1 Samuel 2:1-36
2 Kɛkɛ nɛ Hana sɔle nɛ e de ke:
“Ye tsui ngɛ nyae ngɛ Yehowa mi;Yehowa wo ye koli* ɔ nɔ.
Ye nya pã kɛ wo ye he nyɛli ɔmɛ,Ejakaa i ngɛ nyae ngɛ o yi wami hemi ní peepee ɔmɛ a he.
2 Nɔ ko be nɛ ngɛ klɔuklɔu kaa Yehowa,Nɔ ko be, ja mo,Nɛ tɛ sa ko be nɛ ngɛ kaa wa Mawu ɔ.
3 Nyɛɛ jɔɔ he nɔ womi munyu tumi;Nyɛ ko ha nɛ he nɔ womi munyu ko nɛ je nyɛ nya mi,Ejakaa Yehowa ji Mawu nɛ ngɛ nile,Nɛ lɛ ji nɔ nɛ e ngmɛɔ níhi tsuo nɛ nihi peeɔ ɔ ngɛ dami nya.
4 Nyumu he wali ɔmɛ a kɛ̃ɛ̃ ɔmɛ a mi ku,Se a wo nihi nɛ a ngɛ si tɛe ɔ he wami.
5 Ni nɛmɛ nɛ a tɔ ɔ ma ya ye apaa konɛ a ná niye ní,Se hwɔ be nɔ nɛ hwɔ ngɛ lɛ yee ɔ yee hu.
Yosa a fɔ bimɛ kpaago,Se yo nɛ ngɛ binyumuhi babauu ɔ ba pee posoposo.*
6 Yehowa gbeɔ nɔ, nɛ e baa wami yi;*E ngɔɔ nɔ kɛ yaa Yɔkɔ* mi, nɛ e tleɔ nɔ si.
7 Yehowa peeɔ nɔ ohiatsɛ, nɛ e peeɔ nɔ niatsɛ;E baa nɔ si, nɛ e woɔ nɔ nɔ.
8 E woɔ nɔ nɛ e ní ngɛ mɔbɔ ɔ nɔ kɛ jeɔ zu mi;E woɔ ohiatsɛ nɔ kɛ jeɔ la zu glekuu mi,*Konɛ e ha nɛ a kɛ nihi nɛ a hɛ mi ngɛ nyami ɔ nɛ hi si,Nɛ́ e ha mɛ sɛ nɛ hɛ mi ngɛ nyami.
Yehowa níhi ji níhi nɛ hɛɛ zugba a nɛ,Nɛ e ngɔ zugba nɛ baa ní ɔ kɛ ma a nɔ.
9 E buɔ nihi nɛ a fĩɔ e se ɔ a nane hiami he,Se a ma ha nɛ yayami peeli ma ma a nya ngɛ diblii mi,Ejakaa pi adesa nitsɛ he wami nya nɛ e yeɔ kunimi.
10 Yehowa maa ywia ni nɛmɛ nɛ a kɛ lɛ ngɛ ta hwue ɔ;*E ma si kɛ je hiɔwe kɛ wo mɛ.
Yehowa maa kojo kɛ ya su zugba a nyagbe he ɔmɛ,E ma ha e matsɛ ɔ he wamiNɛ e ma wo nɔ nɛ e pɔ lɛ nu ɔ koli* ɔ nɔ.
11 Kɛkɛ nɛ Elkana je kɛ ho e we mi ya ngɛ Rama, se nyumuyo ɔ ba pee Yehowa sɔmɔlɔ ngɛ osɔfo Eli hɛ mi.
12 Jamɛ a be ɔ mi ɔ, Eli binyumu ɔmɛ ji yayami peeli; a bui Yehowa fɛɛ.
13 Nɔ́ nɛ a ngɔɔ osɔfo blɔ nya ní nɛ e sa kaa a ná kɛ je ni ɔmɛ a dɛ mi ɔ kɛ peeɔ ji nɛ ɔ nɛ: Be fɛɛ be nɛ nɔ ko ma ba sã afɔle ɔ, ke lo ɔ ngɛ fiae ɔ, osɔfo ɔ tsɔlɔ ko maa ba kɛ e dɛ mi fɔɔki nguɛ etɛtsɛ,
14 nɛ e kɛ ma ba gbɔ tsesi ɔ, aloo buɛ kɛ e nine enyɔ ɔ, aloo dadesɛ ɔ, aloo buɛ kɛ e nine kake ɔ mi. Nɔ́ fɛɛ nɔ́ nɛ fɔɔki ɔ maa gbla kɛ ba a, osɔfo ɔ maa ngɔ kɛ ha e he. Jã ji bɔ nɛ a peeɔ Israel bi tsuo nɛ a baa Shilo ɔ nɛ.
15 Jehanɛ se hu ɔ, loko nyumu ɔ nɛ ngɛ afɔle ɔ sãe ɔ ma ha nɛ zɔ ɔ maa je la su ku po ɔ, osɔfo ɔ tsɔlɔ ko maa ba nɛ e ma ba de ke: “Ha osɔfo ɔ lo nɛ e ya sã. E be lo nɛ a hoo ngɔe ngɛ o dɛ, ja lo mumu pɛ.”
