1 Samuel 6:1-21
-
Filisti bi ɔmɛ kpale Daka a se kɛ ba Israel (1-21)
6 Yehowa Daka a hi Filisti bi ɔmɛ a zugba kpɔ ɔ mi nyɔhiɔ kpaago.
2 Filisti bi ɔmɛ tsɛ osɔfo ɔmɛ kɛ klaali ɔmɛ, nɛ a bi mɛ ke: “Mɛni e sa kaa waa pee Yehowa Daka a? Nyɛɛ tsɔɔ wɔ bɔ nɛ wa ma plɛ kɛ kpale ngɔ kɛ ho e hi he ya ha.”
3 A ha heto ke: “Ke nyɛɛ kɛ Yehowa, Israel Mawu ɔ somi daka a maa ho ɔ, nyɛ ko ngɔ kɛ ho be mi nɛ afɔle ko piɛɛ we he. Bɔ fɛɛ bɔ nɛ ji ɔ, e sa nɛ nyɛɛ ngɔ fɔ yemi afɔle kɛ ya ha lɛ. Ja nyɛ pee jã loko nyɛ ma ná tsami, nɛ nyɛ maa le nɔ́ he je nɛ e je we e nine ngɛ nyɛ nɔ ɔ.”
4 Enɛ ɔ he ɔ, a bi ke: “Mɛni fɔ yemi afɔle nɛ e sa kaa waa ngɔ kɛ ya ha lɛ?” A de ke: “Nyɛɛ ngɔ sika tsu kokoo enuɔ kɛ sika tsu kɔkue enuɔ kɛ ya, ngɛ Filisti ma nɔ yeli ɔmɛ a yibɔ nya, ejakaa haomi kake ɔ nɔuu lɛ ba nyɛ ti nɔ fɛɛ nɔ kɛ nyɛ ma nɔ yeli ɔmɛ a nɔ.
5 E sa nɛ nyɛɛ pee nyɛ kokoo ɔmɛ a henɔhi kɛ kɔkue ɔmɛ nɛ a ngɛ zugba a puɛe ɔ a henɔhi, nɛ e sa nɛ nyɛɛ wo Israel Mawu ɔ hɛ mi nyami. Eko ɔ, e ma ha nɛ e nine be jiɔe tsɔ ngɛ nyɛɛ kɛ nyɛ mawu ɔ kɛ nyɛ zugba a nɔ.
6 Mɛni he je nɛ e sa kaa nyɛɛ kplii nyɛ tsui kaa bɔ nɛ Egipt bi ɔmɛ kɛ Farao kplii a tsui ɔ? Benɛ e kɛ mɛ to ní wawɛɛ ɔ, a wo Israel bi ɔmɛ blɔ, nɛ a je.
7 Jehanɛ ɔ, nyɛɛ pee zugba lɛ ehe, nɛ nyɛɛ ngɔ na enyɔ nɛ a ngɛ bimɛ, nahi nɛ a wui mɛ kuɛpã tso hyɛ kɛ piɛɛ he. Kɛkɛ ɔ, nyɛɛ fi na amɛ kɛ wo zugba lɛ ɔ he, se nyɛɛ ngɔ a bimɛ ɔmɛ kɛ je a he kɛ ho we mi ya.
8 Nyɛɛ ngɔ Yehowa Daka a, nɛ nyɛ kɛ ma zugba lɛ ɔ mi, nɛ nyɛɛ ngɔ sika tsu níhi nɛ nyɛɛ kɛ yaa ha lɛ kaa fɔ yemi afɔle ɔ kɛ wo daka ko mi kɛ ma e kasa nya. Lɔ ɔ se ɔ, nyɛɛ wo lɛ blɔ
9 nɛ nyɛɛ hi hyɛe: Ke e kuɔ kɛ gu blɔ nɛ yaa Bet Shemesh, kɛ yaa lɛ nitsɛ e zugba kpɔ ɔ mi ɔ nɔ ɔ, lɛɛ lɛ nɛ e kɛ amanehlu ngua nɛ ɔ ba wa nɔ ɔ nɛ. Se ke pi jã a, wa maa na kaa pi e nine nɛ fiaa wɔ ní ɔ; oslaa kɛkɛ lɛ ba ná wɔ.”
10 Nyumu ɔmɛ pee jã pɛpɛɛpɛ. A ngɔ na enyɔ nɛ a ngɛ bimɛ, nɛ a fi mɛ kɛ wo zugba lɛ ɔ he, nɛ a ngɔ na bimɛ ɔmɛ kɛ ho we mi ya nɛ a kɛ mɛ ya wo tsu mi.
