2 Matsɛmɛ 13:1-25
13 Ngɛ Yuda Matsɛ Yehoash, Ahazia binyumu ɔ nɔ yemi jeha nɛ ji 23 ɔ mi ɔ, Yehoahaz, Yehu binyumu ɔ bɔni Israel nɔ matsɛ yemi ngɛ Samaria, nɛ e ye nɔ jeha 17.
2 E ya nɔ nɛ e pee ní yayamihi ngɛ Yehowa hɛ mi; e ya nɔ nɛ e pee yayami nɛ Yeroboam, Nebat binyumu ɔ ha nɛ Israel pee ɔ. E kpale we kɛ ji se.
3 Lɔ ɔ he ɔ, Yehowa mi mi fu Israel wawɛɛ, nɛ ngɛ Siria Matsɛ Hazael, kɛ Hazael binyumu Benhadad a be ɔ tsuo mi ɔ, e ngɔ Israel kɛ wo a dɛ.
4 Pee se ɔ, Yehoahaz kpa Yehowa pɛɛ kaa e na lɛ mɔbɔ, nɛ Yehowa bu lɛ tue, ejakaa e na bɔ nɛ Siria matsɛ ɔ wa Israel yi mi ha a.
5 Lɔ ɔ he ɔ, Yehowa je yi wami helɔ ko kɛ ha Israel nɛ e kpɔ̃ mɛ ngɛ Siriabi ɔmɛ a dɛ mi, nɛ Israelbi ɔmɛ nyɛ nɛ a hi si ngɛ mɛ nitsɛmɛ a wehi a mi kaa sa a.*
6 (Se a kpale we kɛ ji yayami nɛ Yeroboam we ɔ pee ɔ se. Yeroboam ha nɛ Israel pee yayami. A ya nɔ nɛ a pee jamɛ a yayami ɔ,* nɛ wɔ tso* ɔ ya nɔ nɛ e hi Samaria.)
7 Tabuli nɛ a ji okpɔngɔ nɔ hili 50, ta zugba lɛhi 10, kɛ tabuli nɛ a nyɛɛɔ nane 10,000 pɛ lɛ piɛ ha Yehoahaz, ejakaa Siria matsɛ ɔ kpata a hɛ mi, nɛ e naa a nɔ kaa zu ngɛ ngma fiaami be mi.
8 Yehoahaz he sane nɛ piɛ, níhi tsuo nɛ e pee, kɛ e he wami ɔ, a ngma ngɛ Israel matsɛmɛ ɔmɛ a be ɔ mi yi nɔ sane womi ɔ mi.
9 Lɔ ɔ se ɔ, Yehoahaz ba gbo,* nɛ a pu lɛ ngɛ Samaria; nɛ e binyumu Yehoash ba ye matsɛ ngɛ e se.
10 Ngɛ Yuda Matsɛ Yehoash nɔ yemi jeha nɛ ji 37 ɔ mi ɔ, Yehoash, nɛ ji Yehoahaz binyumu ɔ bɔni Israel nɔ matsɛ yemi ngɛ Samaria, nɛ e ye nɔ jeha 16.
11 E ya nɔ nɛ e pee ní yayamihi ngɛ Yehowa hɛ mi, nɛ e kpale we kɛ ji yayamihi tsuo nɛ Yeroboam, Nebat binyumu ɔ ha nɛ Israel pee ɔ se. E ya nɔ nɛ e pee jamɛ a yayami ɔmɛ.*
12 Yehoash he sane nɛ piɛ, níhi tsuo nɛ e pee, e he wami, kɛ bɔ nɛ e kɛ Yuda Matsɛ Amazia hwu ta ha a, a ngma ngɛ Israel matsɛmɛ ɔmɛ a be ɔ mi yi nɔ sane womi ɔ mi.
13 Lɔ ɔ se ɔ, Yehoash ba gbo,* nɛ Yeroboam* ba hi e matsɛ sɛ ɔ nɔ. Nɛ a pu Yehoash ngɛ Samaria kɛ piɛɛ Israel matsɛmɛ ɔmɛ a he.
14 Jehanɛ ɔ, benɛ Elisha nu hiɔ nɛ e piɛ bɔɔ nɛ e ma gbo ɔ, Israel Matsɛ Yehoash kple kɛ ba e ngɔ, nɛ e ba fo ya pue e nɔ, nɛ e de lɛ ke: “Ye tsɛ, ye tsɛ! Hyɛ! Israel ta zugba lɛ ɔ kɛ e we okpɔngɔ nɔ hili ɔmɛ!”
15 Kɛkɛ nɛ Elisha de lɛ ke: “Wo kɛ̃ɛ̃ kɛ kɛ̃ɛ̃ mi bihi.” Lɔ ɔ he ɔ, e wo kɛ̃ɛ̃ kɛ kɛ̃ɛ̃ mi bihi.
16 Kɛkɛ nɛ e de Israel matsɛ ɔ ke: “Moo pee kɛ̃ɛ̃ ɔ klaalo.” Nɛ e pee jã. Lɔ ɔ se ɔ, Elisha ngɔ e ninehi kɛ pue matsɛ ɔ nine ɔmɛ a nɔ.
