2 Mose 12:1-51
12 Jehanɛ ɔ, Yehowa de Mose kɛ Aaron ngɛ Egipt zugba a nɔ ke:
2 “Nyɔhiɔ nɛ ɔ maa pee nyɔhiɔ ɔmɛ a sisije kɛ ha nyɛ. E maa pee kekleekle nyɔhiɔ ngɛ jeha a mi kɛ ha nyɛ.
3 Nyɛɛ tu munyu kɛ tsɔɔ Israel ma a tsuo, nɛ nyɛ de mɛ ke, ‘Ngɛ nyɔhiɔ nɛ ɔ we ligbi nyɔngmane ɔ nɔ ɔ, a ti nɔ fɛɛ nɔ nɛ e ngɔ jijɔ kake kɛ ha e tsɛ we ɔ, we fɛɛ we nɛ e ná jijɔ kake.
4 Se ke we ɔ mi bimɛ ɔmɛ a he pi nɛ a ma nyɛ maa ye jijɔ mluku ɔ, lɛɛ a kɛ wetsɛ nɛ e we ɔ tsa a nɔ́ ɔ nɔ ɔ* nɛ gba jijɔ ɔ ngɛ a we ɔ mi ngɛ ni ɔmɛ* a hiɛmi nya. Á hyɛ a yibɔ, nɛ á hyɛ lo abɔ nɛ a ti nɔ fɛɛ nɔ ma nyɛ maa ye.
5 Nyɛɛ ngɔ jijɔ ku nɛ kpa ko be e he, nɛ e ye jeha kake. Nyɛ ma nyɛ maa ngɔ agbosu wawi ɔmɛ aloo apletsi ɔmɛ eko.
6 Nyɛɛ hyɛ e nɔ kɛ ya si nyɔhiɔ nɛ ɔ we ligbi 14 ɔ nɔ, nɛ weku fɛɛ weku ngɛ Israel ɔ nɛ́ a gbe jijɔ ɔ ke du ngɛ bue.*
7 Á ngɔ muɔ ɔ eko kɛ kpa wehi nɛ a maa ye lo ɔ ngɛ a mi ɔ a sinya tso enyɔ ɔmɛ kɛ a yiti tso ɔmɛ a he.
8 “‘Á ye lo ɔ ngɛ jamɛ a nyɔ ɔ mi. E sa nɛ a sã ngɛ la nɔ, nɛ a ngɔ abolo nɛ masa be mi, kɛ ba nɛ dooɔ kɛ ye.
9 Nyɛ ko ye lo ɔ eko mumu aloo nɔ́ nɛ a kɛ nyu hoo, se nyɛɛ sã lo ɔ ngɛ la nɔ. Nyɛɛ sã e yi ɔ, kɛ e nane ɔmɛ, kɛ e mi ní ɔmɛ tsuo.
10 Nyɛ ko si eko nɛ je nɛ na yi, se ke je na eko yi ɔ, nyɛɛ ngɔ la kɛ sã.
11 Nɛ bɔ nɛ e sa nɛ nyɛɛ ye lo ɔ ha ji nɛ ɔ nɛ, nyɛɛ ye be mi nɛ nyɛ fĩ nyɛ mlɛ mi,* nɛ́ tokota ngɛ nyɛ nane, nɛ́ dɛma tso ngɛ nyɛ dɛ mi; nyɛɛ ye lo ɔ mlamlaamla. E ji Hetsɔmi nɛ a maa ye ha Yehowa.
12 Ejakaa ma be ngɛ Egipt zugba a nɔ jamɛ a nyɔ ɔ mi, nɛ ma fia kekleekle bi fɛɛ kekleekle bi nɛ e ngɛ Egipt zugba a nɔ ɔ nɔ́, kɛ je nɔmlɔ nɔ kɛ ya si lohwe nɔ; nɛ ma kojo Egipt mawu ɔmɛ tsuo. Imi ji Yehowa.
13 Muɔ ɔ maa pee nyɛ we okadi ngɛ wehi nɛ nyɛ ngɛ a mi ɔ a he; nɛ ma na muɔ ɔ, nɛ ma tsɔ nyɛ he kɛ be, nɛ haomi ɔ be nyɛ nɔ bae nɛ e ba kpata nyɛ hɛ mi benɛ ma fia Egipt zugba a nɔ ɔ.
14 “‘Ligbi nɛ ɔ maa pee kaimi ligbi kɛ ha nyɛ. Nyɛɛ ye lɛ kaa gbijlɔ kɛ ha Yehowa ngɛ nyɛ yi nɔhi tsuo. Nyɛɛ ye gbijlɔ nɛ ɔ, nɛ e maa pee mlaa kɛ ya neneene.
