2 Matsɛmɛ 6:1-33
6 Gbali ɔmɛ a binyumu ɔmɛ de Elisha ke: “Hyɛ! He nɛ waa kɛ mo ngɛ ɔ klee we ha wɔ.
2 Wa kpa mo pɛɛ, ha nɛ waa ho Yordan Pa a he ya. Ha nɛ wa ti nɔ fɛɛ nɔ nɛ ya po tso ngɛ lejɛ ɔ konɛ wa kɛ pee he ko nɛ wa ma nyɛ maa hi ngɛ lejɛ ɔ.” E de mɛ ke: “Nyɛɛ ya.”
3 A kpɛti nɔ kake bi lɛ ke: “Wa kpa mo pɛɛ, tse o kɛ o sɔmɔli ɔmɛ maa ya?” Nɛ e de ke: “I kɛ nyɛ maa ya.”
4 Lɔ ɔ he ɔ, e kɛ mɛ ho, nɛ benɛ a ya su Yordan Pa a he ɔ, a bɔni tso ɔmɛ poomi.
5 Benɛ a kpɛti nɔ kake ngɛ tso ko poe ɔ, gbiɛ ɔ yi kpɔ kɛ nɔ nyu ɔ mi, nɛ e kpa ngmlaa ke: “Ao, ye nyɔmtsɛ, pe wa ya ba oo!”
6 Anɔkuale Mawu ɔ nɔmlɔ ɔ bi lɛ ke: “Jije e nɔ?” Nɛ e tsɔɔ lɛ he nɛ e nɔ ɔ. Kɛkɛ nɛ e po tso ko, nɛ e fɔ tso ɔ kɛ fɔ lejɛ ɔ, nɛ gbiɛ ɔ yi ɔ ba da nyu ɔ hɛ.
7 E de lɛ ke: “Mo wo.” Lɔ ɔ he ɔ, e kpa e nine mi nɛ e wo.
8 Jehanɛ ɔ, Siria matsɛ ɔ ya konɛ e kɛ Israel nɛ ya hwu ta. E kɛ e sɔmɔli ɔmɛ susu he nɛ e de mɛ ke: “I kɛ nyɛ ma ya to si ngɛ hiɛ ɔ kɛ hiɛ ɔ.”
9 Kɛkɛ nɛ anɔkuale Mawu ɔ nɔmlɔ ɔ tsɔ nɛ a kɛ sɛ gbi ya ha Israel matsɛ ɔ ke: “Hyɛ nɛ o ko gu lejɛ ɔ, ejakaa lejɛ ɔ ji he nɛ Siriabi ɔmɛ maa gu kɛ ba.”
10 Lɔ ɔ he ɔ, Israel matsɛ ɔ tsɔ nɛ a kɛ sɛ gbi ya ha e we bi ɔmɛ nɛ a ngɛ he nɛ anɔkuale Mawu ɔ nɔmlɔ ɔ bɔ lɛ kɔkɔ kaa e ko ya a. E ya nɔ nɛ e bɔ matsɛ ɔ kɔkɔ, nɛ e yɛ lejɛ ɔ. Nɔ́ nɛ ɔ ya nɔ si abɔ.*
11 Enɛ ɔ ha nɛ Siria matsɛ ɔ mi mi fu,* nɛ e tsɛ e sɔmɔli ɔmɛ nɛ e bi mɛ ke: “Nyɛ de mi! Wa kpɛti mɛnɔ lɛ e fĩ Israel matsɛ ɔ se?”
12 Kɛkɛ nɛ e sɔmɔli ɔmɛ a kpɛti nɔ kake de ke: “Ye nyɔmtsɛ matsɛ, pi wa ti nɔ ko nɔ ko! Gbalɔ Elisha nɛ ngɛ Israel ɔ ji nɔ nɛ deɔ Israel matsɛ ɔ níhi nɛ o deɔ ngɛ mo nitsɛ o tsu nɛ o hwɔɔ mi ɔ mi ɔ nɛ.”
