2 Mose 22:1-31
22 “Ke nɔ ko ya ju na loo jijɔ nɛ e gbe loo e jua a, é ngɔ na enuɔ kɛ to na kake ɔ nane mi, nɛ́ e ngɔ jijɔ eywiɛ kɛ to jijɔ kake ɔ nane mi.
2 (“Ke a na julɔ ko nɛ e ngɛ nɔ ko sinya ywiae nɛ́ e sɛ mi, nɛ a fia lɛ nɔ́ nɛ e gbo ɔ, nɔ ko yi e muɔ he fɔ.
3 Se ke pu je loko nɔ́ nɛ ɔ ya nɔ ɔ, lɛɛ a ye e muɔ he fɔ.)
“Julɔ ɔ nɛ e to nane mi. Ke e be nɔ́ ko ɔ, lɛɛ a jua lɛ kɛ wo níhi nɛ e ju ɔ he hiɔ.
4 Ke a na lohwe nɛ e ju ɔ ngɛ e dɛ, nɛ lohwe ɔ ngɛ wami mi ɔ, na jio, teji jio, jijɔ jio, e to nane mi kɛ bɔ he enyɔ.
5 “Ke nɔ ko je e lohwehi kpo konɛ a ya ye ní ngɛ nga a nɔ aloo wai ngmɔ mi, nɛ e ngmɛɛ a he nɛ a ya ye ní ngɛ nɔ kpa ngmɔ mi ɔ, e ngɔ lɛ nitsɛ e ngmɔ nɛ hi pe kulaa aloo e wai ngmɔ nɛ hi pe kulaa kɛ to nane mi.
6 “Ke nɔ ko tsɔ la nɛ la a ya sã mio tsohi, nɛ e sã ngma* nɛ a fĩ yi tlomi nya aloo ngma nɛ a poo we lolo, loo ngmɔ ko ɔ, nɔ nɛ e tsɔ la a nɛ e to níhi nɛ sã a nane mi.
7 “Ke nɔ ko ha e nyɛmi sika loo níhi ke e kɛ to ha lɛ, nɛ a ju ní ɔmɛ ngɛ e nyɛmi ɔ we ɔ mi ɔ, ke a na julɔ ɔ, julɔ ɔ nɛ to nane mi kɛ bɔ he enyɔ.
8 Ke a nɛ julɔ ɔ, a ngɔ wetsɛ ɔ kɛ ba anɔkuale Mawu ɔ hɛ mi, konɛ a hyɛ kaa lɛ nɛ e ju e nyɛmi ɔ ní ɔmɛ lo.*
9 Be fɛɛ be nɛ nɔ ko maa po nɔ kpa nya kaa e na nɔ́ ko ngɛ e dɛ nɛ pi e nɔ́, na jio, teji jio, jijɔ jio, tade jio, nɔ́ fɛɛ nɔ́ nɛ maa laa a, ni enyɔ ɔmɛ tsuo nɛ a ngɔ sane ɔ kɛ ya anɔkuale Mawu ɔ hɛ mi. Nɔ nɛ Mawu ma de ke e ye fɔ ɔ nɛ́ e to e nyɛmi ɔ nane mi kɛ bɔ he enyɔ.
10 “Ke nɔ ko ngɔ e teji, loo na, loo jijɔ, loo we mi lohwe kpa ko kɛ ya ha e nyɛmi konɛ e hyɛ nɔ ha lɛ, nɛ lohwe ɔ gbo, loo e plaa, loo a kpaka lɛ kɛ je be mi nɛ nɔ ko nɛ ɔ,
11 nɔ nɛ a ngɔ ní ɔmɛ kɛ ha a nɛ e kã Yehowa kita ngɛ nɔtsɛ ɔ hɛ mi kaa e nine tɛ e nyɛmi ɔ ní ɔmɛ a he, nɛ́ nɔtsɛ ɔ nɛ e kplɛɛ nɔ. Nɔ nɛ a kɛ ní ɔmɛ ha kaa e hyɛ nɔ ɔ nɛ ko to nane mi.
12 Se ke a ju lohwe ɔ ngɛ e dɛ ɔ, lɛɛ e to nɔtsɛ ɔ nane mi.
13 Ke lohwe awi yelɔ ko lɛ e tsɔtslɔɔ e mi ɔ, é ngɔ lohwe nɛ a tsɔtslɔɔ e mi ɔ kɛ ba kaa odase. É ko to lohwe nɛ lohwe awi yelɔ tsɔtslɔɔ e mi ɔ nane mi.
14 “Se ke nɔ ko ya ba lohwe ngɛ e nyɛmi dɛ, nɛ e plaa loo e gbo be mi nɛ nɔtsɛ ɔ be lejɛ ɔ, nɔ nɛ e ya ba lohwe ɔ nɛ e to nane mi.