11 Kɛkɛ nɛ a ngɔ Yehowa Daka a kɛ ma zugba lɛ ɔ mi, nɛ a ngɔ daka a nɛ sika tsu kɔkue ɔmɛ kɛ kokoohi nɛ fuu mɛ ɔ a henɔ ɔmɛ ngɛ mi ɔ hu kɛ ma mi.
12 Nɛ na amɛ nyɛɛ gbɛjegbɛ nɛ yaa Bet Shemesh ɔ nɔ tɛ̃ɛ. A nyɛɛ gbɛjegbɛ ngua kake ɔ nɔ, nɛ benɛ a yaa a, a ngɛ pɛe muu muu; a gba we kɛ yɛ hiɔ nɔ loo muɔ nɔ. Jamɛ a be ɔ mi tsuo ɔ, Filisti ma nɔ yeli ɔmɛ ngɛ nyɛɛe ngɛ a se hluu kɛ ya su Bet Shemesh huzu ɔ nya tɔɔ.
13 Bet Shemesh bi ɔmɛ ngɛ hwiit kpae ngɛ dɔgba a mi. Benɛ a wo a hɛ nɔ nɛ a na Daka a, a bua jɔ saminya kaa a na Daka a.
14 Zugba lɛ ɔ ba su Yoshua, Bet Shemesh no ɔ ngmɔ ɔ mi, nɛ e ba da si ngɛ lejɛ ɔ ngɛ tɛ ngua ko kasa nya. Enɛ ɔ he ɔ, a poo zugba lɛ ɔ tso ɔmɛ, nɛ a ngɔ na amɛ kɛ sã sami afɔle ha Yehowa.
15 Levi bi ɔmɛ je Yehowa Daka a kɛ daka a nɛ piɛɛ he nɛ sika tsu ní ɔmɛ ngɛ mi ɔ kɛ ma si, nɛ a ngɔ mɛ kɛ ma tɛ ngua a nɔ. Bet Shemesh nyumu ɔmɛ sã sami afɔlehi, kɛ afɔle kpahi kɛ ha Yehowa jamɛ a ligbi ɔ.
16 Benɛ Filisti ma nɔ yeli enuɔ ɔmɛ na nɔ́ nɛ ɔ, a kpale kɛ ho Ekron ya jamɛ a ligbi ɔ.
17 Jehanɛ ɔ, sika tsu kokoohi nɛ Filisti bi ɔmɛ kɛ ya ha Yehowa kaa fɔ yemi afɔle ɔ ji nɛ ɔ nɛ: Ashdod nɔ́ kake, Gaza nɔ́ kake, Ashkelon nɔ́ kake, Gat nɔ́ kake, kɛ Ekron nɔ́ kake.
18 Nɛ sika tsu kɔkue ɔmɛ a yibɔ kɛ Filisti bi ɔmɛ a ma amɛ tsuo nɛ ji ma nɔ yeli enuɔ ɔmɛ a ma amɛ a yibɔ sɔ, mahi nɛ a he wa kɛ kɔpehi nɛ gbogbo be a he ɔ tsuo.
Nɛ tɛ ngua a nɛ a ngɔ Yehowa Daka a kɛ ma nɔ ngɛ Yoshua, Bet Shemesh no ɔ ngmɔ ɔ mi ɔ ba pee odase kɛ ba si mwɔnɛ ligbi nɛ ɔ.
19 Se Mawu gbe Bet Shemesh nyumu ɔmɛ, ejakaa a hyɛ Yehowa Daka a. E gbe ni ɔmɛ a kpɛti nihi 50,070,* nɛ ni ɔmɛ bɔni aywilɛho yemi, ejakaa Yehowa gbe a kpɛti nihi babauu nitsɛ.
20 Enɛ ɔ he ɔ, Bet Shemesh nyumu ɔmɛ bi ke: “Mɛnɔ ma nyɛ maa da Yehowa, Mawu nɛ ngɛ klɔuklɔu nɛ ɔ hɛ mi, nɛ mɛnɔ ngɔ lɛ e maa je wa ngɔ kɛ ya?”
21 Lɔ ɔ he ɔ, a tsɔ tsɔli kɛ ho nihi nɛ a ngɛ Kiriat Yearim ɔ a ngɔ ya, nɛ a ya de mɛ ke: “Filisti bi ɔmɛ kpale Yehowa Daka a kɛ ba. Nyɛ kple kɛ ba nɛ nyɛ ba ngɔ kɛ ho.”
Sisi Ningmahi
^ Ngɛ Hebri gbi mi ɔ, “nyumuhi 70, nyumuhi 50,000.”