16 Ke nyumu ɔ de lɛ ke: “Mo ha nɛ a sã zɔ ɔ kekle,* konɛ lɔ ɔ se nɛ o ngɔ nɔ́ fɛɛ nɔ́ nɛ o suɔ”* ɔ, e ma de ke: “Ohoo, ha mi piɔ; ke pi jã a, ma ngɔ pani nya!”
17 Enɛ ɔ ha nɛ tsɔli ɔmɛ a yayami ɔ ba kle agbo nitsɛ ngɛ Yehowa hɛ mi, ejakaa nyumu ɔmɛ bui Yehowa afɔle ɔ.
18 Jamɛ a be ɔ mi ɔ, Samuel ngɛ sɔmɔe ngɛ Yehowa hɛ mi, nɛ e woɔ klala efɔd,* e ngɛ mi kaa jokuɛ nyumuyo kɛkɛ ji lɛ mohu.
19 Jehanɛ hu ɔ, e yayo kpɛɔ tade klɔii nyafii ko nɛ kɔni be he haa lɛ, nɛ e kɛ ba haa lɛ jeha fɛɛ jeha ke e kɛ e huno ɔ kuɔ kɛ ba konɛ a ba sã daa jeha afɔle ɔ.
20 Nɛ Eli jɔɔ Elkana kɛ e yo ɔ, nɛ e de ke: “Yehowa nɛ e ha mo bi kɛ je yo nɛ ɔ mi kɛ to nɔ nɛ nyɛ ngɔ* lɛ kɛ ha Yehowa a nane mi.” Nɛ a kpale kɛ ho we mi ya.
21 Yehowa ngɔ e juɛmi kɛ ba Hana nɔ, nɛ e ngɔ hɔ; nɛ e fɔ binyumuhi etɛ kɛ biyihi enyɔ. Nɛ nyumuyo Samuel ya nɔ nɛ e ngɛ wae ngɛ Yehowa hɛ mi.
22 Jamɛ a be ɔ mi ɔ, Eli wa saminya, se nɔ́ fɛɛ nɔ́ nɛ e binyumu ɔmɛ ngɛ Israel bi ɔmɛ tsuo pee, kɛ bɔ nɛ a kɛ yihi nɛ a sɔmɔɔ ngɛ kpe he bo tsu ɔ sinya a nya a hii si hwɔe ha a, e nu lɛ tsuo pɛpɛɛpɛ.
23 E pɔɔ mɛ demi ke: “Mɛni he je nɛ nyɛ yaa nɔ nɛ nyɛ peeɔ níhi kaa kikɛ ɔ? Ejakaa níhi nɛ i ngɛ nue ngɛ ni ɔmɛ tsuo a nya ngɛ nyɛ he ɔ hí.
24 Dɛbi, ye binyumuhi, munyu nɛ ngɛ pɛe ngɛ Yehowa we bi ɔmɛ a kpɛti ɔ, pi nɔ́ kpakpa.
25 Ke adesa ko pee adesa kpa ko yayami ɔ, nɔ ko ma nyɛ ma kpa Yehowa pɛɛ ha lɛ;* se ke adesa ko pee yayami kɛ si Yehowa a, mɛnɔ ma nyɛ maa sɔle ha lɛ?” Se a bui a tsɛ ɔ tue, ejakaa Yehowa to e yi mi kaa e maa gbe mɛ.
26 Se jamɛ a be ɔ mi ɔ, nyumuyo Samuel ya nɔ nɛ e ngɛ wae ngɛ nɔmlɔ tso mi, nɛ e hɛ mi ba nyami ngɛ Yehowa kɛ nihi tsuo a hɛ mi.
27 Mawu nɔmlɔ ko ba Eli ngɔ nɛ e ba de lɛ ke: “Nɔ́ nɛ Yehowa ngɛ dee ji nɛ ɔ nɛ: ‘Anɛ i je we ye he kpo heii kɛ tsɔɔ o tsɛ we ɔ be mi nɛ a ji nyɔguɛhi kɛ ha Farao we ɔ ngɛ Egipt ɔ lo?
28 Nɛ a hla lɛ ngɛ Israel wɛtso ɔmɛ tsuo a kpɛti konɛ e sɔmɔ kaa ye we osɔfo, nɛ́ e kuɔ kɛ ya ye we afɔle sami la tɛ ɔ he konɛ e ya sã afɔlehi, e ya sã tsopa kɛ e he via,* nɛ e wo efɔd ngɛ ye hɛ mi; nɛ i ngɔ afɔlehi tsuo nɛ Israel bi ɔmɛ kɛ la sãã a kɛ ha o nɛ we ɔ.
