Womi Enyɔne Kɛ Ya Ha Tɛsalonika Bi Ɔmɛ 3:1-18
3 Nyagbe ɔ, nyɛmimɛ, nyɛɛ ya nɔ nɛ nyɛɛ sɔle ha wɔ konɛ Yehowa* munyu ɔ nɛ ya nɔ nɛ e gbɛ kɛ fĩa mlamlaamla nɛ a hi e hɛ mi nyami woe, kaa bɔ nɛ e ji ngɛ nyɛ blɔ fa mi ɔ,
2 konɛ a kpɔ̃ wɔ kɛ je awi yeli kɛ nimli yayamihi a dɛ mi, ejakaa pi nihi tsuo nɛ a ngɛ hemi kɛ yemi.
3 Se anɔkualetsɛ ji Nyɔmtsɛ ɔ nɛ, nɛ e maa wo nyɛ he wami, nɛ e maa po nyɛ he piɛ kɛ je nɔ yayami ɔ he.
4 Jehanɛ se hu ɔ, wa ngɛ nɔ mi mami ngɛ Nyɔmtsɛ ɔ mi ngɛ nyɛ he kaa nyɛ ngɔ wa blɔ tsɔɔmi ɔmɛ kɛ ngɛ ní tsue, nɛ nyɛ maa ya nɔ nɛ nyɛɛ kɛ ma tsu ní.
5 Nyɔmtsɛ ɔ nɛ e ya nɔ nɛ e kudɔ nyɛ tsui saminya kɛ ya Mawu suɔmi ɔ kɛ si fimi ngɛ Kristo he ɔ he.
6 Jehanɛ ɔ, nyɛmimɛ, waa kɛ blɔ tsɔɔmi ngɛ nyɛ hae ngɛ wa Nyɔmtsɛ Yesu Kristo biɛ ɔ mi, kaa nyɛ je nyɛ he kɛ je nyɛmi fɛɛ nyɛmi nɛ e ngɛ nyɛɛe basabasa nɛ e nyɛɛ we ngɛ kusumihi* nɛ nyɛ* nine su nɔ kɛ je wa ngɔ ɔmɛ a nya a he.
7 Ejakaa nyɛ nitsɛmɛ nyɛ le bɔ nɛ e sa kaa nyɛɛ kase wɔ ha, ejakaa wa bɛ wa je mi ngɛ blɔ basabasa nɔ ngɛ nyɛ kpɛti,
8 jã kɛ̃ nɛ wa yi nɔ ko nɔ ko niye ní yaka gu.* Se mohu waa kɛ dengme kɛ pɔtɔ tsuɔ ní nyɔ kɛ pia bɔ nɛ pee nɛ wa ko pee tloomi ha nyɛ ti nɔ ko nɛ́ e ba puɛ sika fuu ngɛ wa he.
9 Pi kaa wa be he blɔ, se mohu wa suɔ kaa wa maa ngɔ wa he kɛ ha kaa nɔ hyɛmi nɔ́ kɛ ha nyɛ konɛ nyɛɛ kase wɔ.
10 Ngɛ anɔkuale mi ɔ, benɛ waa kɛ nyɛ ngɛ ɔ, waa kɛ fami nɛ ɔ pɔɔ nyɛ hami: “Ke nɔ ko sume kaa e ma tsu ní ɔ, lɛɛ eko ye ní hulɔ.”
11 Ejakaa wa nu kaa ni komɛ ngɛ nyɛɛe basabasa ngɛ nyɛ kpɛti nɛ a tsu we ní kulaa, se mohu a kɛ a he ngɛ sanehi nɛ kɔ we a he mi woe.
12 Ngɛ jamɛatsɛmɛ ɔmɛ a he ɔ, waa kɛ fami kɛ ga womi nɛ ɔ ngɛ hae ngɛ Nyɔmtsɛ Yesu Kristo mi kaa a tsu ní kpoo, nɛ a ye niye ní nɛ mɛ nitsɛmɛ a tsu ní kɛ ná a.
13 Nyɛmimɛ, ngɛ nyɛ blɔ fa mi ɔ, nyɛ kɔni nɛ ko gbo ngɛ kpakpa peemi he.
14 Se ke nɔ ko bui wa munyu ɔ nɛ ngɛ sɛ womi nɛ ɔ mi ɔ tue ɔ, nyɛɛ to jamɛ a nɔ ɔ he so, nɛ nyɛɛ kɛ lɛ nɛ jɔɔ bɔmi, bɔ nɛ pee nɛ zo nɛ gbe lɛ.
15 Se kɛ̃ ɔ, nyɛ ko bu lɛ kaa he nyɛlɔ, mohu ɔ, nyɛɛ ya nɔ nɛ nyɛɛ hi lɛ ga woe kaa nyɛmi.
16 Jehanɛ ɔ, tue mi jɔmi Nyɔmtsɛ ɔ nitsɛ nɛ e ha nyɛ tue mi jɔmi be fɛɛ be ngɛ blɔ fɛɛ blɔ nɔ. Nyɔmtsɛ ɔ kɛ nyɛ tsuo nɛ hi si.
17 Imi Paulo nɛ́ i kɛ imi nitsɛ ye nine ngma sɛ womi nɛ ɔ ke i biɔ nyɛ, nɛ e ji okadi ngɛ sɛ womi fɛɛ sɛ womi mi; kikɛ nɛ ɔ ji bɔ nɛ i ngmaa ní.
18 Wa Nyɔmtsɛ Yesu Kristo dloomi ɔ kɛ nyɛ tsuo nɛ hi si.
Sisi Ningmahi
^ Hyɛ Munyu Komɛ A Sisi Tsɔɔmi.
^ Aloo “blɔ tsɔɔmihi.”
^ E ma nyɛ maa pee kaa “a.”
^ Aloo “nɛ wa wui he hiɔ.”
