2 Mose 28:1-43
28 “Moo hla o nyɛminyumu Aaron kɛ e binyumu ɔmɛ ngɛ Israel bi ɔmɛ a kpɛti, nɛ́ Aaron nɛ sɔmɔ mi kaa osɔfo; Aaron kɛ e bimɛ nɛ ji Nadab, Abihu, Eleazar, kɛ Itamar.
2 Moo kpɛ tadehi nɛ a ngɛ klɔuklɔu ha o nyɛminyumu Aaron, konɛ e hɛ mi nɛ ba nyami nɛ e he nɛ hi fɛu.
3 O kɛ ni nɛmɛ nɛ a le nguɛ nya ní tsumi saminya a tsuo,* ni nɛmɛ nɛ i kɛ ye mumi nɛ haa nɔ juɛmi ɔ wo a mi ɔ nɛ tu munyu. Mɛ lɛ a maa kpɛ Aaron tadehi nɛ́ ma ha nɛ e pee klɔuklɔu ɔ ha lɛ, konɛ e sɔmɔ mi kaa osɔfo.
4 “Tadehi nɛ a maa kpɛ ɔ ji nɛ ɔmɛ nɛ: gugue nɔ hami nɔ́, efɔd, tade klɔii nɛ kɔni be he, tade tsɛkitsɛki klɔii, yi fimi nɔ́, kɛ mlɛ mi fimi nɔ́. Á kpɛ ní klɔuklɔu nɛ ɔmɛ kɛ ha o nyɛminyumu Aaron kɛ e binyumu ɔmɛ, konɛ Aaron nɛ sɔmɔ mi kaa osɔfo.
5 Nihi nɛ a le nguɛ nya ní tsumi saminya a nɛ́ a ngɔ sika tsu, kpã bluu, lohwe he bwɔmi nɛ hɛɛ alamua tu su,* bo tsutsu, kɛ klala kpakpa kɛ kpɛ tade ɔmɛ.
6 “Á ngɔ sika tsu, kpã bluu, lohwe he bwɔmi nɛ hɛɛ alamua tu su, bo tsutsu, kɛ klala kpakpa nɛ a lo kɛ pee efɔd ɔ, nɛ́ a lo níhi kɛ wo mi.
7 Á pee bo tsɔwi enyɔ kɛ fɔ e konɔ hiɛ kɛ hiɛ nɛ a kɛ kpe efɔd ɔ nya enyɔ ɔmɛ.
8 Mlɛ mi fimi nɔ́ nɛ a lo,* nɛ a kɛ maa fi efɔd ɔ nɔ konɛ e muɛ* lɛ bɔ nɛ sa a hu, á ngɔ ní nɛ ɔmɛ nɔuu kɛ pee: sika tsu, kpã bluu, lohwe he bwɔmi nɛ hɛɛ alamua tu su, bo tsutsu, kɛ klala kpakpa nɛ a lo.
9 “Ngɔɔ oniks* tɛ enyɔ nɛ o kpɛ́ Israel binyumu ɔmɛ a biɛhi ngɛ a nɔ,
10 biɛ ekpa nɛ hi tɛ kake nɔ, nɛ biɛ ekpa nɛ piɛ ɔ nɛ hi tɛ kake ɔ hu nɔ ngɛ a fɔmi nya.
11 Ha nɛ a kpɛ́ Israel binyumu ɔmɛ a biɛhi ngɛ tɛ enyɔ ɔmɛ a nɔ kaa bɔ nɛ a kpɛ́ɔ nɔ́ ngɛ nɔ́ nya sɔumi nɔ́ nɔ ɔ. Lɔ ɔ se ɔ, ó sile sika tsu kɛ bɔle tɛ ɔmɛ.
12 Moo ma tɛ enyɔ ɔmɛ ngɛ bo tsɔwi ɔmɛ nɛ a ngɛ efɔd ɔ konɔ ɔ nɔ nɛ a pee kaimi tɛhi kɛ ha Israel bi ɔmɛ. Biɛ ɔmɛ maa hi Aaron konɔ hiɛ kɛ hiɛ ngɛ Yehowa hɛ mi kaa kaimi nɔ́.
13 Ngɔɔ sika tsu kɛ bɔle mɛ
14 nɛ́ o ngɔ kɔsɔkɔsɔ kpã enyɔ nɛ a kɛ sika tsu ngmingmiingmi lɛ tslɔ kɛ tsa nɔ́ tɛtlɛɛ ɔmɛ.
15 “Ha nɛ nɔ nɛ e loɔ ní kɛ woɔ bo mi nɛ e pee kojomi gugue nɔ hami nɔ́ ɔ. Á pee lɛ kaa efɔd ɔ. Á ngɔ sika tsu, kpã bluu, lohwe he bwɔmi nɛ hɛɛ alamua tu su, bo tsutsu, kɛ klala kpakpa nɛ a lo kɛ pee.
16 Ke a ku mi enyɔ ɔ, e kami kɛ e blimi nɛ sɔ, e kami nɛ pee nine mi blimi kake,* nɛ e blimi hu nɛ pee nine mi blimi kake.
