Womi Enyɔne Kɛ Ya Ha Korinto Bi Ɔmɛ 6:1-18
6 Be mi nɛ waa kɛ lɛ pee kake kɛ ngɛ ní tsue nɛ ɔ, wa ngɛ nyɛ he wami woe hu kaa ke nyɛ kplɛɛ Mawu dloomi ɔ nɔ ɔ, nyɛ ko ha nɛ yi mi tomi nɛ ngɛ he ɔ nɛ pee yaka.
2 Ejakaa e deɔ ke: “Ngɛ be nɛ sa mi ɔ, i bu mo tue, nɛ ngɛ yi wami hemi ligbi ko nɔ ɔ, i ye bua mo.” Hyɛ! Amlɔ nɛ ɔ ji be nɛ sa saminya a nɛ. Hyɛ! Amlɔ nɛ ɔ ji yi wami hemi ligbi ɔ nɛ.
3 Wa pee we nɔ́ ko ngɛ blɔ ko nɔ nɛ maa tɔ̃tɔ̃ nɔ ko nane, konɛ a ko na tɔmi ko ngɛ wa sɔmɔmi ɔ he;
4 se ngɛ blɔ fɛɛ blɔ nɔ ɔ, wa jeɔ wɔ nitsɛmɛ wa yi kaa Mawu sɔmɔli, kɛ gu si nɛ wa fĩɔ ngɛ níhi fuu a mi ɔ nɔ, ngɛ amanehluhi a mi, ngɛ fimi behi a mi, ngɛ haomihi a mi,
5 ngɛ kongomihi a mi, ngɛ tsu womihi a mi, ngɛ basabasa peemihi a mi, ngɛ ní tsumi wawɛɛ mi, ngɛ nyɔ fɔmihi a mi, ngɛ hwɔ hamihi a mi;
6 ngɛ he tsɔmi mi, ngɛ nile mi, ngɛ tsui si tomi mi, ngɛ mi mi jɔmi mi, ngɛ mumi klɔuklɔu mi, ngɛ suɔmi nɛ osato be mi ɔ mi,
7 ngɛ anɔkuale munyu tumi mi, ngɛ Mawu he wami mi; kɛ gu dami ta hwumi níhi ngɛ hiɔ nine* mi kɛ muɔ nɔ* ɔ nɔ,
8 kɛ gu hɛ mi nyami kɛ hɛ mi si puemi nɔ, kɛ gu amaniɛ bɔmi yayami kɛ amaniɛ bɔmi kpakpa nɔ. A buɔ wɔ kaa nihi nɛ a sisiɔ nɔ, se kɛ̃ ɔ, anɔkualetsɛmɛ ji wɔ,
9 kaa nihi nɛ a li mɛ, se kɛ̃ ɔ, a le wa mi tso, kaa nihi nɛ a ngɛ gboe,* se kɛ̃ ɔ, hyɛ! wa ngɛ wami mi, kaa nihi nɛ a gbla a tue,* se kɛ̃ ɔ, a ngɔɛ wɔ kɛ wui gbenɔ dɛ mi,
10 kaa nihi nɛ a ngɛ kɔmɔ yee, se kɛ̃ ɔ, wa nyaa daa, kaa ohiatsɛmɛ, se kɛ̃ ɔ, wa ha nɛ nihi babauu ngɛ niatsɛmɛ pee, kaa nihi nɛ a be nɔ́ ko, se kɛ̃ ɔ, wa ngɛ níhi tsuo.
11 Korinto bi, wa pa wa nya mi konɛ waa tu munyu kɛ tsɔɔ nyɛ,* nɛ wa bli wa tsui mi gbajaa.
12 Wa nga we wa tsui nya* ngɛ nyɛ sane nɛ wa suɔ ɔ he je, se nyɛɛ lɛɛ nyɛ nga nyɛ tsui nya ngɛ wa sane nɛ nyɛ maa suɔ ɔ he.
13 Enɛ ɔ he ɔ, nɔ́ nɛ i ngɛ dee ji kaa—i kɛ nyɛ ngɛ munyu tue kaa ye bimɛ—nyɛ hu nyɛ bli nyɛ tsui mi gbajaa.*
14 Nihi nɛ a he we yi ɔ kɛ nyɛ sɔɛ, nyɛɛ kɛ mɛ nɛ ko tloo kuɛpã tso.* Ejakaa mɛni huɛ bɔmi lɛ ngɛ dami kɛ mlaa nɔ tɔmi a kpɛti? Aloo mɛni ní dlami lɛ ngɛ la kɛ diblii a kpɛti?
15 Jehanɛ se hu ɔ, mɛni kake peemi lɛ ngɛ Kristo kɛ Belia* a kpɛti? Aloo mɛni lɛ nɔ nɛ e he ye ɔ* kɛ nɔ nɛ e he we yi ɔ ngɛ peemi?*
16 Nɛ mɛni gbi kpami lɛ ngɛ Mawu sɔlemi we ɔ kɛ wɔhi a kpɛti? Ejakaa wa ji Mawu hɛ kalɔ ɔ sɔlemi we; kaa bɔ nɛ Mawu de ɔ: “Ma hi a kpɛti nɛ ma nyɛɛ ngɛ a kpɛti, nɛ ma pee a Mawu, nɛ a maa pee ye we bi.”
17 “Yehowa* ke, ‘Enɛ ɔ he ɔ, nyɛɛ je kpo kɛ je a kpɛti nɛ nyɛ tsɔ nyɛ he banee, nɛ nyɛ kpa nɔ́ nɛ he tsɔ we ɔ he tami’”; “‘nɛ ma he nyɛ atuu.’”
18 “Yehowa* Ope ɔ ke, ‘Nɛ ma ba pee nyɛ tsɛ, nɛ nyɛ ma ba pee ye binyumuhi kɛ ye biyihi.’”
Sisi Ningmahi
^ Eko ɔ, kɛ ha nɔ tuami.
^ Eko ɔ, kɛ ha he piɛ pomi.
^ Aloo “nihi nɛ a bu mɛ kaa a sa gbenɔ.”
^ Aloo “tsɔse mɛ.”
^ Aloo “nɛ wa tu munyu kɛ tsɔɔ nyɛ ngɛ ma hɛ mi.”
^ Aloo “Pi kaa blɔ be wa tsui mi.”
^ Aloo “nyɛ hu nyɛ bli mi gbajaa.”
^ Aloo “tsa bo nya.”
^ A je kɛ je Hebri munyungu nɛ e sisi ji, “Yaka Nɔmlɔ” ɔ mi. E kɔɔ Satan he.
^ Aloo “anɔkualetsɛ.”
^ Aloo “mɛni ní dlami lɛ ngɛ nɔ nɛ e he ye kɛ nɔ nɛ e he we yi ɔ a kpɛti?”
^ Hyɛ Munyu Komɛ A Sisi Tsɔɔmi.
^ Hyɛ Munyu Komɛ A Sisi Tsɔɔmi.
