2 Matsɛmɛ 25:1-30
25 Ngɛ Zedekia nɔ yemi jeha nɛɛne ɔ mi, ngɛ nyɔhiɔ nyɔngmane ɔ we ligbi nɛ ji nyɔngma a nɔ ɔ, Babilon Matsɛ Nebukadnezar kɛ e tabo ɔ tsuo ba tua Yerusalem. E ba to si konɛ e kɛ ma a nɛ hwu ta, nɛ e fia ma yi sami gbogbo kɛ bɔle ma a kɛ kpe,
2 nɛ e sa ma a yi kɛ ya si Matsɛ Zedekia nɔ yemi jeha nɛ ji 11 ɔ mi.
3 Ngɛ nyɔhiɔ eywiɛne ɔ we ligbi nɛɛne ɔ nɔ ɔ, hwɔ nya ba wa ngɛ ma a mi, nɛ zugba a nɔ bi ɔmɛ ná we niye ní nɛ a ye.
4 A ku ma a gbogbo ɔ, nɛ tabuli ɔmɛ tsuo tu fo nyɔ mi kɛ gu agbo ɔ nɛ ngɛ gbogbo enyɔ ɔmɛ a kpɛti ngɛ matsɛ ɔ abɔɔ ɔ kasa nya a mi, be mi nɛ Kaldeabi ɔmɛ bɔle ma a; nɛ matsɛ ɔ gu Araba a blɔ kɛ ho.
5 Se Kaldeabi ɔmɛ a tabo ɔ fiee matsɛ ɔ se, nɛ a ya ná lɛ ngɛ Yeriko nga kplanaa a nɔ, nɛ matsɛ ɔ tabuli ɔmɛ tsuo gbɛ fĩa kɛ je e he.
6 Kɛkɛ nɛ a nu matsɛ ɔ, nɛ a kɛ lɛ kuɔ kɛ ba nɛ a kɛ lɛ ba ha Babilon matsɛ ɔ ngɛ Ribla, nɛ a kojo lɛ.
7 A gbe Zedekia binyumu ɔmɛ ngɛ e hɛ mi; lɔ ɔ se ɔ, Nebukadnezar pɛ Zedekia hɛngmɛhi, nɛ e bɔ lɛ akɔblee pã, nɛ e ngɔ lɛ kɛ ho Babilon ya.
8 Ngɛ nyɔhiɔ enuɔne ɔ we ligbi kpaagone ɔ nɔ, nɛ ji Matsɛ Nebukadnezar, Babilon matsɛ ɔ nɔ yemi jeha nɛ ji 19 ɔ mi ɔ, Babilon matsɛ ɔ sɔmɔlɔ Nebuzaradan, nɛ ji buli ɔmɛ a nya dalɔ ɔ ba Yerusalem.
9 E sã Yehowa we ɔ, matsɛ ɔ we ɔ, kɛ wehi tsuo nɛ ngɛ Yerusalem ɔ; e sã nyumu fɛɛ nyumu nɛ e he biɛ ɔ we hulɔ.
10 Nɛ Kaldeabi ɔmɛ a tabo ɔ tsuo nɛ a piɛɛ buli ɔmɛ a nya dalɔ ɔ he ɔ hule gbogbo ɔmɛ nɛ bɔle Yerusalem ɔ kɛ pue si.
11 Nebuzaradan nɛ ji buli ɔmɛ a nya dalɔ ɔ nuu nihi nɛ a piɛ nɛ a si mɛ ngɛ ma a mi, nihi nɛ a kɛ a he ya ha Babilon matsɛ ɔ, kɛ ma a mi bi nɛ piɛ ɔ tsuo kɛ ho nyɔguɛ tso mi ya.
12 Se buli ɔmɛ a nya dalɔ ɔ si zugba a nɔ bi ɔmɛ a kpɛti ohiatsɛmɛ pe kulaa a konɛ a sɔmɔ kaa wai ngmɔ nɔ hyɛli kɛ nihi nɛ a nyɛɔ a nɔ kɛ tsuɔ ní tsumi kpakpataa.
13 Kaldea bi ɔmɛ ywia akɔblee titima amɛ nɛ ngɛ Yehowa we ɔ, kɛ tlɔɔke ɔmɛ, kɛ akɔblee Wo ɔ nɛ ngɛ Yehowa we ɔ wɔtsɔwɔtsɔ, nɛ a muɔɔ akɔblee ɔ kɛ ho Babilon ya.
14 Jehanɛ hu ɔ, a muɔɔ lazu muɔɔmi ní ɔmɛ, sofi ɔmɛ, la gbemi ní ɔmɛ, kplu ɔmɛ, kɛ akɔblee níhi tsuo nɛ a kɛ tsuɔ ní ngɛ sɔlemi we ɔ kɛ ho.
15 Buli ɔmɛ a nya dalɔ ɔ muɔɔ la jemi ní ɔmɛ kɛ kplu ɔmɛ nɛ a kɛ sika tsu kpakpa kɛ sika hiɔ kpakpa pee ɔ kɛ ho.
16 Titima enyɔ ɔmɛ, Wo ɔ, kɛ tlɔɔke ɔmɛ nɛ Salomo pee ngɛ Yehowa we ɔ lɛɛ, a nyɛ we nɛ a ngmɛ akɔblee nɛ a kɛ pee jamɛ a ní ɔmɛ ɔ, ejakaa a jiɔ tsɔ.
17 Titima amɛ eko fɛɛ eko hiɔwe yami ji kɔni fã* 18, nɛ titima a yi mi kpɔ ɔ, a kɛ akɔblee lɛ pee; nɛ titima a yi mi kpɔ ɔ hiɔwe yami ji kɔni fã etɛ, nɛ ya a kɛ pomegranet ɔ nɛ bɔle titima a yi mi kpɔ ɔ he kɛ kpe ɔ, akɔblee lɛ a kɛ pee. Titima enyɔne ɔ he ya a hu, jã nɛ e ngɛ.