15 Ke nɔtsɛ ɔ ngɛ lejɛ ɔ, lɛɛ e ko to nane mi. Ke e ya hai ɔ, lɛɛ sika nɛ e kɛ ya hai ɔ ji nɔ́ nɛ e kɛ to nane mi ɔ nɛ.
16 “Jehanɛ ɔ, ke nyumu ko mlɔɔ yomiyo ko nɛ a bi we e si lolo nɛ e kɛ lɛ hwɔ ɔ, e wo e he ní tsumi sika a nɛ e pee e yo.
17 Ke yo ɔ tsɛ ɔ kplɛɛ we kaa e kɛ lɛ ma ha nyumu ɔ po ɔ, e sa nɛ e wo yo he ní tsumi nya sika a.
18 “Koo ngmɛ yo kunya yelɔ blɔ nɛ e hi wami mi.
19 “Nɔ fɛɛ nɔ nɛ e kɛ lohwe maa hwɔ ɔ, bɔ fɛɛ bɔ nɛ ji ɔ, á gbe lɛ.
20 “Nɔ fɛɛ nɔ nɛ e maa sã afɔle ha mawu kpa ko ngɛ Yehowa se ɔ, á kpata e hɛ mi.
21 “Nyɛ ko pee nubwɔ basabasa, nɛ nyɛ ko wa lɛ yi mi hulɔ, ejakaa nyɛ hu nyɛ ya hi Egipt zugba a nɔ kaa nibwɔhi.
22 “Nyɛ ko wa yalɔyo* aloo awusa* yi mi.
23 Ke nyɛ wa lɛ yi mi nɛ e fo ya kɛ tsɛ mi ɔ, bɔ fɛɛ bɔ nɛ ji ɔ, ma bu e ya fomi ɔ tue;
24 nɛ ye mi mi maa wo la, nɛ ma ngɔ klaate kɛ gbe nyɛ, nɛ nyɛ yi ɔmɛ maa pee yalɔyihi,* nɛ nyɛ bimɛ ɔmɛ maa pee bimɛ nɛ a be tsɛmɛ.
25 “Ke o pa sika ha ohiatsɛ* ngɛ ye we bi ɔmɛ a kpɛti, nɛ ji nɔ ko nɛ e kɛ nyɛ ngɛ ɔ, koo pee o ní kaa sika palɔ.* Ko he lɛ hekpa.
26 “Ke o nyɛmi ba pa sika ngɛ o dɛ nɛ o ngɔ e bo kaa awaba tomi nɔ́* ɔ, o kpale kɛ ya ha lɛ loko pu nɛ nɔ si.
27 Ejakaa lɔ ɔ pɛ ji e he hami nɔ́, bo nɛ e kɛ maa ha e he; mɛni nɛ e maa ha kɛ hwɔ si? Ke e fo ya kɛ tsɛ mi ɔ, ma bu lɛ tue kokooko, ejakaa ye mi mi sãã mi ngɛ nɔ he.*
28 “Koo gbiɛ Mawu,* nɛ koo gbiɛ ganɔ* ko ngɛ o ma mi bi ɔmɛ a kpɛti.
29 “Koo to tsle kaa o maa ngɔ o ngmɔ ní babauu, kɛ o wai* nɛ hiɛ kɛ be nɔ ngɛ o wai ngami he* ɔ eko kɛ sã afɔle. Ngɔɔ o binyumu ɔmɛ a kpɛti tɛte ɔ kɛ ha mi.
30 Bɔ nɛ o pee o na kɛ o jijɔ a kekleekle bi ji nɛ ɔ nɛ: E hi e nyɛ kasa mi ligbi kpaago. Ngɛ ligbi kpaanyɔne ɔ nɔ ɔ, ngɔɔ lɛ kɛ ba ha mi.
31 “Nyɛɛ pee nyɛ he ni klɔuklɔuhi ha mi, nɛ nyɛ ko ye nga mi lohwe nɛ lohwe awi yelɔ ko tsɔtslɔɔ e mi ɔ lo. Nyɛ sake kɛ fɔ he ha gbe ɔmɛ.
Sisi Ningmahi
^ Ngma nɛ a ngɛ tsɔɔe ngɛ hiɛ ɔ ji hwiit, blɛfo kɛ a henɔ ɔmɛ.
^ Ngɛ Hebri gbi mi ɔ, “hyɛ ke ji e nine tɛ e nyɛmi ɔ ní ɔmɛ a he lo.”
^ Aloo “ahoyo.”
^ Aloo “bi nɛ e be tsɛ.”
^ Aloo “ahoyihi.”
^ Aloo “dɛgutsɛ.”
^ Aloo “kaa sika palɔ nɛ e heɔ hekpa.”
^ Aloo “si womi nɔ́.”
^ Aloo “i dlooɔ nɔ.”
^ Aloo “Koo gbe Mawu he guɛ.”
^ Aloo “nɔ yelɔ.”
^ Nɛ ji, wai kɛ nu.
^ Nɛ ji, wai ngami he kɛ nu ngami he.
