2 Matsɛmɛ 2:1-25

  • A wo Eliya nɔ kɛ je ngɛ kɔɔhiɔ nɛ nya wa mi (1-18)

    • Eliya tade ɔ ba pee Elisha nɔ́ (13, 14)

  • Elisha ha nɛ Yeriko nyu ɔ pee klɔuklɔu (19-22)

  • Osisiblisihi gbe jokuɛ nyumuwi nɛ a je Betel ɔ (23-25)

2  Benɛ e piɛ bɔɔ nɛ Yehowa maa ngɔ Eliya kɛ ho hiɔwe* ya ngɛ kɔɔhiɔ nɛ nya wa mi ɔ, Eliya kɛ Elisha pue nɔ kɛ je Gilgal kɛ ho. 2  Eliya de Elisha ke: “I kpa mo pɛɛ nɛ o hi hiɛ ɔ, ejakaa Yehowa tsɔ mi Betel.” Se Elisha de lɛ ke: “Be abɔ nɛ Yehowa hɛ ngɛ, nɛ́ mo hu o* hɛ ngɛ nɛ ɔ, i be mo sie.” Lɔ ɔ he ɔ, a kple kɛ ho Betel ya. 3  Kɛkɛ nɛ gbali ɔmɛ a binyumu ɔmɛ* nɛ a ngɛ Betel ɔ je kpo kɛ ba Elisha ngɔ nɛ a ba bi lɛ ke: “Anɛ o le kaa mwɔnɛ ɔ, Yehowa ngɛ o nyɔmtsɛ ɔ nɛ hyɛɛ o nɔ ɔ ngɔe kɛ yaa lo?” Nɛ e de mɛ ke: “I le momo. Nyɛɛ pee kɔ̃.” 4  Jehanɛ ɔ, Eliya de lɛ ke: “Elisha, i kpa mo pɛɛ nɛ o hi hiɛ ɔ, ejakaa Yehowa tsɔ mi Yeriko.” Se Elisha de lɛ ke: “Be abɔ nɛ Yehowa hɛ ngɛ, nɛ́ mo hu o* hɛ ngɛ nɛ ɔ, i be mo sie.” Lɔ ɔ he ɔ, a ba Yeriko. 5  Kɛkɛ nɛ gbali ɔmɛ a binyumu ɔmɛ nɛ a ngɛ Yeriko ɔ su Elisha he, nɛ a bi lɛ ke: “Anɛ o le kaa mwɔnɛ ɔ, Yehowa ngɛ o nyɔmtsɛ ɔ nɛ hyɛɛ o nɔ ɔ ngɔe kɛ yaa lo?” Nɛ e de mɛ ke: “I le momo. Nyɛɛ pee kɔ̃.” 6  Jehanɛ ɔ, Eliya de lɛ ke: “I kpa mo pɛɛ nɛ o hi hiɛ ɔ, ejakaa Yehowa tsɔ mi Yordan.” Se e de Eliya ke: “Be abɔ nɛ Yehowa hɛ ngɛ, nɛ́ mo hu o* hɛ ngɛ nɛ ɔ, i be mo sie.” Lɔ ɔ he ɔ, mɛ ni enyɔ ɔmɛ a tsa nɔ kɛ ho. 7  Nɛ gbali ɔmɛ a binyumuhi 50 hu ho, nɛ a ya da si ngɛ se lokoo, nɛ a ngɛ hyɛe benɛ mɛ ni enyɔ ɔmɛ a ya da si ngɛ Yordan Pa a nya a. 8  Kɛkɛ nɛ Eliya je e tade* ɔ, nɛ e koklo lɛ, nɛ e kɛ fia nyu ɔ mi, nɛ nyu ɔ mi gba kɛ ya hiɛ kɛ hiɛ, nɛ mɛ ni enyɔ ɔmɛ tsuo a nyɛɛ zugba gbigbli nɔ kɛ po pa a. 9  Benɛ a po pa a ta pɛ ɔ, Eliya de Elisha ke: “Mo bi mi nɔ́ nɛ o suɔ kaa ma pee ha mo loko a ngɔ mi kɛ je o he.” Lɔ ɔ he ɔ, Elisha bi ke: “I kpa mo pɛɛ, ma nyɛ ma ná o mumi ɔ mi dlami mi enyɔ lo?” 10  Eliya he nɔ ke: “O bi nɔ́ ko nɛ he wa. Ke o na mi be mi nɛ a ngɛ mi ngɔe kɛ ngɛ o he jee ɔ, e maa ba mi ha mo jã; se ke o nɛ mi ɔ, lɛɛ e be mi bae jã.” 11  Benɛ a ngɛ nyɛɛe kɛ yaa nɛ́ a ngɛ ní sɛɛe ɔ, tlukaa a, la ta zugba lɛ ko kɛ la okpɔngɔhi ba gba mɛ ni enyɔ ɔmɛ a kpɛti, nɛ Eliya ho hiɔwe* ya ngɛ kɔɔhiɔ nɛ nya wa mi. 12  Benɛ Elisha ngɛ hyɛe ɔ, e ngɛ ngmlaa kpae ke: “Ye tsɛ, ye tsɛ! Israel ta zugba lɛ ɔ kɛ e we okpɔngɔ nɔ hili ɔmɛ!” Benɛ e nɛ lɛ hu ɔ, e nu lɛ nitsɛ e tade ɔmɛ, nɛ e gba mi enyɔ. 13  Lɔ ɔ se ɔ, e ngɔ Eliya tade* ɔ nɛ́ je e he kɛ nɔ si ɔ, nɛ e kpale e se kɛ ho, nɛ e ya da si ngɛ Yordan Pa a nya. 14  Kɛkɛ nɛ e ngɔ Eliya tade* ɔ nɛ je e he kɛ nɔ si ɔ kɛ fia nyu ɔ mi, nɛ e bi ke: “Jije Yehowa, Eliya Mawu ɔ ngɛ?” Benɛ e kɛ tade ɔ fia nyu ɔ mi ɔ, nyu ɔ mi gba kɛ ya hiɛ kɛ hiɛ, nɛ Elisha nyɛɛ mi kɛ be. 15  Benɛ gbali ɔmɛ a binyumu ɔmɛ nɛ a ngɛ Yeriko ɔ na lɛ ngɛ tsitsaa a, a de ke: “Eliya mumi ɔ ba Elisha nɔ.” Lɔ ɔ he ɔ, a kɛ lɛ ya kpe, nɛ a kplã si ngɛ e hɛ mi. 16  A de lɛ ke: “Nyumuhi katsɛmɛ 50 piɛɛ o sɔmɔli ɔmɛ a he ngɛ hiɛ ɔ. Wa kpa mo pɛɛ nɛ o ha nɛ a ya nɛ a ya hla o nyɔmtsɛ ɔ. Eko ɔ, Yehowa mumi* ɔ wo e nɔ, nɛ e ya sake lɛ kɛ fɔ yoku ɔmɛ eko nɔ, aloo dɔgba amɛ eko mi.” Se Elisha de mɛ ke: “Nyɛ ko tsɔ mɛ.” 17  Se a nyɛ e nɔ hluu kɛ ya si nɔ́ ɔ ba gbe e nya, lɔ ɔ he ɔ, e de mɛ ke: “Nyɛɛ tsɔ mɛ koo.” A tsɔ nyumuhi 50 ɔmɛ, nɛ a ya hla lɛ ligbi etɛ sɔuu, se a nɛ lɛ. 18  Benɛ a kpale kɛ ba e ngɔ ɔ, jamɛ a be ɔ mi ɔ, e ngɛ Yeriko. Kɛkɛ nɛ e bi mɛ ke: “Anɛ i de we nyɛ ke nyɛ ko ya lo?” 19  Pee se ɔ, ma a mi nyumu ɔmɛ de Elisha ke: “Ye nyɔmtsɛ, mo nitsɛ o na kaa ma a ngɛ he nɛ hi saminya; se nyu ɔ hí, nɛ zugba a hu wui yiblii.”* 20  Kɛkɛ nɛ e de mɛ ke: “Nyɛɛ ngɔ ngo kɛ wo tsesi ehe nyafii ko mi kɛ ba ha mi.” Nɛ a kɛ ba ha lɛ. 21  Kɛkɛ nɛ e je kpo kɛ ho he nɛ nyu ɔ jeɔ kɛ baa a ya, nɛ e ya wo mi ngo, nɛ e de ke: “Nɔ́ nɛ Yehowa ngɛ dee ji nɛ ɔ nɛ, ‘I pee nyu nɛ ɔ klɔuklɔu.* E be nihi gbee hu, nɛ e be yihi yosa pee hu.’”* 22  Nɛ nyu ɔ pee klɔuklɔu* kɛ ba si mwɔnɛ ligbi nɛ ɔ, kaa bɔ nɛ Elisha de ɔ. 23  E je lejɛ ɔ nɛ e kuɔ kɛ ho Betel ya. Benɛ e yaa ngɛ blɔ ɔ nɔ ɔ, jokuɛ nyumuwi komɛ je kpo ngɛ ma a mi kɛ ba, nɛ a ba bɔni e he fɛu yemi, nɛ a ngɛ lɛ dee ke: “Kuɔɔ kɛ ho, mo yi kpɛti kpalokpalotsɛ! Kuɔɔ kɛ ho, mo yi kpɛti kpalokpalotsɛ!” 24  Nyagbenyagbe ɔ, e plɛ e he, nɛ e hyɛ mɛ, nɛ e gbiɛ mɛ ngɛ Yehowa biɛ mi. Kɛkɛ nɛ osisiblisi eyo enyɔ je kpo kɛ je hue tso ɔ mi kɛ ba, nɛ a ba tsɔtslɔɔ jokuɛwi ɔmɛ a kpɛti nihi 42 a mi. 25  E je lejɛ ɔ, nɛ e tsa nɔ kɛ ho Karmel Yoku ɔ nɔ ya, nɛ e je lejɛ ɔ, nɛ e kpale e se kɛ ho Samaria ya.