29 Mɛni he je nɛ nyɛ bui ye afɔle ɔ kɛ ye nike ní nɛ i fã ke nyɛ kɛ ba ye hi he ɔ?* Mɛni he je nɛ o yaa nɔ nɛ o woɔ o binyumu ɔmɛ a hɛ mi nyami pe mi, nɛ afɔlehi tsuo nɛ ye ma Israel sãã a mi ní nɛmɛ nɛ hi pe kulaa a hu nyɛɛ kɛ ngɛ nyɛ he lɛe nɛ nyɛ ngɛ plɔkee ɔ?
30 “‘Enɛ ɔ he ɔ, Yehowa, Israel Mawu ɔ ngɛ dee ke: “Niinɛ, i de ke o we ɔ kɛ o nɛ we ɔ ma sɔmɔ mi kɛ ya daa.” Se amlɔ nɛ ɔ, Yehowa ngɛ dee ke: “I be jã pee kɔkɔɔkɔ, ejakaa nihi nɛ woɔ ye hɛ mi nyami ɔ, ma wo a hɛ mi nyami, se nihi nɛ a bui mi ɔ, bu be a he hie fɛɛ.”
31 Hyɛ! Be ma nɛ ma po o he wami* ɔ, kɛ o tsɛ we ɔ he wami ɔ kɛ fɔ he, nɛ nyumu ko be wae nɛ e bwɔ ngɛ o we ɔ mi.
32 Ngɛ ní kpakpahi nɛ a maa pee kɛ ha Israel tsuo se ɔ, moo lɛɛ he nyɛlɔ pɛ lɛ o maa hi hyɛe, nɛ a be nɔmoyo ko nae ngɛ o we ɔ mi hu gblegbleegble.
33 Ma ha nɛ o we ɔ mi nɔ ko nɛ́ e ya nɔ nɛ e sɔmɔ mi ngɛ ye we afɔle sami la tɛ ɔ he, nɛ e ma ha nɛ o hɛngmɛ be nɔ́ hyɛe hu, nɛ e ma ha nɛ o maa ye aywilɛho,* se o we ɔ mi nihi hiɛhiɛɛ ma gbo ngɛ nyumuhi a klaate nya.
34 Nɛ nɔ́ nɛ maa ba o binyumu enyɔ ɔmɛ nɛ ji Hofni kɛ Finehas a nɔ ɔ, maa pee okadi kɛ ha mo: Mɛ ni enyɔ ɔmɛ tsuo a ma gbo ligbi kake too.
35 Lɔ ɔ se ɔ, ma tle osɔfo anɔkualetsɛ ko si kɛ ha ye he. E maa pee níhi nɛ ye tsui suɔ;* nɛ ma po we nɛ maa hi si daa kɛ ha lɛ, nɛ e ma sɔmɔ kaa osɔfo kɛ ha nɔ nɛ i pɔ lɛ nu ɔ.
36 Nɔ fɛɛ nɔ nɛ maa piɛ ngɛ o we ɔ mi ɔ maa ba nɛ e ma ba kplã si kɛ ha lɛ konɛ e ha lɛ ní tsumi bɔ nɛ pee nɛ e ná sika bɔɔ kɛ abolo nɛ e maa ye, nɛ e ma de ke: “I kpa mo pɛɛ nɛ o ha mi osɔfohi a ní tsumi ɔmɛ eko nɛ ma tsu konɛ ma ná niye ní bɔɔ nɛ ma ye.”’”
Sisi Ningmahi
^ Aloo “ye he wami.” Hyɛ Munyu Komɛ A Sisi Tsɔɔmi.
^ Ngɛ Hebri gbi mi ɔ, “gbli.”
^ Aloo “e kɛ nɔ baa wami mi.”
^ Aloo “Sheol,” nɛ ji, okadi peemi mi he ko nɛ gbogboe ɔmɛ ngɛ. Hyɛ Munyu Komɛ A Sisi Tsɔɔmi.
^ Baiblo komɛ de ke “kuku nɔ.”
^ Baiblo komɛ de ke “Sawale maa nu ni nɛmɛ nɛ a kɛ Yehowa ngɛ ta hwue ɔ.”
^ Aloo “he wami.” Hyɛ Munyu Komɛ A Sisi Tsɔɔmi.
^ Aloo “nɛ ngɛ o klaa jloe.”
^ Ngɛ Hebri gbi mi ɔ, “ha nɛ zɔ ɔ nɛ je la su ku kekle.”
^ Ngɛ Hebri gbi mi ɔ, “e kɛ klala efɔd fi e mlɛ mi.”
^ Ngɛ Hebri gbi mi ɔ, “pa.”
^ Baiblo komɛ de ke “Mawu maa da mi ha lɛ.”
^ Baiblo komɛ de ke “e ha nɛ afɔle sami la su ku nɛ te.”
^ Ngɛ Hebri gbi mi ɔ, “nyɛ siɔ ye afɔle ɔ kɛ ye nike ní nɛ i fã ke nyɛ kɛ ba ye hi he ɔ atia a?”
^ Ngɛ Hebri gbi mi ɔ, “kɔni.”
^ Aloo “o klaa ma gbɔjɔ.”
^ Aloo “níhi nɛ ngɛ ye tsui kɛ ye klaa mi.”
