2 Mose 15:1-27
15 Jamɛ a be ɔ mi ɔ, Mose kɛ Israel bi ɔmɛ la la nɛ ɔ kɛ ha Yehowa:
“Ma la kɛ ha Yehowa, ejakaa e hɛ mi ba nyami wawɛɛ.
E tsɛ̃ okpɔngɔ kɛ e nɔ hilɔ ɔ kɛ wo wo ɔ mi.
2 Ye he wami kɛ ye nyɛ́mi ji Yah,* akɛnɛ e ji ye yi wami helɔ ɔ he je.
Ye Mawu ji nɛ ɔ nɛ, nɛ ma je e yi; lɛ ji ye tsɛ ɔ Mawu, nɛ ma wo e hɛ mi nyami.
3 Yehowa ji tatsɛ nɛ e he wa. E biɛ ji Yehowa.
4 E tsɛ̃ Farao ta zugba lɛ ɔmɛ kɛ e tabo ɔ ngɔ wo wo ɔ mi,Nɛ e ta buli kpanaa amɛ gbo tlɔ Wo Tsu ɔ mi.
5 Nyu nɛ pee hamahama a ha a nɔ; a mu kɛ ho nyu ɔ sisi ya kaa tɛ.
6 Oo Yehowa, o hiɔ nine ɔ ngɛ he wami wawɛɛ;Oo Yehowa, o hiɔ nine ɔ ma nyɛ ma kpata he nyɛlɔ hɛ mi.
7 O kɛ o we agboje ɔ tsɛ̃ɛ̃ ni nɛmɛ nɛ a teɔ si kɛ woɔ mo ɔ ngɔ pueɔ si;O mi mi fumi nɛ nya wa a ngɛ kaa la, nɛ e sãã mɛ kaa nga gbigbli.
8 Kɔɔhiɔ nɛ e je o gugwɔ mi ɔ ha nɛ nyu ɔ nya bua ngɛ he kake;Nyu ɔ da si dii, nɛ nyu kpekpemi ɔ kpale we e se;Nyu nɛ pee hamahama a wlua kpɛkpɛtɛɛ ngɛ wo ɔ kpɛti.
9 He nyɛlɔ ɔ de ke: ‘Ma fiee a se! Ma ya ná mɛ!
Ma dla ta yibu ní kɛ yaa si be nɛ ye tsui maa nɔ ye mi!*
Ma hia ye klaate ɔ! Ye nine maa ye a nɔ kunimi!’
10 O fli kɔɔhiɔ, nɛ wo ɔ ha a nɔ;A mu kaa sumui ngɛ nyu kpekpemi ɔ mi.
11 Oo Yehowa, mawu ɔmɛ a kpɛti mɛnɔ lɛ e ngɛ kaa mo?
Mɛnɔ ngɛ kaa mo, mo nɛ́ o ngɛ klɔuklɔu pe kulaa a?
O ji Mawu nɛ e sa kaa a ye mo gbeye nɛ a la yi jemi lahi kɛ ha mo, mo nɛ́ o peeɔ nyakpɛ ní ɔ.
12 O kpã o hiɔ nine mi, nɛ zugba a mii mɛ.
13 O nyɛɛ nihi nɛ o kpɔ̃ mɛ ɔmɛ a hɛ mi ngɛ o suɔmi nɛ se pui ɔ nya;O maa tsɔɔ mɛ blɔ kɛ ya o hi he klɔuklɔu ɔ ngɛ o he wami ɔ nya.
14 Nihi maa nu, nɛ a he ma kpokpo;Filisti bi ɔmɛ maa na nɔ́ wawɛɛ.*
15 Jamɛ a be ɔ mi ɔ, Edom sheik* ɔmɛ a tsui maa po,Nɛ Moab nɔ yeli ɔmɛ nɛ a he wa a, a he maa do blibliibli.
Kanaan bi ɔmɛ tsuo a tsui maa ku.
16 Gbeye kɛ sawale maa nu mɛ.
O kɔni ngua a he je ɔ, a be a he mimiɛɛe kaa bɔ nɛ tɛ mimiɛɛ we e he ɔKɛ yaa si be nɛ o we bi ɔmɛ maa be, Oo Yehowa,Kɛ yaa si be nɛ nihi nɛ o hla a maa be.