15 Nyɛɛ ye abolo nɛ masa be mi ligbi kpaago. Ngɛ kekleekle ligbi ɔ nɔ ɔ, nyɛ je masa a kɛ je nyɛ we ɔmɛ a mi, ejakaa kɛ je kekleekle ligbi ɔ nɔ kɛ ya si ligbi kpaagone ɔ nɔ ɔ, nɔ fɛɛ nɔ nɛ e maa ye nɔ́ ko nɛ masa ngɛ mi ɔ, á gbe* jamɛ a nɔ ɔ.*
16 Ngɛ kekleekle ligbi ɔ nɔ ɔ, nyɛ maa pee kpe klɔuklɔu, nɛ ngɛ ligbi kpaagone ɔ nɔ ɔ, nyɛɛ pee kpe klɔuklɔu ekohu. Nyɛ ko tsu ní tsumi ko ngɛ ligbi nɛ ɔmɛ a nɔ. Nɔ́ nɛ nɔ fɛɛ nɔ* maa ye pɛ nɛ nyɛ ma nyɛ maa hoo.
17 “‘E sa nɛ nyɛɛ ye Abolo Nɛ Masa Be Mi Gbijlɔ ɔ, ejakaa ligbi nɛ ɔ nɔ tutuutu nɛ ma je nyɛ ma kpekpemi ɔ* kɛ je Egipt zugba a nɔ ɔ nɛ. Nyɛɛ ye ligbi nɛ ɔ kaa gbijlɔ ngɛ nyɛ yi nɔhi tsuo, nɛ e maa pee mlaa nɛ ngɛ kɛ yaa neneene.
18 Ngɛ kekleekle nyɔhiɔ ɔ mi ɔ, ngɛ nyɔhiɔ ɔ we ligbi 14 ɔ we gbɔkuɛ ɔ, nyɛɛ ye abolo nɛ masa be mi kɛ ya si nyɔhiɔ ɔ we ligbi 21 ɔ we gbɔkuɛ.
19 Á ko na masa ngɛ nyɛ we ɔmɛ a mi ligbi kpaago, ejakaa ke nɔ ko ye nɔ́ ko nɛ masa ngɛ mi ɔ, nubwɔ ji lɛ jio, Israel no ji lɛ jio, á gbe* jamɛ a nɔ ɔ.*
20 Nyɛ ko ye nɔ́ ko nɛ masa ngɛ mi. Nyɛɛ ye abolo nɛ masa be mi ngɛ nyɛ we ɔmɛ tsuo a mi.’”
21 Amlɔ nɔuu nɛ Mose tsɛ Israel nikɔtɔma amɛ nɛ e de mɛ ke: “Nyɛɛ ya nɛ nyɛ ya hla lohwehi* kɛ ha nyɛ weku ɔmɛ, nɛ nyɛɛ gbe mɛ kɛ ha Hetsɔmi ɔ.
22 Lɔ ɔ se ɔ, nyɛɛ ngɔ hisopo* tsohi nɛ a fĩ kɛ bla kɛ sɔ muɔ nɛ ngɛ tsesi mi ɔ mi, nɛ nyɛɛ ngɔ muɔ ɔ kɛ kpa sinya a yiti tso ɔ kɛ sinya tso enyɔ ɔmɛ a he; nyɛ ti nɔ ko nɛ e kó je kpo kɛ je e we ɔ mi kɛ ya si mɔtu.
23 Kɛkɛ ɔ, ke Yehowa be ngɛ Egipt bi ɔmɛ a kpɛti konɛ e hao mɛ, nɛ e na muɔ ɔ ngɛ sinya a yiti tso ɔ kɛ sinya tso enyɔ ɔmɛ a he ɔ, bɔ fɛɛ bɔ nɛ ji ɔ, Yehowa maa tsɔ sinya a he kɛ be, nɛ e be blɔ ngmɛe nɛ haomi nɛ kɛ gbenɔ baa a* nɛ sɛ nyɛ we ɔmɛ a mi.
24 “Nyɛɛ ye gbijlɔ nɛ ɔ, ejakaa e ji blɔ tsɔɔmi nɛ maa hi si kɛ ha nyɛɛ kɛ nyɛ bimɛ kɛ ya neneene.
