Womi Enyɔne Kɛ Ya Ha Korinto Bi Ɔmɛ 10:1-18
10 Amlɔ nɛ ɔ, imi Paulo nitsɛ, i kɛ Kristo he jɔmi ɔ kɛ e mi mi himi ɔ ngɛ nyɛ pɛɛ kpae, e ngɛ mi kaa ke i ngɛ nyɛ kpɛti hɛ mi kɛ hɛ mi ɔ, i ba si mohu lɛɛ, se ke i be nyɛ kpɛti ɔ, i hiaa kã kɛ woɔ nyɛ.
2 I ngɛ pɛɛ kpae kaa ke i ba a, e ko ba mi kaa ma ba pee kã kaa bɔ nɛ i ngɛ blɔ hyɛe ɔ, nɛ́ i kɛ ni komɛ nɛ a buɔ wɔ kaa wa nyɛɛɔ ngɛ he lo nya a nɛ ba to ní.
3 Ejakaa e ngɛ mi kaa wa nyɛɛɔ ngɛ he lo mi mohu lɛɛ, se wa hwui ta kaa bɔ nɛ wa ngɛ ha ngɛ he lo mi ɔ.
4 Ejakaa wa ta hwumi ní ɔmɛ ɔ, pi he lo nya níhi, mohu ɔ, Mawu ha nɛ a ngɛ he wami konɛ wa kɛ plɛ níhi nɛ a du si wawɛɛ ɔmɛ a hɛ mi kɛ bu si.
5 Ejakaa wa ngɛ susumihi kɛ nɔ́ fɛɛ nɔ́ nɛ ngɛ gojoo nɛ a wo nɔ kɛ si Mawu nile ɔ hɛ mi plɛe kɛ ngɛ si bue, nɛ wa ngɛ susumi fɛɛ susumi hu nyɔguɛ ngɔe konɛ wa ha nɛ e bu Kristo ɔ tue;
6 nɛ wa dlaa wa he kaa ke nyɛ nitsɛmɛ nyɛ tue bumi ɔ ná nɛ e pi si pɛ ɔ, wa maa gbla tue gbomi fɛɛ tue gbomi tue.
7 Nyɛ hyɛɔ níhi bɔ nɛ a ngɛ ha ngɛ kpo nɔ blɔ. Ke nɔ ko ngɛ nɔ mi mami ngɛ lɛ nitsɛ e mi kaa Kristo nɔ́ ji lɛ ɔ, nyɛ ha nɛ e susu anɔkuale munyu nɛ ɔ he ekohu: Kaa bɔ nɛ Kristo nɔ́ ji lɛ ɔ, jã kɛ̃ nɛ e ji ngɛ wɔ hu wa blɔ fa mi.
8 Ejakaa ke e sa kaa ma fĩa kɛ be nɔ bɔɔ ngɛ he blɔ nɛ Nyɔmtsɛ ɔ ha wɔ kaa waa fia nyɛ kɛ ma si nɛ wa ko ku nyɛ kɛ pue si ɔ he po ɔ, zo be mi gbee.
9 Ejakaa i sume nɛ e pee kaa nɔ́ nɛ i ngɛ mɔde bɔe kaa ma ngɔ ye sɛ womi ɔmɛ kɛ wo nyɛ he gbeye.
10 Ejakaa a deɔ ke: “E sɛ womi ɔmɛ a mi jiɔ, nɛ he wami ngɛ mi, se ke lɛ nɔmlɔ ɔ nitsɛ e ngɛ hiɛ ɔ, e he jɔ, nɛ e munyu ɔmɛ hu a be hanɔ.”
11 Nyɛ ha nɛ jamɛ a nɔmlɔ ɔ nɛ e le kaa níhi nɛ wa deɔ* kɛ guɔ sɛ womihi a nɔ ke wa be ɔ, jamɛ a ní ɔmɛ nɔuu nɛ ke wa ba a wa maa pee.*
12 Ejakaa wa bɔɛ mɔde kaa wa maa piɛɛ ni komɛ nɛ a jeɔ mɛ nitsɛmɛ a yi ɔ he aloo waa kɛ wa he maa to a he. Se ke a ngɔ mɛ nitsɛmɛ a he kɛ susu mɛ nitsɛmɛ a he nɛ a ngɔ mɛ nitsɛmɛ a he kɛ to mɛ nitsɛmɛ a he ɔ, lɛɛ a be nɔ́ sisi numi.
13 Se wa be fĩae ngɛ huzuhi nɛ a po kɛ ha wɔ ɔ se, mohu ɔ, ngɛ zugba kpɔ ɔ nɛ Mawu susu kɛ ha wɔ* ɔ mi, nɛ e bli mi kɛ ba su nyɛ ngɔ tɔɔ po.
14 Ngɛ anɔkuale mi ɔ, wa kpã we wa mi tsɔ kaa nɔ́ nɛ wa sui nyɛ he, ejakaa wɔ ji kekleekle nihi nɛ wa ngɔ sane kpakpa a nɛ kɔɔ Kristo he ɔ kɛ ba su nyɛ ngɔ tɔɔ.
15 Ohoo, wa fĩɛ ngɛ nɔ kpa ko ní tsumihi a he ngɛ huzuhi nɛ a po ha wɔ ɔ se, mohu ɔ, wa ngɛ hɛ kɛ nɔ fɔmi kaa be mi nɛ nyɛ hemi kɛ yemi ɔ ya nɔ nɛ e mi ngɛ wae ɔ, a ma ha nɛ nɔ́ nɛ wa tsu ɔ maa hiɛ ngɛ wa zugba kpɔ ɔ mi. Kɛkɛ ɔ, wa maa be nɔ babauu pe kekle ɔ,
16 bɔ nɛ pee nɛ waa jaje sane kpakpa a kɛ ha mahi nɛ a ngɛ nyɛ se ɔ, konɛ wa ko fĩa ngɛ nɔ́ nɛ a tsu momo ngɛ nɔ kpa ko zugba kpɔ mi ɔ he.
17 “Se nɔ nɛ e fĩaa a, ha nɛ e fĩa ngɛ Yehowa* mi.”
18 Ejakaa pi nɔ nɛ e jeɔ lɛ nitsɛ e yi ɔ nɛ a bua jɔɔ e he, se mohu nɔ nɛ Yehowa* jeɔ e yi ɔ.
Sisi Ningmahi
^ Hela, “nihi nɛ wa ji ngɛ munyu tumi mi.”
^ Hela, “ni ɔmɛ nɛ nɔuu nɛ wa ji ngɛ ní peepeehi a mi.”
^ Aloo “nɛ Mawu po ha wɔ.”
^ Hyɛ Munyu Komɛ A Sisi Tsɔɔmi.
^ Hyɛ Munyu Komɛ A Sisi Tsɔɔmi.