Sisi Ningmahi

^ Aloo “kɔɔhiɔ mi.”
^ Aloo “o klaa.”
^ “Gbali ɔmɛ a binyumu ɔmɛ” ma nyɛ ma kɔ sukuu nɛ a tsɔɔ gbali ɔmɛ ní ngɛ, aloo gbali a kuu ko he.
^ Aloo “o klaa.”
^ Aloo “o klaa.”
^ Aloo “gbalɔ tade.”
^ Aloo “kɔɔhiɔ mi.”
^ Aloo “gbalɔ tade.”
^ Aloo “gbalɔ tade.”
^ Aloo “kɔɔhiɔ.”
^ Baiblo komɛ de ke “e haa nɛ yihi a mi saneɔ.”
^ Aloo “I tsa nyu nɛ ɔ.”
^ Baiblo komɛ de ke “e be hae nɛ yihi a mi nɛ sane hu.”
^ Aloo “nyu ɔ ná tsami.”
NGMAMI KLƆUKLƆU Ɔ—JE EHE SISI TSƆƆMI
2 Matsɛmɛ 2
Dangme
Kane Baiblo ɔ Ngɛ Intanɛti ɔ Nɔ
https://cms-imgp.jw-cdn.org/img/p/1001061103/univ/art/1001061103_univ_sqr_xl.jpg
nwt