1 Samuel 13:1-23
13 Saul ye jeha . . .* benɛ a wo lɛ matsɛ ɔ, nɛ e ye Israel nɔ jeha enyɔ.
2 Saul hla nyumuhi 3,000 kɛ je Israel; nimli nɛ ɔmɛ a kpɛti nihi 2,000 kɛ Saul hi Mikmash kɛ Betel yoku ɔmɛ a nɔ, nɛ 1,000 kɛ Yonatan hi Gibea ngɛ Benyamin. E wo nihi nɛ piɛ ɔ blɔ kɛ ho, nɔ fɛɛ nɔ je kɛ ho e bo tsu mi ya.
3 Kɛkɛ nɛ Yonatan gbe Filisti bi ɔmɛ a tabo ɔ nɛ ngɛ Geba a, nɛ Filisti bi ɔmɛ nu he. Nɛ Saul ha nɛ a kpã titimati* kɛ kpa zugba a nɔ tsuo ke: “Hebri bi ɔmɛ nɛ a bu tue!”
4 Israel tsuo nu sane ɔ he kaa: “Saul gbe Filisti bi ɔmɛ a tabo ɔ, nɛ amlɔ nɛ ɔ, Israel bi ɔmɛ a he ngɛ fu jee kɛ ngɛ Filisti bi ɔmɛ woe.” Enɛ ɔ he ɔ, a tsɛ ni ɔmɛ ke a ba nyɛɛ Saul se ngɛ Gilgal.
5 Filisti bi ɔmɛ hu bua a he nya konɛ a kɛ Israel nɛ ya hwu ta, a hɛɛ ta zugba lɛhi 30,000, kɛ okpɔngɔ nɔ hili 6,000, kɛ ta buli nɛ a he hiɛ babauu nitsɛ kaa wo nya zia; nɛ a kuɔ kɛ ho nɛ a ya to si ngɛ Mikmash kɛ yaa Bet Aven puje he blɔ.
6 Nɛ Israel nyumu ɔmɛ na kaa a sɛ haomi mi, ejakaa a yi fĩ wawɛɛ; lɔ ɔ he ɔ, ni ɔmɛ ya laa ngɛ tɛ puɔhi, muɔhi, tɛ sahi, zugba sisi tsuhi, kɛ muɔhi nɛ a toɔ nyu ngɛ mi ɔ a mi.
7 Hebri bi ɔmɛ ekomɛ po po Yordan Pa a kɛ ho Gad zugba a kɛ Gilead zugba a nɔ ya. Se loloolo ɔ, Saul ngɛ Gilgal, nɛ nihi nɛ a nyɛɛ e se ɔ tsuo he bɔni domi blibliibli.
8 E ya nɔ nɛ e mlɛ ligbi kpaago, kɛ ya si be nɛ Samuel to ɔ, se Samuel bɛ Gilgal, nɛ ni ɔmɛ ngɛ gbɛe kɛ ngɛ e he jee.
9 Nyagbenyagbe ɔ, Saul de ke: “Nyɛɛ ngɔ sami afɔle ɔ kɛ tue mi jɔmi afɔle ɔ ba ha mi.” Nɛ e sã sami afɔle ɔ.
10 Se benɛ e sã sami afɔle ɔ ta pɛ nɛ Samuel ba hia si. Lɔ ɔ he ɔ, Saul je kpo nɛ e kɛ lɛ ya kpe nɛ e jɔɔ lɛ.
11 Kɛkɛ nɛ Samuel bi lɛ ke: “Mɛni o pee nɛ ɔ?” Saul ha heto ke: “I na kaa ni ɔmɛ ngɛ gbɛe kɛ ngɛ ye he jee, nɛ o bɛ ngɛ be nɛ o to ɔ mi, nɛ Filisti bi ɔmɛ ngɛ a he nya buae ngɛ Mikmash.
12 Enɛ ɔ he ɔ, i de ye he ke, ‘Amlɔ nɛ ɔ, Filisti bi ɔmɛ ma kple kɛ ba tua mi ngɛ Gilgal, nɛ i bi we Yehowa yemi kɛ buami.’ Enɛ ɔ he ɔ, i na kaa e sa nɛ ma sã sami afɔle ɔ.”
