2 Matsɛmɛ 22:1-20
22 Yosia ye jeha kpaanyɔ benɛ e bɔni matsɛ yemi ɔ, nɛ e ye nɔ jeha 31 ngɛ Yerusalem. E nyɛ biɛ ji Yedida, Adaya nɛ je Bozkat ɔ biyo ɔ.
2 E pee nɔ́ nɛ da ngɛ Yehowa hɛ mi, nɛ e nyɛɛ e nɛnɛ David blɔ ɔmɛ tsuo a nɔ, nɛ e gba we kɛ yɛ hiɔ nɔ aloo muɔ nɔ.
3 Ngɛ Matsɛ Yosia nɔ yemi jeha nɛ ji 18 ɔ mi ɔ, matsɛ ɔ tsɔ Shafan, Meshulam binyumu Azalia binyumu ɔ nɛ ji womi ngmalɔ ɔ kɛ ya Yehowa we ɔ, nɛ e de lɛ ke:
4 “Kuɔɔ kɛ ya Hilkia, nɛ ji osɔfo nɔkɔtɔma a ngɔ, nɛ́ o ha nɛ e bua sika tsuo nɛ a kɛ ba Yehowa we ɔ, nɛ ji sika nɛ sinya nya buli ɔmɛ ngɔ ngɛ ni ɔmɛ a dɛ ɔ nya.
5 Ha nɛ e kɛ ha nihi nɛ a ngɔ mɛ kɛ da Yehowa we ɔ ní tsumi ɔ nya a, konɛ mɛ hu a kɛ ha ní tsuli nɛ a ngɛ Yehowa we ɔ nɛ a kɛ dla we ɔ hehi nɛ puɛ ɔ,*
6 nɛ ji ga ní tsuli ɔmɛ, tsu mali ɔmɛ, kɛ gbogbo fiali ɔmɛ; nɛ́ a ngɔ sika a kɛ ya he tsohi kɛ tɛhi nɛ a gba konɛ a kɛ dla we ɔ.
7 Se a ko ha nɛ a bu sika nɛ a kɛ maa wo a dɛ ɔ he akɔtaa, ejakaa a ji nihi nɛ a ma nyɛ maa fĩa kɛ fɔ a nɔ.”
8 Pee se ɔ, Hilkia, nɛ ji osɔfo nɔkɔtɔma a de Shafan nɛ ji womi ngmalɔ ɔ ke: “I na Mlaa womi ɔ ngɛ Yehowa we ɔ.” Lɔ ɔ he ɔ, Hilkia ngɔ womi ɔ kɛ ha Shafan, nɛ e bɔni kanemi.
9 Lɔ ɔ se ɔ, Shafan nɛ ji womi ngmalɔ ɔ ya matsɛ ɔ ngɔ nɛ e ya de lɛ ke: “O sɔmɔli ɔmɛ ya plɛ sika nɛ a ná ngɛ sɔlemi we ɔ, nɛ a kɛ wo nihi nɛ a ngɔ mɛ kɛ da ní tsumi ɔ nya ngɛ Yehowa we ɔ a dɛ.”
10 Jehanɛ hu ɔ, Shafan nɛ ji womi ngmalɔ ɔ de matsɛ ɔ ke: “Osɔfo Hilkia ha mi womi ko.” Kɛkɛ nɛ Shafan bɔni womi ɔ kanemi ngɛ matsɛ ɔ hɛ mi.
11 Benɛ matsɛ ɔ nu Mlaa womi ɔ mi munyu ɔmɛ ɔ, amlɔ nɔuu nɛ e gba e tade ɔmɛ.
12 Kɛkɛ nɛ matsɛ ɔ kɛ fami nɛ ɔ ha osɔfo Hilkia, kɛ Ahikam, nɛ ji Shafan binyumu ɔ, kɛ Akbor, nɛ ji Mikaya binyumu ɔ, kɛ Shafan, nɛ ji womi ngmalɔ ɔ, kɛ Asaya, nɛ ji matsɛ ɔ sɔmɔlɔ ɔ ke:
13 “Nyɛɛ ya nɛ nyɛ ya bi Yehowa juɛmi ha imi, kɛ ni ɔmɛ, kɛ Yuda tsuo ngɛ womi nɛ ɔ mi munyu ɔmɛ a he; ejakaa Yehowa mi mi fu wɔ wawɛɛ nitsɛ akɛnɛ wa nɛmɛ ɔmɛ bui munyuhi tsuo nɛ a ngma ngɛ womi nɛ ɔ mi ngɛ wa he ɔ tue, nɛ́ a yi nɔ ɔ he je.”