25 Ke nyɛ ya su zugba a nɛ Yehowa maa ngɔ kɛ ha nyɛ kaa bɔ nɛ e de nyɛ ɔ nɔ ɔ, nyɛɛ ye gbijlɔ nɛ ɔ.
26 Nɛ ke nyɛ bimɛ ɔmɛ bi nyɛ ke, ‘Mɛni he je nɛ nyɛ yeɔ gbijlɔ nɛ ɔ?’
27 nyɛ de mɛ ke, ‘E ji Hetsɔmi ɔ he afɔle nɛ a sãã ha Yehowa, nɔ nɛ e tsɔ Israel bi ɔmɛ a we ɔmɛ a he kɛ be ngɛ Egipt benɛ e hao Egipt bi ɔmɛ, nɛ́ e si wa we ɔmɛ ɔ.’”
Kɛkɛ nɛ ni ɔmɛ kplã si nɛ a ngɔ a hɛ mi kɛ bu si.
28 Lɔ ɔ he ɔ, Israel bi ɔmɛ ya nɛ a ya pee kaa bɔ nɛ Yehowa fã Mose kɛ Aaron ɔ pɛpɛɛpɛ. A pee jã a pɛ.
29 Kɛkɛ nɛ nyɔ mi kpɛti ɔ, Yehowa gbe kekleekle bimɛ tsuo nɛ a ngɛ Egipt zugba a nɔ ɔ, kɛ je Farao nɛ e hii si ngɛ e matsɛ sɛ ɔ nɔ ɔ kekleekle bi nɔ kɛ ya si nyɔguɛ nɛ a wo lɛ tsu* ɔ kekleekle bi nɔ, kɛ lohwehi a kekleekle bimɛ tsuo a nɔ.
30 Farao kɛ e sɔmɔli ɔmɛ tsuo kɛ Egipt bi kpa amɛ tsuo te si jamɛ a nyɔ ɔ mi, nɛ Egipt bi ɔmɛ fo ya boboobo, ejakaa we ko be nɛ nɔ ko gbo we ngɛ mi.
31 Nɛ nyɔ ɔ mi nɔuu ɔ, e tsɛ Mose kɛ Aaron nɛ e de mɛ ke: “Nyɛɛ te si nɛ nyɛɛ je ye we bi ɔmɛ a kpɛti, nyɛɛ kɛ Israel bi kpa amɛ tsuo. Nyɛɛ ho nɛ nyɛ ya sɔmɔ Yehowa kaa bɔ nɛ nyɛ de ɔ.
32 Nyɛɛ ngɔ nyɛ to ɔmɛ kɛ nyɛ na amɛ hu kɛ ho kaa bɔ nɛ nyɛ de ɔ. Se nyɛɛ sɔle nɛ imi hu Mawu nɛ jɔɔ mi.”
33 Kɛkɛ nɛ Egipt bi ɔmɛ bɔni Israel bi ɔmɛ pɛɛ kpami kaa a je a zugba a nɔ esɔesɔ, nɛ a de ke, “ke pi jã a, lɛɛ wɔ tsuo wa ma gbo!”
34 Lɔ ɔ he ɔ, Israel bi ɔmɛ ngɔ a mamu nɛ́ a pɔtɔ nɛ́ e gbo we lolo ɔ, kɛ tsesihi nɛ́ a pɔtɔɔ mamu ngɛ a mi ɔ, nɛ a fĩ kɛ wo a bohi a mi, nɛ a kɛ fɔ a konɔ.
35 Israel bi ɔmɛ pee nɔ́ nɛ Mose de mɛ ɔ, nɛ a bi Egipt bi ɔmɛ sika hiɔ kɛ sika tsu níhi kɛ bohi* hulɔ.
36 Yehowa ha nɛ ni ɔmɛ a hɛ mi ba nyami ngɛ Egipt bi ɔmɛ a hɛ mi, lɔ ɔ he ɔ, a ha mɛ níhi nɛ a bi ɔ, nɛ a kpakpaa Egipt bi ɔmɛ a he níhi.
37 Kɛkɛ nɛ Israel bi ɔmɛ hia kɛ je Rameses kɛ yaa Sukot, nyumuhi maa pee 600,000 nɛ a ngɛ nyɛɛe, a kane we jokuɛwi kɛ piɛɛ he.
38 Nɛ futufututsɛmɛ babauu* hu piɛɛ a he kɛ ho. A kɛ a tohi kɛ a nahi hu ho; a kɛ lohwehi babauu nitsɛ ho.
39 A ngɔ ma a nɛ a kɛ je Egipt kɛ ba a kɛ sã abolo lokotolokoto nɛ masa be mi. Ma a gbo we, ejakaa a fiee mɛ kpatakpata kɛ je Egipt, nɛ lɔ ɔ he ɔ, a to we niye ní ko kulaa he blɔ nya nɛ a maa ye.