17 Moo to tɛhi ngɛ nɔ; tɛ ɔmɛ nɛ a hi zã eywiɛ mi. Kekle zã a mi tɛ ɔmɛ ji rubi, topaz, kɛ emerald.
18 Zã enyɔne ɔ mi tɛ ɔmɛ ji tɛkuɔis, safiro, kɛ yaspi.
19 Zã etɛne ɔ mi tɛ ɔmɛ ji leshem tɛ,* agate, kɛ ametisto.
20 Zã eywiɛne ɔ mi tɛ ɔmɛ ji krisolito, oniks,* kɛ yade. Moo ngɔ sika tsu kɛ bɔle eko fɛɛ eko he.
21 Tɛ ɔmɛ kɛ Israel binyumuhi 12 ɔmɛ a biɛ ɔmɛ a hiɛmi nɛ sɔ. Mo kpɛ́ a biɛ ɔmɛ kakaaka ngɛ tɛ ɔmɛ a nɔ kaa bɔ nɛ a kpɛ́ɔ nɔ́ ngɛ nɔ́ nya sɔumi nɔ́ nɔ ɔ. Biɛ ɔmɛ eko fɛɛ eko nɛ da si kɛ ha wɛtso 12 ɔmɛ a kpɛti kake.
22 “Ngɔɔ sika tsu ngmingmiingmi kɛ pee kɔsɔkɔsɔ nɛ a tslɔ kaa kpã kɛ wo gugue nɔ hami nɔ́ ɔ nya tsuo kɛ kpe.
23 Ngɔɔ sika tsu kɛ pee gugue nɔ hami nɔ́ ɔ he ga enyɔ, nɛ o ngɔ ga enyɔ ɔmɛ kɛ wo gugue nɔ hami nɔ́ ɔ yi nɔ kɔ̃ nya enyɔ ɔmɛ a mi.
24 Ngɔɔ sika tsu kpã enyɔ ɔmɛ kɛ hɔɔ ga enyɔ ɔmɛ nɛ a ngɛ gugue nɔ hami nɔ́ ɔ kɔ̃ nya amɛ a mi.
25 Ngɔɔ kpã enyɔ ɔmɛ a nya enyɔ ɔmɛ kɛ hɔ nɔ́ tɛtlɛɛ enyɔ ɔmɛ a nya, nɛ a kɛ mɛtɛ bo tsɔwi ɔ nɛ ngɛ efɔd ɔ konɔ ɔ nɔ kɛ ma e hɛ mi je.
26 Ngɔɔ sika tsu kɛ pee ga enyɔ kɛ wo gugue nɔ hami nɔ́ ɔ sisi kɔ̃ nya enyɔ ɔmɛ ngɛ e mi blɔ, nɛ a hɛ mi nɛ tsɔɔ efɔd ɔ.
27 Moo ngɔ sika tsu kɛ kpale pee ga enyɔ ngɛ efɔd ɔ hɛ mi, ngɛ mlɛ mi fimi nɔ́* nɛ a lo ɔ yi nɔ bɔɔ, ngɛ he nɛ e kɛ efɔd ɔ tsa ngɛ ɔ.
28 Ngɔɔ kpã bluu kɛ wo gugue nɔ hami nɔ́ ɔ nya ga amɛ a mi, nɛ o kɛ muɔ efɔd ɔ nya ga a, nɛ e nu gugue nɔ hami nɔ́ ɔ kɛ da si ngɛ efɔd ɔ nɔ ngɛ mlɛ mi fimi nɔ́* nɛ a lo ɔ yi nɔ.
29 “Ke Aaron ma He Klɔuklɔu ɔ, e kpla Israel binyumu ɔmɛ a biɛhi nɛ ngɛ kojomi gugue nɔ hami nɔ́ ɔ nɔ ɔ kaa kaimi nɔ́ ngɛ Yehowa hɛ mi daa.
30 Ngɔɔ Yurim ɔ kɛ Tumim* ɔ kɛ wo kojomi gugue nɔ hami nɔ́ ɔ mi, nɛ́ ke Aaron ma Yehowa hɛ mi ɔ, a hi e gugue* nɔ. Aaron nɛ e kpla nɔ́ nɛ a maa da nɔ kɛ kojo Israel bi ɔmɛ ɔ ngɛ e gugue* nɔ ngɛ Yehowa hɛ mi daa.
31 “Ngɔɔ kpã bluu ngmingmiingmi kɛ pee efɔd ɔ sisi tade klɔii nɛ kɔni be he ɔ.
32 Mo je kuɛ mi puɔ ngɛ e kpɛti. Ha nɛ bo lolɔ nɛ e lo e kuɛ mi ɔ kɛ kpe. E kuɛ mi ɔ nɛ e hi kaa dade tade kuɛ mi bɔ nɛ pee nɛ e ko gba.