13 Kɛkɛ nɛ Samuel de Saul ke: “O je kuasia. O bui kita nɛ Yehowa o Mawu ɔ wo mo ɔ tue. Kaa o bu tue ɔ, jinɛ Yehowa ko ha nɛ o matsɛ yemi ɔ ko ma si kpɛii ngɛ Israel kɛ ko ya neneene.
14 Se amlɔ nɛ ɔ, o matsɛ yemi ɔ se be kɛe. Yehowa ma hla nyumu ko nɛ e tsui suɔ, nɛ Yehowa ma ha nɛ e nyɛɛ e we bi ɔmɛ a hɛ mi, ejakaa o bui fami nɛ Yehowa fã mo ɔ tue.”
15 Kɛkɛ nɛ Samuel te si nɛ e kuɔ kɛ je Gilgal kɛ ho Gibea ya ngɛ Benyamin, nɛ Saul kane ni ɔmɛ; ni nɛmɛ nɛ a piɛ ngɛ e he ɔ, a yibɔ maa pee nyumuhi 600.
16 Saul, kɛ e binyumu Yonatan, kɛ nihi nɛ a piɛ ngɛ a he ɔ hi Geba ngɛ Benyamin, nɛ Filisti bi ɔmɛ ya to si ngɛ Mikmash.
17 Nɛ ní hali a kuu etɛ jeɔ Filisti bi ɔmɛ a sito he ɔ kɛ ya haa ní. Kuu kake kɛ e hɛ mi tsɔɔ gbɛjegbɛ nɛ yaa Ofra kɛ yaa Shual zugba a nɔ ɔ;
18 kuu kpa hu kɛ e hɛ mi tsɔɔ gbɛjegbɛ nɛ yaa Bet Horon ɔ; nɛ kuu etɛne ɔ kɛ e hɛ mi tsɔɔ gbɛjegbɛ nɛ yaa huzu ɔ nɛ e hɛ mi tsɔɔ Zeboim dɔgba a nya kɛ yaa nga a nɔ ɔ.
19 Jehanɛ ɔ, dade ga ní tsulɔ ko be Israel zugba a nɔ tsuo, ejakaa Filisti bi ɔmɛ de ke: “Wa sume nɛ Hebri bi ɔmɛ nɛ a pee klaate ko aloo akplɔ ko.”
20 Lɔ ɔ he ɔ, Filisti bi ɔmɛ a ngɔ nɛ Israel bi ɔmɛ tsuo kpleɔ kɛ yaa nɛ a ya duɔɔ a na kpakplaahi, pikasihi, gbiɛhi, aloo ní kpami hahi a nya ngɛ.
21 Ke a duɔ na kpakplaahi, aloo pikasihi, aloo ní tsumi dadehi kɛ a nguɛ etɛɛtɛ, aloo gbiɛhi a nya, aloo a mia na tsɔmi tso kɛ e nya piɔpiɔɔpiɔ mi ɔ, a heɔ pim* kake.
22 Nɛ ngɛ ta hwumi ligbi ɔ nɔ ɔ, nihi nɛ a piɛɛ Saul kɛ Yonatan he ɔ, a ti nɔ ko nɔ ko hɛɛ we klaate ko aloo akplɔ ko; Saul kɛ e binyumu Yonatan pɛ lɛ a hɛɛ ta hwumi níhi.
23 Jamɛ a be ɔ mi ɔ, Filisti bi ɔmɛ a ta buli a kuu ko je kpo kɛ gu he nɛ a poɔ Mikmash dɔ nɛ mi kuɔ ɔ ngɛ ɔ.
Sisi Ningmahi
^ Jeha abɔ nɛ e ye ɔ laa ngɛ Hebri ngmami ɔ mi.
^ Ngɛ Hebri gbi mi ɔ, “koli.”
^ Blema sɛni tɛ ko nɛ e jiɔmi maa pee shekel nɛ a gba mi etɛ mi enyɔ.