18 Buli ɔmɛ a nya dalɔ ɔ nuu Seraya, nɛ ji osɔfo nɔkɔtɔma a, kɛ Zefania, nɛ ji osɔfo enyɔne ɔ, kɛ sinya nya buli etɛ ɔmɛ.
19 Nɛ e nuu matsɛ ɔ we ɔ mi nikɔtɔma amɛ a kpɛti nɔ kake nɛ ji tabuli ɔmɛ a nɔ hyɛlɔ ɔ, matsɛ ɔ huɛmɛ enuɔ nɛ nyu bi ngɛ e kɛ mɛ a kpɛti nɛ a ngɛ ma a mi ɔ, tabo ɔ nya dalɔ ɔ womi ngmalɔ ɔ, nɛ ji nɔ nɛ buaa zugba a nɔ bi ɔmɛ a nya a, kɛ zugba a nɔ nimli gu ɔmɛ a kpɛti nyumuhi 60 nɛ a ngɛ ma a mi loloolo ɔ kɛ ho.
20 Nebuzaradan, nɛ ji buli ɔmɛ a nya dalɔ ɔ nuu mɛ, nɛ e ngɔ mɛ kɛ ba ha Babilon matsɛ ɔ ngɛ Ribla.
21 Babilon matsɛ ɔ fiaa mɛ ní nɛ e gbe mɛ ngɛ Ribla, ngɛ Hamat zugba a nɔ. Lɔ ɔ he ɔ, a ngɔ Yuda kɛ ho nyɔguɛ tso mi ya.
22 Babilon Matsɛ Nebukadnezar hla Gedalia, nɛ ji Shafan binyumu Ahikam binyumu ɔ konɛ e hyɛ nihi nɛ e si mɛ ngɛ Yuda zugba a nɔ ɔ a nɔ.
23 Benɛ tabo ɔ hɛ mi nyɛɛli ɔmɛ tsuo nu kaa Babilon matsɛ ɔ hla Gedalia kaa e hyɛ ni ɔmɛ a nɔ ɔ, amlɔ nɔuu nɛ a ba Gedalia ngɔ ngɛ Mizpa. Mɛ ji Ishmael, Netania binyumu ɔ, Yohanan, Karea binyumu ɔ, Seraya, Tanhumet nɛ ji Netofano ɔ binyumu ɔ, kɛ Yaazania, Maakatno ɔ binyumu ɔ, kɛ nyumuhi nɛ piɛɛ a he ɔ.
24 Gedalia kã a kɛ a nyumu ɔmɛ kita nɛ e de mɛ ke: “Nyɛ ko ye gbeye kaa nyɛ ma sɔmɔ Kaldeabi ɔmɛ. Nyɛɛ hi zugba a nɔ nɛ nyɛ sɔmɔ Babilon matsɛ ɔ, nɛ níhi a mi maa hi ha nyɛ.”
25 Ngɛ nyɔhiɔ kpaagone ɔ mi ɔ, Ishmael, Elishama binyumu Netania binyumu ɔ, nɔ nɛ ngɛ he blɔ kaa e yeɔ matsɛ ɔ,* kɛ nyumuhi nyɔngma ba nɛ a ba fia Gedalia nɔ́ nɛ e gbo, nɛ a gbe Yuda bi ɔmɛ, kɛ Kaldea bi ɔmɛ nɛ a kɛ lɛ ngɛ Mizpa a hulɔ.
26 Lɔ ɔ se ɔ, ni ɔmɛ tsuo, kɛ je nɔ nyafii nɔ kɛ ya si nɔmlɔ ngua nɔ, kɛ tabo hɛ mi nyɛɛli ɔmɛ te si nɛ a je kɛ ho Egipt ya, ejakaa a ngɛ Kaldea bi ɔmɛ gbeye yee.
27 Nɛ benɛ a nu Yuda Matsɛ Yehoyakin kɛ ho nyɔguɛ tso mi ya a jeha nɛ ji 37 ɔ we nyɔhiɔ nɛ ji 12 ɔ we ligbi nɛ ji 27 ɔ nɔ ɔ, Babilon Matsɛ Evilmerodak je Yuda Matsɛ Yehoyakin* ngɛ tsu mi ngɛ jeha nɛ e bɔni matsɛ yemi ɔ mi.
28 E kɛ lɛ tu munyu ngɛ mi mi jɔmi mi, nɛ e ha nɛ e matsɛ sɛ ɔ nɔ kuɔ pe matsɛmɛ ɔmɛ nɛ a kɛ lɛ ngɛ Babilon ɔ a matsɛ sɛ ɔmɛ.
29 Lɔ ɔ he ɔ, Yehoyakin je e tsu womi tade ɔmɛ ngɛ e he, nɛ ngɛ e wami ligbi ɔmɛ tsuo a mi ɔ, e yeɔ ní ngɛ matsɛ ɔ okplɔɔ ɔ he daa.
30 Ngɛ e wami ligbi ɔmɛ tsuo a mi ɔ, matsɛ ɔ haa lɛ niye ní daa ligbi.
Sisi Ningmahi
^ Kɔni fã kake peeɔ sɛntimita 44.5 (intsisi 17.5). Hyɛ Mi Tsɔɔmi Munyu B14.
^ Ngɛ Hebri gbi mi ɔ, “nɛ ji matsɛ yemi ɔ ngmɛdu ɔ.”
^ Ngɛ Hebri gbi mi ɔ, “wo Yuda Matsɛ Yehoyakin yi nɔ.”