17 Kɛkɛ nɛ Elisha de lɛ ke: “Bli saflɛ ɔ nɛ hɛ mi tsɔɔ puje he ɔ.” Nɛ e bli. Elisha de lɛ ke: “Tsɛ̃ kɛ̃ɛ̃ ɔ!” Nɛ e tsɛ̃. Jehanɛ ɔ, Elisha de ke: “Yehowa kunimi yemi* kɛ̃ɛ̃ mi bi ɔ, Siria nɔ kunimi yemi* kɛ̃ɛ̃ mi bi ɔ! O maa fiaa Siria ní* ngɛ Afek hluu kɛ yaa si benɛ o ma kpata Siria hɛ mi pɛsɛpɛsɛ.”
18 Elisha ya nɔ nɛ e de lɛ ke: “Wo kɛ̃ɛ̃ mi bi ɔmɛ,” nɛ e wo. Lɔ ɔ se ɔ, e de Israel matsɛ ɔ ke: “Kɛ gbɔɔ zugba.” Nɛ e kɛ gbɔɔ zugba si etɛ, nɛ e kpa.
19 Kɛkɛ nɛ anɔkuale Mawu ɔ nɔmlɔ ɔ mi mi fu lɛ wawɛɛ, nɛ e de ke: “E sa nɛ o ko ngɔ kɛ gbɔɔ zugba si enuɔ loo si ekpa! Kɛkɛ ɔ, o ko fiaa Siria ní hluu kɛ ya si benɛ o ma kpata Siria hɛ mi pɛsɛpɛsɛ, se amlɔ nɛ ɔ, o maa fiaa Siria ní si etɛ pɛ.”
20 Lɔ ɔ se ɔ, Elisha gbo nɛ a pu lɛ. Daa jeha sisije ɔ,* Moab basabasa peeli a kuuhi baa zugba a nɔ.
21 Benɛ nyumu komɛ yaa pu nyumu ko ɔ, a na basabasa peeli a kuu ɔ, lɔ ɔ he ɔ, oya nɔuu nɛ a sake gbogboe ɔ kɛ fɔ he nɛ a pu Elisha ngɛ ɔ, nɛ a tu fo. Benɛ gbogboe ɔ he sa Elisha wu ɔmɛ a he ɔ, e ba wami mi, nɛ e te si da e nane nɔ.
22 Jehanɛ ɔ, Siria Matsɛ Hazael wa Israel yi mi ngɛ Yehoahaz ligbi ɔmɛ tsuo a mi.
23 Se Yehowa dloo mɛ, nɛ e na mɛ mɔbɔ, nɛ e mi mi sa lɛ ngɛ a he ngɛ somi nɛ e kɛ Abraham, Isak, kɛ Yakob so ɔ he je. E sume nɛ e ma kpata a hɛ mi, nɛ e fiee we mɛ kɛ ji e hɛ mi kɛ ba si mwɔnɛ ligbi nɛ ɔ.
24 Benɛ Siria Matsɛ Hazael gbo ɔ, e binyumu Benhadad ba ye matsɛ ngɛ e se.
25 Lɔ ɔ se ɔ, Yehoash nɛ ji Yehoahaz binyumu ɔ kpale ngɔ mahi nɛ Benhadad, Hazael binyumu ɔ ngɔ ngɛ e tsɛ Yehoahaz dɛ ngɛ ta mi ɔ. Yehoash fiaa lɛ ní* si etɛ, nɛ e nine kpale su Israel ma amɛ a nɔ.
Sisi Ningmahi
^ Lɔ ɔ ji, ngɛ tue mi jɔmi kɛ slɔkee si himi mi.
^ Ngɛ Hebri gbi mi ɔ, “E nyɛɛ ngɛ jamɛ a yayami ɔ mi.”
^ Aloo “Yehoahaz kɛ e nɛmɛ ɔmɛ ya hwɔ.”
^ Ngɛ Hebri gbi mi ɔ, “E nyɛɛ ngɛ jamɛ a yayami ɔmɛ a mi.”
^ Aloo “Yehoash kɛ e nɛmɛ ya hwɔ.”
^ Nɛ ji, Yeroboam enyɔne ɔ.
^ Aloo “yi wami hemi.”
^ Aloo “yi wami hemi kɛ je Siria dɛ mi.”
^ Aloo “O maa ye Siria nɔ kunimi.”
^ Ngɛ Hebri gbi mi ɔ, “jeha nɛ maa ba a,” eko ɔ, ngɛ Yudabi a nyɔhiɔ nɛ ji Abib (Nisan) ɔ mi.
^ Aloo “ye e nɔ kunimi.”
