2 Matsɛmɛ 24:1-20
24 Ngɛ Yehoyakim be ɔ mi ɔ, Babilon Matsɛ Nebukadnezar ba tua Yehoyakim, nɛ Yehoyakim ba pee e sɔmɔlɔ jeha etɛ. Se Yehoyakim te si kɛ wo lɛ nɛ e tsɔ e hɛ mi atuã.
2 Lɔ ɔ se ɔ, Yehowa ha nɛ basabasa peeli a kuuhi nɛ a ji Kaldeabi, Siriabi, Moabbi, kɛ Ammonbi bɔni lɛ tuami. E ya nɔ nɛ e tsɔ mɛ kaa a ya tua Yuda nɛ a kpata ma a hɛ mi kaa bɔ nɛ Yehowa de kɛ gu e sɔmɔli ɔmɛ nɛ ji gbali ɔmɛ a nɔ ɔ.
3 E ngɛ heii kaa Yehowa fami nya nɛ nɔ́ nɛ ɔ ba Yuda nɔ ɔ nɛ, konɛ e kɛ je mɛ kɛ je e hɛ mi ngɛ yayamihi tsuo nɛ Manase pee,
4 kɛ nihi nɛ a pee we nɔ́ ko a muɔ si nɛ e pue ɔ he je, ejakaa e ha nɛ Yerusalem hyi tɔ kɛ nihi nɛ a pee we nɔ́ ko a muɔ, nɛ Yehowa sume kaa e kɛ maa ke lɛ.
5 Yehoyakim he sane nɛ piɛ kɛ níhi tsuo nɛ e pee ɔ, a ngma ngɛ Yuda matsɛmɛ ɔmɛ a be ɔ mi yi nɔ sane womi ɔ mi.
6 Lɔ ɔ se ɔ, Yehoyakim ba gbo* nɛ e binyumu Yehoyakin ba ye matsɛ ngɛ e se.
7 Egipt matsɛ ɔ ji e zugba a nɔ kɛ yɛ he ko hu, ejakaa Babilon matsɛ ɔ kpɔ̃ Egipt matsɛ ɔ nɔ́ fɛɛ nɔ́ ngɛ e dɛ, kɛ je Egipt Dɔ* ɔ nya kɛ ya si Yufrate Pa a nya.
8 Yehoyakin ye jeha 18 benɛ e bɔni matsɛ yemi ɔ, nɛ e ye nɔ nyɔhiɔ etɛ ngɛ Yerusalem. E nyɛ biɛ ji Nehushta, Elnatan nɛ je Yerusalem ɔ biyo ɔ.
9 E ya nɔ nɛ e pee ní yayamihi ngɛ Yehowa hɛ mi kaa bɔ nɛ e tsɛ ɔ pee ɔ pɛpɛɛpɛ.
10 Jamɛ a be ɔ mi ɔ, Babilon Matsɛ Nebukadnezar sɔmɔli ɔmɛ kuɔ kɛ ba tua Yerusalem, nɛ a sa ma a yi.
11 Babilon Matsɛ Nebukadnezar ba ma a mi be mi nɛ e sɔmɔli ɔmɛ sa ma a yi ɔ.
12 Yuda Matsɛ Yehoyakin je kpo kɛ ho Babilon matsɛ ɔ ngɔ ya, e kɛ e nyɛ, e sɔmɔli ɔmɛ, e ma nikɔtɔma amɛ, kɛ e matsɛ we ɔ mi nikɔtɔma amɛ; nɛ Babilon matsɛ ɔ ngɔ lɛ nyɔguɛ ngɛ e* nɔ yemi jeha kpaanyɔne ɔ mi.
13 Lɔ ɔ se ɔ, e muɔɔ juetli tsuo nɛ ngɛ Yehowa we ɔ, kɛ juetli nɛ ngɛ matsɛ we ɔ. E poo sika tsu ní ɔmɛ tsuo nɛ Israel Matsɛ Salomo pee ngɛ Yehowa sɔlemi we ɔ mi tsɔwitsɔwi kaa bɔ nɛ Yehowa gba kɛ fɔ si ɔ.
14 E nuu nihi tsuo nɛ a ngɛ Yerusalem ɔ, ma nikɔtɔma amɛ tsuo, tatsɛmɛ nɛ a he wa a tsuo, kɛ ga ní tsuli tsuo kɛ dade ga ní tsuli* tsuo nyɔguɛ, e nuu nihi 10,000 kɛ ho nyɔguɛ tso mi ya. E si we nɔ ko nɔ ko kaa ja zugba a nɔ bi ɔmɛ a kpɛti ohiatsɛmɛ pe kulaa a pɛ.
15 Lɔ ɔ he ɔ, e nu Yehoyakin kɛ ho nyɔguɛ tso mi ya ngɛ Babilon; jehanɛ hu ɔ, e nuu matsɛ ɔ nyɛ ɔ, matsɛ ɔ yi ɔmɛ, e matsɛ we ɔ nikɔtɔma amɛ, kɛ nyumuhi nɛ a buu mɛ pe nɔ fɛɛ nɔ ngɛ zugba a nɔ ɔ kɛ je Yerusalem, nɛ e kɛ mɛ ho nyɔguɛ tso mi ya ngɛ Babilon.
16 Jehanɛ hu ɔ, Babilon matsɛ ɔ nuu tatsɛmɛ ɔmɛ tsuo nɛ a yibɔ ji 7,000, kɛ ga ní tsuli kɛ dade ga ní tsuli* 1,000 kɛ ho nyɔguɛ tso mi ya ngɛ Babilon. Mɛ tsuo a ji nyumuhi nɛ a he wa nɛ a tsɔse mɛ kɛ ha ta.
17 Babilon matsɛ ɔ wo Matania, nɛ ji Yehoyakin tsɛwayo ɔ matsɛ ngɛ e se, nɛ e tsake e biɛ kɛ pee Zedekia.
18 Zedekia ye jeha 21 benɛ e bɔni matsɛ yemi ɔ, nɛ e ye nɔ jeha 11 ngɛ Yerusalem. E nyɛ biɛ ji Hamutal, Yeremia nɛ je Libna a biyo ɔ.
19 E ya nɔ nɛ e pee ní yayamihi ngɛ Yehowa hɛ mi kaa bɔ nɛ Yehoyakim pee ɔ pɛpɛɛpɛ.
20 Yehowa mi mi fumi ɔ he je nɛ ní nɛ ɔmɛ ba Yerusalem kɛ Yuda nɔ, kɛ ya si be nɛ e je mɛ ngɛ e hɛ mi ɔ nɛ. Nɛ Zedekia tsɔ Babilon matsɛ ɔ hɛ mi atuã.
Sisi Ningmahi
^ Aloo “Yehoyakim kɛ e nɛmɛ ɔmɛ ya hwɔ.”
^ Nɛ ji Babilon matsɛ ɔ.
^ Baiblo komɛ de ke “gbogbo fiali.”
^ Baiblo komɛ de ke “gbogbo fiali.”