14 Lɔ ɔ he ɔ, osɔfo Hilkia, Ahikam, Akbor, Shafan, kɛ Asaya ho gbalɔyo Hulda ngɔ ya. E ji Shalum, nɔ nɛ hyɛɛ tade ɔmɛ a nɔ, nɛ ji Harhas binyumu Tikva binyumu ɔ yo ɔ. Hulda ngɛ Yerusalem Ma He ɔ mi; nɛ a kɛ lɛ ya tu munyu ngɛ lejɛ ɔ.
15 Yo ɔ de mɛ ke: “Nɔ́ nɛ Yehowa, Israel Mawu ɔ ngɛ dee ji nɛ ɔ nɛ, ‘Nyɛ ya de nyumu ɔ nɛ tsɔ nyɛ ye ngɔ ɔ ke:
16 “Nɔ́ nɛ Yehowa ngɛ dee ji nɛ ɔ nɛ, ‘Ma ngɔ amanehlu, nɛ ji munyuhi tsuo nɛ ngɛ womi ɔ mi, nɛ́ Yuda matsɛ ɔ kane ɔ kɛ ba ma nɛ ɔ kɛ nihi nɛ a ngɛ mi ɔ a nɔ.
17 Akɛnɛ a kua mi, nɛ a ngɛ afɔlehi sãe kɛ ngɛ mawu kpahi hae konɛ a kɛ a nine nya ní tsumihi tsuo nɛ wo ye mi mi la he je ɔ, ye mi mi la maa tso gegeege kɛ wo ma nɛ ɔ, nɛ e be hie gbemi.’”
18 Se nyɛ ya de Yuda matsɛ ɔ nɛ e tsɔ nyɛ ke nyɛ ba bi Yehowa juɛmi ɔ ke, “Nɔ́ nɛ Yehowa, Israel Mawu ɔ ngɛ dee ji nɛ ɔ nɛ: ‘Ngɛ munyuhi nɛ o nu ɔ blɔ fa mi ɔ lɛɛ,
19 akɛnɛ o tsake o tsui* nɛ o ba o he si ngɛ Yehowa hɛ mi benɛ o nu nɔ́ nɛ i de ngɛ ma nɛ ɔ kɛ nihi nɛ a ngɛ mi ɔ a he kaa gbiɛmi maa ba a nɔ nɛ nihi maa ye gbeye ngɛ a he je, nɛ́ o gba o tade ɔmɛ, nɛ́ o fo ya ngɛ ye hɛ mi he je ɔ, imi hu i bu mo tue, Yehowa lɛ de.
20 Enɛ ɔ he ɔ, ma ha nɛ o ma gbo,* nɛ a maa pu mo ngɛ o yɔkɔ ɔ mi ngɛ tue mi jɔmi mi, nɛ o hɛngmɛ be amanehlu nɛ ma kɛ ba ma nɛ ɔ nɔ ɔ nae.’”’” Kɛkɛ nɛ a kɛ heto ɔ ba ha matsɛ ɔ.
Sisi Ningmahi
^ Aloo “gba a.”
^ Ngɛ Hebri gbi mi ɔ, “o tsui he jɔ.”
^ Ngɛ Hebri gbi mi ɔ, “ma bua o nya kɛ ya piɛɛ o nɛmɛ ɔmɛ a he.” Enɛ ɔ ji asilɛ gbi nɛ a kɛ tsuɔ ní kɛ haa gbenɔ.
