Moab matsɛ ɔ dɛ mi, nɛ a kɛ mɛ hwu ta.
10 Nɛ a tsɛ Yehowa konɛ e ye bua mɛ, nɛ a de ke, ‘Wa pee yayami, ejakaa wa je Yehowa he nɛ wa ya sɔmɔ Baal kɛ Ashtoret amaga amɛ; amlɔ nɛ ɔ, mo kpɔ̃ wɔ kɛ je wa he nyɛli ɔmɛ a dɛ mi konɛ wa sɔmɔ mo.’
11 Kɛkɛ nɛ Yehowa tsɔ Yerubaal, Bedan, Yefta kɛ Samuel, nɛ e kpɔ̃ nyɛ kɛ je nyɛ he nyɛli tsuo nɛ bɔle nyɛ ɔ a dɛ mi, konɛ nyɛ nyɛ nɛ nyɛɛ hi si slɔkee.
12 Benɛ nyɛ na kaa Nahash, Amon bi ɔmɛ a matsɛ ɔ ba tua nyɛ ɔ, nyɛ de mi si abɔ ke, ‘Dɛbi, bɔ fɛɛ bɔ nɛ ji ɔ, wa suɔ kaa wa ma ná matsɛ nɛ e ye wa nɔ!’ pohu Yehowa nyɛ Mawu ɔ ji nyɛ Matsɛ.
13 Amlɔ nɛ ɔ, matsɛ nɛ jinɛ nyɛ ngɛ hlae, nɛ́ nyɛ bi ke a ha nyɛ ɔ ji nɛ ɔ nɛ. Hyɛ! Yehowa wo matsɛ konɛ e ye nyɛ nɔ.
14 Ke nyɛ maa ye Yehowa gbeye, nɛ nyɛ ma sɔmɔ lɛ, nɛ nyɛ maa bu e gbi tue, nɛ nyɛ maa ye Yehowa famihi a nɔ, nɛ nyɛɛ kɛ matsɛ nɛ ngɛ nyɛ nɔ yee ɔ tsuo maa nyɛɛ Yehowa nyɛ Mawu ɔ se ɔ, lɛɛ saminya.
15 Se ke nyɛ bui Yehowa gbi tue, nɛ nyɛ yi Yehowa fami ɔmɛ a nɔ ɔ, Yehowa maa te si* kɛ wo nyɛɛ kɛ nyɛ tsɛmɛ ɔmɛ.
16 Amlɔ nɛ ɔ, nyɛɛ da si dii nɛ nyɛɛ hyɛ nɔ́ ngua nɛ ɔ nɛ Yehowa ma peemi ngɛ nyɛ hɛ mi ɔ.
17 Anɛ pi hwiit kpami ligbi ji mwɔnɛ ɔ lo? Ma tsɛ Yehowa konɛ e ha nɛ hiɔwe nɛ si nɛ hiɔmi nɛ nɛ; kɛkɛ ɔ, nyɛ maa le nɛ nyɛ maa nu sisi kaa matsɛ nɛ nyɛ bi ke a wo ha nyɛ ɔ ji yayami nɛ nyɛ pee ngɛ Yehowa hɛ mi.”
18 Kɛkɛ nɛ Samuel tsɛ Yehowa, nɛ Yehowa ha nɛ hiɔwe si nɛ hiɔmi nɛ jamɛ a ligbi ɔ, nɛ enɛ ɔ ha nɛ ni ɔmɛ tsuo ye Yehowa kɛ Samuel gbeye wawɛɛ nitsɛ.
19 Nɛ ni ɔmɛ tsuo de Samuel ke: “Moo da o sɔmɔli ɔmɛ a nane mi kɛ sɔle ha Yehowa o Mawu ɔ, ejakaa wa sume nɛ wa gbo, ejakaa matsɛ nɛ wa bi ɔ ji yayami kpa nɛ wa pee kɛ piɛɛ wa yayami ɔmɛ tsuo a he.”
20 Lɔ ɔ he ɔ, Samuel de ni ɔmɛ ke: “Nyɛ ko ye gbeye. Niinɛ, nyɛ pee yayami nɛ ɔmɛ tsuo. Se nyɛɛ lɛɛ nyɛ ko kpa Yehowa se nyɛɛmi, mohu ɔ, nyɛ sɔmɔ Yehowa kɛ nyɛ tsui tsuo.
21 Nyɛ ko gba kɛ ya nyɛɛ lakpa mawuhi* nɛ a he be se nami nɛ a be nyɛe ma kpɔ̃ nɔ ɔ a se, ejakaa a ji amagahi nɛ a he be se nami.*
22 Yehowa biɛ ngua a he je ɔ, e be e we bi kuae, ejakaa Yehowa ngɔ kɛ fɔ lɛ nitsɛ e nɔ kaa e maa ngɔ nyɛ kɛ pee e we bi.
23 Imi lɛɛ i be yayami pee kɛ si Yehowa kɔkɔɔkɔ kaa ma kpa sɔlemi ha nyɛ. Ma ya nɔ nɛ ma tsɔɔ nyɛ ní ngɛ blɔ kpakpa kɛ blɔ nɛ da nɔ.
24 Nɔ́ pɛ nɛ nyɛɛ pee ji kaa nyɛɛ ye Yehowa gbeye nɛ nyɛ sɔmɔ lɛ kɛ nyɛ tsui tsuo ngɛ anɔkuale mi; nyɛ kai ní nguanguahi nɛ e pee ha nyɛ ɔ.
25 Se ke nyɛ je blɔ nɛ nyɛ pee yayami ɔ, e maa bɛɛ nyɛ kɛ je, nyɛɛ kɛ nyɛ matsɛ ɔ tsuo.”
Sisi Ningmahi
^ Ngɛ Hebri gbi mi ɔ, “i bu nyɛ gbi tue ngɛ níhi tsuo nɛ nyɛ bi mi ɔ he.”
^ Ngɛ Hebri gbi mi ɔ, “nyɛ nɛ nɔ́ ko ngɛ ye dɛ mi.”
^ Ngɛ Hebri gbi mi ɔ, “Yehowa nine maa te si.”
^ Ngɛ Hebri gbi mi ɔ, “ní guhi; níhi nɛ a be.”
^ Ngɛ Hebri gbi mi ɔ, “ní guhi; níhi nɛ a be.”