13 Matsɛ ɔ de mɛ ke: “Nyɛɛ ya nɛ nyɛ ya hla he nɛ e ngɛ, konɛ ma tsɔ nyumuhi nɛ a ya nu lɛ kɛ ba.” Pee se ɔ, a ba bɔ lɛ amaniɛ ke: “E ngɛ Dotan.”
14 Oya nɔuu nɛ e tsɔ okpɔngɔhi kɛ ta zugba lɛhi kɛ tabuli babauu kɛ ya lejɛ ɔ; a ya su nyɔ mi, nɛ a bɔle ma a.
15 Mɔtu mla benɛ anɔkuale Mawu ɔ nɔmlɔ ɔ tsɔlɔ* ɔ te si nɛ e je kpo ɔ, e na kaa tabuli kɛ okpɔngɔhi kɛ ta zugba lɛhi bɔle ma a. Oya nɔuu nɛ tsɔlɔ ɔ de Elisha ke: “Akuanyɛ, ye nyɔmtsɛ! Kɛ wa maa pee kɛɛ?”
16 Se e de tsɔlɔ ɔ ke: “Koo ye gbeye! Ejakaa nihi nɛ a kɛ wɔ ngɛ ɔ hiɛ pe nihi nɛ a kɛ mɛ ngɛ ɔ.”
17 Kɛkɛ nɛ Elisha bɔni sɔlemi ke: “Oo Yehowa, i kpa mo pɛɛ nɛ o bli e hɛngmɛ konɛ e hyɛ nɔ́.” Amlɔ nɔuu nɛ Yehowa bli tsɔlɔ ɔ hɛngmɛ nɛ e na, nɛ hyɛ! yoku ɔmɛ a nɔ hyi tɔ kɛ la okpɔngɔhi kɛ la ta zugba lɛhi nɛ bɔle Elisha kɛ kpe.
18 Benɛ Siriabi ɔmɛ kple kɛ ba Elisha ngɔ ɔ, e sɔle ha Yehowa nɛ e de ke: “I kpa mo pɛɛ, ha nɛ ma nɛ ɔ hɛngmɛ nɛ yu.” Lɔ ɔ he ɔ, e ha nɛ a hɛngmɛ yu kaa bɔ nɛ Elisha bi ɔ.
19 Kɛkɛ nɛ Elisha de mɛ ke: “Pi blɔ ɔ ji nɛ ɔ, nɛ tsa pi ma a hu ji nɛ ɔ. Nyɛɛ nyɛɛ ye se konɛ ma ngɔ nyɛ kɛ ya nyumu ɔ nɛ nyɛ ngɛ lɛ hlae ɔ ngɔ.” Se e ngɔ mɛ kɛ ho Samaria ya.
20 Benɛ a ya su Samaria a, Elisha de ke: “Oo Yehowa, mo bli a hɛngmɛ konɛ a hyɛ nɔ́.” Lɔ ɔ he ɔ, Yehowa bli a hɛngmɛ nɛ a na kaa a ngɛ Samaria ma a kpɛti.
21 Benɛ Israel matsɛ ɔ na mɛ ɔ, e bi Elisha ke: “Ye tsɛ, ma gbe mɛ lo, ma gbe mɛ lo?”
22 Se Elisha de lɛ ke: “Koo gbe mɛ. Anɛ o gbeɔ nihi nɛ o kɛ o klaate kɛ o kɛ̃ɛ̃ nuu mɛ nyɔguɛ ɔ lo? Ha mɛ ní nɛ a ye kɛ nyu nɛ a nu, nɛ́ a kpale kɛ ho a nyɔmtsɛ ɔ ngɔ ya.”
23 Lɔ ɔ he ɔ, e ngmɛ mɛ okplɔɔ ngua, nɛ a ye ní nɛ a nu ní, nɛ lɔ ɔ se ɔ, e wo mɛ blɔ kɛ ho a nyɔmtsɛ ɔ ngɔ ya. Nɛ kɛ je lɔ ɔ se ɔ, Siriabi ɔmɛ a basabasa peeli a kuu ɔ ba tua we Israel zugba a hu.