17 O maa ngɔ mɛ kɛ ba nɛ o ma ba to mɛ si* ngɛ yoku nɛ ji o weto ní ɔ nɔ,He ko nɛ mo Yehowa, o to sisi nɛ o dla kɛ ha o he kaa o maa hi ɔ,Jami he nɛ mo Yehowa, o nine ɔmɛ to sisi ɔ.
18 Yehowa maa ye matsɛ kɛ ya neneene kɛ neneene.
19 Benɛ Farao we okpɔngɔ ɔmɛ kɛ e ta zugba lɛ ɔmɛ kɛ e we okpɔngɔ nɔ hili ɔmɛ sɛ wo ɔ mi ɔ,Yehowa ha nɛ nyu ɔ kpale e se kɛ ba ha a nɔ,Se Israel bi ɔmɛ lɛɛ a nyɛɛ zugba gbigbli nɔ kɛ be ngɛ wo ɔ kpɛti.”
20 Kɛkɛ nɛ gbalɔyo Miriam, nɛ ji Aaron nyɛmiyo ɔ wo akasawa, nɛ yi ɔmɛ tsuo wo akasawahi nɛ a fia, nɛ a do kɛ nyɛɛ e se.
21 Miriam he nyumu ɔmɛ a la a nɔ ke:
“La kɛ ha Yehowa, ejakaa e hɛ mi ba nyami wawɛɛ.
E tsɛ̃ okpɔngɔ kɛ e nɔ hilɔ ɔ kɛ wo wo ɔ mi.”
22 Pee se ɔ, Mose nyɛɛ Israel bi ɔmɛ a hɛ mi kɛ je Wo Tsu ɔ he, nɛ a je kɛ ho Shur nga a nɔ ya, a nyɛɛ ligbi etɛ ngɛ nga a nɔ, se a nɛ́ nyu.
23 A ba su Mara,* se a nyɛ we nɛ a nu nyu nɛ ngɛ Mara a, ejakaa nyu ɔ dooɔ. Lɔ ɔ he je nɛ e wo nyu ɔ biɛ ke Mara a nɛ.
24 Lɔ ɔ he ɔ, ni ɔmɛ tu munyu huitihuiti kɛ si Mose ke: “Mɛni wa maa nu?”
25 Mose kpa ngmlaa kɛ tsɛ Yehowa, nɛ Yehowa tsɔɔ lɛ blɔ kɛ ya tso ko he. Benɛ e sake tso ɔ kɛ fɔ nyu ɔ mi ɔ, nyu ɔ ba ngɔ.
Mawu ngɔ blɔ tsɔɔmi kɛ nɔ́ nɛ e maa da nɔ kɛ kojo mɛ ɔ kɛ ha mɛ ngɛ lejɛ ɔ, nɛ Mawu ka mɛ ngɛ lejɛ ɔ.
26 E de mɛ ke: “Ke nyɛ maa bu Yehowa nyɛ Mawu ɔ gbi tue sisiisi, nɛ nyɛ maa pee nɔ́ nɛ da ngɛ e hɛ mi, nɛ nyɛ maa ye e kita amɛ a nɔ, nɛ nyɛɛ kɛ e blɔ tsɔɔmi ɔmɛ tsuo ma tsu ní ɔ, lɛɛ i be hiɔhi nɛ i kɛ ba Egipt bi ɔmɛ a nɔ ɔ eko ngɔe kɛ ba nyɛ nɔ, ejakaa imi Yehowa lɛ i ngɛ nyɛ tsae.”
27 Lɔ ɔ se ɔ, a ba su Elim, he nɛ nyu hɛngmɛ 12 kɛ tã 70 ɔmɛ ngɛ ɔ. Lɔ ɔ he ɔ, a to si ngɛ lejɛ ɔ ngɛ nyu ɔ he.
Sisi Ningmahi
^ “Yah” ji biɛ Yehowa a kpiti pomi.
^ Aloo “ye klaa maa tɔ.”
^ Ngɛ Hebri gbi mi ɔ, “Nihi nɛ a ngɛ Filisti ɔ maa nu kɔɔmi.”
^ Sheik ji biɛ nɛ a kɛ tsɛɛ wɛtso nyatsɛ.
^ Ngɛ Hebri gbi mi ɔ, “du mɛ.”
^ E sisi ji “Doomi.”