33 Ngɔɔ kpã bluu, lohwe he bwɔmi nɛ hɛɛ alamua tu su, kɛ bo tsutsu kɛ pee pomegranet,* nɛ o ngɔ sika tsu kɛ pee ngmlɛhi kɛ wo e nya fiami ɔ nya tsuo kɛ kpe. Sika tsu ngmlɛhi nɛ a hi pomegranet ɔmɛ a kpɛ.
34 Ha nɛ sika tsu ngmlɛ ɔmɛ kɛ pomegranet ɔmɛ nɛ a nyɛɛ a sibi a se ngɛ tade klɔii nɛ kɔni be he ɔ nya fiami ɔ nya kɛ kpe. Ke sika tsu ngmlɛ kake ba a, kɛkɛ pomegranet kake nyɛɛ se.
35 Aaron nɛ e wo kɛ sɔmɔ. Ke e yaa Yehowa hɛ mi ngɛ jami he ɔ, á nu ngmlɛ ɔmɛ a pɛmi, nɛ ke e ngɛ kpo jee hu á nu ngmlɛ ɔmɛ a pɛmi bɔ nɛ pee nɛ e ko gbo.
36 “Ngɔɔ sika tsu ngmingmiingmi kɛ pee nɔ́ pɛtɛɛ nɛ ngɛ tsɛ̃e, nɛ o kpɛ́ ní ngɛ nɔ kaa bɔ nɛ nɔ ko ma kpɛ́ nɔ́ ngɛ nɔ́ nya sɔumi nɔ́ nɔ ɔ. Mo kpɛ́ ngɛ nɔ ke: ‘Klɔuklɔu ji Yehowa.’
37 Ngɔɔ kpã bluu kɛ fi lɛ kɛ wo yi fimi nɔ́ ɔ he; é hi e hɛ nya ngɛ yi fimi nɔ́ ɔ he.
38 E hi Aaron hɛ nya, konɛ ke nɔ ko tɔ̃ Mawu nɔ ngɛ ní klɔuklɔuhi nɛ Israel bi ɔmɛ jɔɔ nɔ kaa nike ní klɔuklɔu nɛ a kɛ sãã afɔle ɔ a he ɔ, tɔmi ɔ nɛ e tloo Aaron. E hi e hɛ nya be fɛɛ be, bɔ nɛ pee nɛ Yehowa bua nɛ e jɔ a he.
39 “Ngɔɔ kpã kpakpa kɛ lo tade tsɛkitsɛki klɔii, nɛ o ngɔ klala kpakpa kɛ pee yi fimi nɔ́, nɛ o lo mlɛ mi fimi nɔ́.
40 “Moo kpɛ tade klɔiihi, mlɛ mi fimi níhi, kɛ osɔfo pɛɛ kɛ ha Aaron binyumu ɔmɛ hulɔ konɛ a hɛ mi nɛ ba nyami nɛ a he nɛ pee fɛu.
41 Moo ngɔ tade ɔmɛ kɛ wo o nyɛminyumu Aaron kɛ e binyumu ɔmɛ, nɛ o pɔ mɛ nu, nɛ o wo mɛ osɔfohi,* nɛ o pee mɛ klɔuklɔu, nɛ a sɔmɔ mi kaa osɔfohi.
42 Jehanɛ hu ɔ, moo ngɔ klala kpakpa kɛ kpɛ tagajami ha mɛ nɛ a wo kɛ ha a he. E kami nɛ e hi kɛ je a mlɛ mi kɛ ya si a fiɔ mi.
43 Ke Aaron kɛ e binyumu ɔmɛ yaa kpe he bo tsu ɔ mi, aloo a yaa afɔle sami la tɛ ɔ he ngɛ he klɔuklɔu ɔ nɛ a ya sɔmɔ ɔ, á wo ní nɛ ɔmɛ, bɔ nɛ pee nɛ a ko tɔ̃ nɛ a ko ba gbo. E ji mlaa nɛ e maa hi si daa kɛ ha e kɛ e nina* nɛ maa ba a tsuo.
Sisi Ningmahi
^ Ngɛ Hebri gbi mi ɔ, “ni nɛmɛ nɛ a tsui le ní.”
^ “Lohwe he bwɔmi.” E ji jijɔ he bwɔmi nɛ a lo lɛ kaa kpa, nɛ a wo lɛ kɔla nɛ ji alamua tu su.
^ Aloo “Mi mi fimi nɔ́ nɛ a lo.”
^ Aloo “mu.”
^ Aloo “shoham.”
^ Maa pee sɛntimita 22.2 (intsisi 8.75). Hyɛ Mi Tsɔɔmi Munyu B14.
^ Tɛ ko nɛ e he jua wa, se a li tɛ tutuutu nɛ e ji. E ma nyɛ maa pee kaa amber, hiakinto, opal, loo tourmaline.
^ Aloo “shoham.”
^ Aloo “mi mi fimi nɔ́.”
^ Aloo “mi mi fimi nɔ́.”
^ Aloo “tsui.”
^ Aloo “tsui.”
^ Ngɛ Hebri gbi mi ɔ, “nɛ́ o ngɔ he wami kɛ wo a dɛ.”
^ Ngɛ Hebri gbi mi ɔ, “ngmɛdu.”