24 Lɔ ɔ se ɔ, Siria Matsɛ Benhadad bua e tabo* ɔ tsuo nya, nɛ a kuɔ kɛ ho nɛ a ya sa Samaria yi.
25 Lɔ ɔ he ɔ, hwɔ nɛ nya wa ba Samaria, nɛ a sa ma a yi kɛ ya si be nɛ a jua teji yi kake sika hiɔ 80, nɛ a jua beleku lahuɛ fĩ dɛ kɔkɔ enyɔ* sika hiɔ 5.
26 Benɛ Israel matsɛ ɔ bee ngɛ gbogbo ɔ nɔ ɔ, yo ko kpa ngmlaa kɛ de lɛ ke: “Oo ye nyɔmtsɛ matsɛ, ye bua wɔ!”
27 Nɛ matsɛ ɔ de lɛ ke: “Ke Yehowa yi bua mo ɔ, jije ma ná yemi kɛ buami ngɛ kɛ ha mo? Anɛ ma ná kɛ je ngma fiaami he ɔ lo? Aloo kɛ je wai kɛ nu ngami he ɔ?”
28 Matsɛ ɔ bi lɛ ke: “Mɛni ji o sane ɔ?” E he nɔ ke: “Yo nɛ ɔ de mi ke, ‘Moo ngɔ o binyumu ɔ kɛ ba nɛ́ waa ye lɛ mwɔnɛ ɔ, konɛ hwɔɔ ɔ, waa ye ye binyumu ɔ.’
29 Lɔ ɔ he ɔ, wa hoo ye binyumu ɔ nɛ wa ye. E nɔ jena a, i de lɛ ke, ‘Moo ngɔ o binyumu ɔ kɛ ba nɛ waa ye.’ Se e ngɔ e binyumu ɔ kɛ ya laa.”
30 Benɛ matsɛ ɔ nu yo ɔ munyu ɔmɛ pɛ ɔ, e gba e tade ɔmɛ. Benɛ matsɛ ɔ bee ngɛ gbogbo ɔ nɔ ɔ, ni ɔmɛ na kaa e wo kpekpe ngɛ e tade ɔmɛ a sisi.
31 Kɛkɛ nɛ e de ke: “Ke i pui Elisha, Shafat binyumu ɔ yi ngɛ nya mwɔnɛ ɔ, lɛɛ Mawu kɛ mi nɛ ye nɛ e kɛ mi nɛ ye wawɛɛ nitsɛ!”
32 Elisha hii si ngɛ e we ɔ mi, nɛ nikɔtɔma amɛ hii si ngɛ e kasa nya. Kɛkɛ nɛ matsɛ ɔ tsɔ nyumu ko kɛ sɛ e hlami, se loko tsɔlɔ ɔ ma ba su ɔ, Elisha de nikɔtɔma amɛ ke: “Tse nyɛ na kaa nɔ gbelɔ bi nɛ ɔ tsɔ konɛ a ba po ye yi? Nyɛɛ hyɛ nɛ́ ke tsɔlɔ ɔ ba a, nyɛ nga sinya a, nɛ nyɛɛ pi sinya a se konɛ e ko nyɛ nɛ e sɛ mi. Anɛ pi e nyɔmtsɛ ɔ nane si nɛ ngɛ pɛe ngɛ e se kɛ ma a lo?”
33 Benɛ e kɛ mɛ ngɛ munyu tue nɛ e nya mɛ si ɔ, tsɔlɔ ɔ ba hia si, nɛ matsɛ ɔ hu ba hia si nɛ e de ke: “Haomi nɛ ɔ je Yehowa ngɔ. Mɛni he je nɛ e sa nɛ ma ya nɔ nɛ ma mlɛ Yehowa?”
Sisi Ningmahi
^ Aloo “Pi si kake loo si enyɔ nɛ nɔ́ nɛ ɔ ya nɔ.”
^ Ngɛ Hebri gbi mi ɔ, “matsɛ ɔ tsui wo la.”
^ Aloo “sɔmɔlɔ.”
^ Ngɛ Hebri gbi mi ɔ, “sito he.”
^ Aloo “kab mi dlami eywiɛ mi kake.” Kab kake peeɔ Lita 1.22 (kwat 1.11). Hyɛ Mi Tsɔɔmi Munyu B14.