40 Be abɔ nɛ Israel bi ɔmɛ, nihi nɛ a ya hi Egipt ɔ kɛ hi si kaa nibwɔhi ɔ peeɔ jeha 430.
41 Ngɛ jeha 430 ɔ nyagbe, ngɛ jamɛ a ligbi ɔ nɔ tutuutu ɔ, Yehowa ma kpekpemi ɔ* tsuo je Egipt zugba a nɔ.
42 Jamɛ a nyɔ ɔ ji nyɔ nɛ a maa ye kaa gbijlɔ kɛ kai jemi nɛ Yehowa je mɛ kɛ je Egipt zugba a nɔ ɔ. E sa nɛ Israel bi ɔmɛ tsuo nɛ a kai jamɛ a nyɔ ɔ kaa gbijlɔ kɛ ha Yehowa, a yi nɔhi tsuo.
43 Kɛkɛ nɛ Yehowa de Mose kɛ Aaron ke, “Hetsɔmi ɔ he mlaa ji nɛ ɔ nɛ: Nubwɔ ko kó ye Hetsɔmi niye ní ɔ eko.
44 Se ke nɔ ko ngɛ nyɔguɛ nɛ e ngɔ sika kɛ he lɛ ɔ, e sa nɛ e po lɛ. Lɔ ɔ se loko e ma nyɛ maa ye eko.
45 Nɔ ko nɛ e ba to nyɛ, kɛ nɔ ko nɛ nyɛ bɔ lɛ apaa ko ye niye ní ɔ eko.
46 Nihi tsuo nɛ a maa ye jijɔ bi ɔ nɛ́ a bla kɛ ye ngɛ we kake mi. Nyɛ ko ngɔ lo ɔ eko kɛ je kpo kɛ ya we ɔ se, nɛ nyɛ ko ku e wu ɔmɛ eko mi.
47 Israel ma a tsuo nɛ a ye Hetsɔmi ɔ.
48 Ke nubwɔ ko kɛ nyɛ ngɛ nɛ e suɔ kaa e maa ye Hetsɔmi ɔ kɛ ha Yehowa a, e sa nɛ e po nyumu fɛɛ nyumu nɛ e ngɛ e we ɔ mi ɔ. Kɛkɛ ɔ, e ma nyɛ maa ye Hetsɔmi ɔ, nɛ e ma ba pee kaa Israel no. Se nyumu nɛ a pui lɛ ko ye niye ní ɔ eko.
49 Israel no, kɛ nubwɔ nɛ e ngɛ nyɛ kpɛti ɔ tsuo ɔ, mlaa kake lɛ maa fɔ si ha mɛ.”
50 Lɔ ɔ he ɔ, Israel bi ɔmɛ tsuo pee kaa bɔ nɛ Yehowa fã Mose kɛ Aaron ɔ pɛpɛɛpɛ. A pee jã a pɛ.
51 Jamɛ a ligbi ɔ nɔ tutuutu nɛ Yehowa ngɔ Israel ma kpekpemi ɔ* tsuo kɛ je Egipt zugba a nɔ ɔ nɛ.
Sisi Ningmahi
^ Ngɛ Hebri gbi mi ɔ, “e kɛ wetsɛ ɔ nɛ e we ɔ tsa e nɔ́ ɔ nɔ ɔ.”
^ Aloo “klaa amɛ.”
^ Ngɛ Hebri gbi mi ɔ, “ngɛ gbɔkuɛ enyɔ ɔmɛ a kpɛti.”
^ Ngɛ Hebri gbi mi ɔ, “be mi nɛ nyɛ fĩ nyɛ ngmɔngmɔ ɔmɛ.”
^ Ngɛ Hebri gbi mi ɔ, “á po jamɛ a nɔ ɔ kɛ je Israel.”
^ Aloo “klaa a.”
^ Aloo “klaa fɛɛ klaa.”
^ Ngɛ Hebri gbi mi ɔ, “tabo ɔmɛ.”
^ Ngɛ Hebri gbi mi ɔ, “á po jamɛ a nɔ ɔ kɛ je Israel bi ɔmɛ a kpɛti.”
^ Aloo “klaa a.”
^ Nɛ ji, jijɔ bi aloo apletsi bi.
^ Hyɛ Munyu Komɛ A Sisi Tsɔɔmi.
^ Ngɛ Hebri gbi mi ɔ, “hɛ mi kpatami.”
^ Ngɛ Hebri gbi mi ɔ, “nɛ́ e ngɛ nyu tomi muɔ we mi.”
^ Aloo “tadehi.”
^ Nɛ ji, nihi nɛ a pi Israel bi, nɛ́ Egipt bi hu piɛɛ he.
^ Ngɛ Hebri gbi mi ɔ, “tabo ɔmɛ.”
^ Ngɛ Hebri gbi mi ɔ, “tabo ɔmɛ.”
